Mông jơnum hơmâo hmư̆ rơbêh 100 tơlơi rơkâo mơ̆ng anom mơdrô, anom ngă ƀong hrŏm, sang anŏ sĭ mơdrô, pơƀut lăi nao hơdră ngă mơak anih tuh pơ alin, pơsir brơi anŏ tơnap kơ bruă pơkra gơnam sĭ mơdrô hăng pơtrut đĭ kyar bơwih ƀong mơnuih ƀôn sang ngă pô. Hơdôm tơlơi pơgôp hiăp kiăng čih pơgiong tơlơi phiăn, tơlơi pơkă, ngă amuñ hră pơ-ar, pơklaih brơi anŏ tơnap gah lŏn tơnah, pơkă hơnong, prăp hlâo či ngă bruă, tuh pơ alin, man pơdong hăng ayuh hyiăng anih hơdip; laih dong dưi čan prăk, hơmâo hơdră djru prăk jia, hăng hơdôm tơlơi gêh găl či đĭ kyar.

Klah čun mông jơnum, ơi Lương Nguyễn Minh Triết, Ding kơna Ping gah dêh čar, Khua ping gah tơring čar, Khua khul pơ ala mơnuih ƀôn sang dêh čar tơring čar Dak Lăk jao bruă kơ Jơnum min mơnuih ƀôn sang tơring čar pơtruh pơplih hơdră pơhiăp tom, pơhmư̆ djŏp tơlơi pơgôp hiăp, tơlơi rơkâo mơ̆ng hơdôm anom bơwih ƀong. Jao rơđah bruă mă kơ rim čô mơnuih, anom bruă amăng bruă pơsir hĭ đut tơhnal, tañ hlao djŏp tơlơi rơkâo. Khul khua pơ ala mơnuih ƀôn sang dêh čar, khua mua pơ ala mơnuih ƀôn sang tơring čar Dak Lăk ăt krăp lăng hơdôm tơlơi ƀuăn ngă bruă mơ̆ng Jơnum min mơnuih ƀôn sang tơring čar ăt kah hăng hơdôm gơnong bruă, să phường hăng khul bơwih ƀong./.