Hơdôm hrơi amăng akŏ blan 6 anai, ƀơi sang hră gưl klâo Ƀuôn Ma Thuôt, čơđai sang hră hneč mă rim mông mơnit pioh pơkơjăp glăi tơlơi hrăm, pơhrăm ten djop tơlơi tơña hăng ngă giong tơlơi thâo kơ hơdră pơblang tơlơi pơplông. Adơi Trần Quốc Trung, čơđai sang hră anih 12 A14 brơi thâo, hlăk pơtum hrăm glăi hơdôm akŏ tơlơi tơña pơplông mơ̆ng hơdôm thun hlâo, sem glăi hrăm tui lu akŏ tơlơi tơña mơ̆ng lu sang hră, tơring čar pơkŏn kiăng prăp lui tong ten tơhnal pơkă kơ bruă čih anăn mut hrăm sang hră gưl prong. Ñu dăp akŏ bruă tañ biă mă, kiăng hrăm ba rim tơlơi hrăm, hơduah ĕp mă tơlơi pơhing kiăng thâo hluh hăng hơdră iâu pơmut hrăm gưl prong, gưl ƀrô djop sang hră.

“Kâo pơtum hrăm glăi hơdôm akŏ tơlơi tơña pơplông mơ̆ng hơdôm thun hlâo adih, ĕp lăng tong ten lu tơlơi tơña mơ̆ng djop sang hră phara, dăp akŏ bruă pioh hrăm glăi rim tơlơi hrăm hăng sem mơ̆ng lu tơlơi pơhing amăng plăng tơlơi pơhing mơnuih mơnam hăng ƀing amai, ayong nao hlâo pioh hrăm tui kiăng ngă djơ̆ anŏ pơkă dưi mut hrăm sang hră gưl prong Đại học Kinh tes  ƀôn prong Hồ Chí Minh hăng klâo mơta tơlơi pơplông Toán, Angle hăng Lý”.

Gah klôn kơ mông hrăm glăi ƀiă hrơi mông djơh hăng anun, mơ̆ng ƀing čơđai sang hră lĕ hơmâo tơlơi gum hrŏm mơ̆ng nai pơtô, amĭ ama sang anŏ. Nai neh Nguyễn Thị Xuân Hương, Khua sang hră gưl klâo Ƀuôn Ma Thuôt brơi thâo, tơdơi kơ pơtong glăi boh tŭ yua hrăm hră mơ̆ng ƀing čơđai sang hră hăng hơdôm wơ̆t pơplông lông lăng, ƀing nai amăng sang hră hơmâo dăp glăi hơdră, djru ba djơ̆ găl rim khul čơđai sang hră. Sang hră ăt ngă hrŏm amĭ sang anŏ čơđai sang hră hăng anom bruă ia jrao kiăng djru krăp pơgang tơlơi suaih pral, kiăng ngă hơđong pran jua kơ ƀing čơđai hlâo kơ truh mông mut pơplông.

“Hăng ƀing čơđai sang hră pơ-ai buai, ngă hrŏm anom bruă ia jrao pioh pơtô brơi čơđai anăm hŭi hăng pơgang klă drơi jăn, pran jua, tơlơi pơmin hlâo kơ mut amăng anih pơplông abih anih 12. Hăng ƀing čơđai hrăm ƀu thâo đơi ôh, jao rim čô nai pơtô, gơñu djru ba đôč đač, amăng grup tơlơi hrăm, pơtô ba sa čơčô ƀơi sang hră hăng gah rơngiao mông hrăm sit nik, djru soh đôč. Laih dŏng ăt git gai pơtrun hiăp ƀing nai pơtô, nai khua anih hrăm ngă hrŏm hơdôm ƀing nai pơtô sa tơlơi hrăm, amĭ ama ƀing čơđai hrŏm hăng khua mua sang hră kiăng pơtrut rơnoh čơđai pơplông dưi abih gưl hrăm lu hloh”.

Tui hăng Gơnong bruă Pơtô hăng Pơjuăt tơring čar Dak Lak, bruă pơtô hrăm glăi ten, khom ngă tui jơlan hơdră, kiăo tui tơlơi thâo mơ̆ng ƀing čơđai sang hră, đing nao kơ ƀing čơđai hrăm hŭi ƀu dưi hĭ tal pơplông abih gưl. Hrŏm hăng bruă prăp lui tong ten tơlơi hrăm, tơring čar Dak Lak ăt ngă giong abih bang djop črăn prăp lui kơ tal pơplông. Đơ đam tơring hơmâo 1 khul wai lăng abih bang 64 bit anih pơplông sit nik hăng 55 bit anih pơhlom lui; hơmâo năng ai 1.500 boh anih mut pơplông sit nik hăng 40 boh anih prăp lui pioh tơguan pơhlom. Năng ai hơmâo 5000 čô khua mua, nai pơtô hrăm hră, ƀing ngă bruă amăng gơnong bruă pơtô hrăm hăng ƀing tơhan djop anom bruă pơdjơ̆ nao, bơwih brơi kơ tal pơplông.

Yă Lê Thị Thanh Xuân, Khua Gơnong bruă Pơtô hăng Pơjuăt tơring čar Dak Lak brơi thâo, tal pơplông abih anih 12 thun anai, prong hăng lu biă mă, yua mrô čơđai sang hră lu, anih pơphun bruă mă prong hloh, pơtum lu sang bruă, glông bruă kơđi čar gum hrŏm, brơi pơphun klă hloh, kơtưn wai lăng pơgang tong ten sa hnơ̆ng.

“Pohpun hyu sem lăng jŭ yap abih bang hăng hmao kru git gai djop anih pơphun pơplông pơsir mơtam hơdôm anih anom mut pơplông, kah hăng kơƀang grê, kamera, gơnam yua sem lăng pơplông; djop anih mut pơplông khom ngă djop anŏ gêh găl pơphun brơi tơlơi rơnuk rơnua mơak klă. Gah bruă jao mơnuih mă bruă, prăp lui hlâo djop mrô mơnuih apăn bruă, nai pơtô hăng prăp lui pơtô hrăm tong ten tơlơi phiăn pơkă, bruă ngă kơ ƀing nai. Lăng abih bang, bruă prăp lui, ngă hrŏm hăng pok pơhai, truh mông anai dưi pơhlom klă laih, tong ten hăng djơ̆ akŏ bruă jao”.

Hăng bruă prăp lui mơ̆ng tañ djop sang hră, hơmâo tơlơi gum hrŏm klă mơ̆ng ƀing nai hăng tơlơi kiăng khut khăt amăng anom bruă pơtô hrăm, tơring čar Dak Lak hlăk  yak nao amăng črăn tal rơnuč hlâo kơ truh mông pơplông hăng tơhnal pơkă ƀu pơhlom pơgang rơnuk rơnua hơđong, tơpă hloh kơ abih bang čơđai sang hră, dưi gêh găl mut pơplông, boh nik ñu kual ataih, asuek, tơnap tap, kiăng pơthâo djơ̆ lăp tơlơi thâo mơ̆ng gơñu amăng tal pơplông anai.