Mông jơnum hơmâo pơhmư̆ 101 tơlơi rơkâo mơ̆ng anom mơdrô, anom ngă ƀong hrŏm, sang anŏ sĭ mơdrô, pơƀut lăi nao hơdră pơplih anih tuh pơ alin, pơklaih anŏ tơnap kơ bruă pơkra gơnam sĭ mơdrô laih anun pơtrut đĭ kyar bơwih ƀong huă mơnuih ƀôn sang ngă pô. Hơdôm tơlơi pơgôp hiăp kiăng čih pơkra giong tơlơi phiăn, ngă amuñ ƀiă hră pơ-ar, pơklaih brơi anŏ tơnap lŏn tơnah, bruă pơkă hơnong čuk pơkra, tuh pơ alin, man pơdong hăng ayuh hyiăng anih hơdip; laih dong dưi čan prăk, bruă mă prăk jia hăng hơdôm tơlơi či đĭ kyar. Yă Võ Thị Hà Giang, pơ ala Grup pơkra kơphê Trung Nguyên, hơmâo tơlơi pơgôp hiăp: “Ƀing gơmơi rơkâo đĭ hăng Gơnong dlông laih anun tơring čar sem lăng tơlơi phara hơjăn kơ tơring čar Dak Lăk kiăo tui 5 tơmeh phun: hơdră pơtrun mơ̆ng kơnuk kơna, kơ anih anom, kơ mơnuih mă bruă, kơ prăk kăk hăng boh thâo ia rơgơi”.

Khul bơwih ƀong ăt rơkâo kiăng pơtrut tuh pơ alin man pơkra jơlan nao rai, logistics, boh thâo mrô; djru pơtrut bơwih ƀong, đĭ kyar sĭ mơdrô điện tử, čơkă tuai hăng pơhưč tuh pơ alin. Lu tơlơi pơgôp hiăp kiăng mă yua boh thâo ia rơgơi kơtang hloh, mă yua boh thâo mrô, lăi pơthâo tơlơi pơhing bơwih brơi bruă pơkra gơnam sĭ mơdrô; hmao pơsir hĭ tơlơi tơnap, anŏ gun hơmâo amăng mông ngă bruă. Ơi Trần Khánh Minh, pơ ala Khul tuai čuă ngui tơring čar Dak Lăk pơgôp hiăp: “Anŏ tơnap hloh mơ̆ng anom mơdrô ră anai, gơmơi kiăng ngă bruă čơkă tuai hyu ngui mơtah mơda, ngă hiam, samơ̆ ƀu thâo hiưm pă ôh djơ̆ hơnong pơkă. Yua aka ƀu hơmâo tơlơi phiăn rơđah rơđông, hơdôm anom bruă wai lăng amăng tơring hai ăt sư̆ rơbư̆ mơn lơ̆m brơi hră wai lăng lŏn tơnah ƀudah man pơdong anih anom ƀơi lŏn ngă hmua ngă anih čơkă tuai hyu ngui. Anom bơwih ƀong ngă bruă biă, ngă bruă gir samơ̆ hŭi ngă soh glăi. Rơkâo pơtrut hơmâo tơlơi pơtrun hăng ngă tui hơnong pơkă hyu ngui mơtah mơda”.

Lăi glăi hơdôm tơlơi pơgôp hiăp, rơkâo đĭ mơ̆ng anom bơwih ƀong, ơi Đỗ Hữu Huy, Ding kơna aka ƀu sit nik Ping gah, Khua jơnum min mơnuih ƀôn sang tơring čar brơi thâo, tơring čar hơmâo ngă hăng glăk pơƀut git gai djŏp hơdră pơtrut đĭ kyar; akŏ pơdong Khul git gai đĭ kyar dua mrô hăng hơdôm grup apăn sa mơta bruă gum hrŏm, pơklaih brơi anŏ tơnap kơ anom bơwih ƀong, pô tuh pơ alin. Tui hăng ơi Đỗ Hữu Huy, tơring čar lăng yom biă anih tuh pơ alin sĭ mơdrô, pơplih kiăng bruă ngă hră, lăng khul bơwih ƀong yơh pô ta či bơwih brơi: “Jơnum min mơnuih ƀôn sang tơring čar Dak Lăk pơsit gum hrŏm, pơhmư̆ hăng djru ba anom bơwih ƀong, anom ngă ƀong hrŏm, sang anŏ sĭ mơdrô jing bruă kiăng ngă re se, na nao mơtăm yơh. Ƀu kơnong ngă tui amăng mông jơnum ôh, pran jua ngă bruă mơ̆ng Jơnum min mơnuih ƀôn sang tơring čar lĕ pơplih mơ̆ng ngă hră jing bơwih brơi, gum hrŏm hăng anom mơdrô hlao”.

Klah čun mông Jơnum bưp mơnuih ƀôn sang hăng anom bơwih ƀong, anom ngă ƀong hrŏm laih anun sang anŏ sĭ mơdrô, ơi Lương Nguyễn Minh Triết, Ding kơna git gai Ping gah, Khua ping gah, Khua khul pơ ala mơnuih ƀôn sang dêh čar tơring čar Dak Lăk pơsit pran jua kơđi čar prong hloh mơ̆ng tơring či pơsir hĭ hơdôm tơlơi tơnap, anŏ gun amăng bruă pơkra gơnam, sĭ mơdrô sit nik hloh.

Khua ping gah tơring čar Dak Lăk jao bruă kơ Jơnum min mơnuih ƀôn sang tơring čar pơplih hơdră pơtom hiăp, pơhmư̆ djŏp tơlơi pơgôp hiăp, rơkâo đĭ mơ̆ng hơdôm anom bơwih ƀong. Jao rơđah bruă kiăng ngă mơ̆ng rim čô mơnuih, anom bruă či pơsir hĭ đut tơhnal, tañ hloh djŏp tơlơi rơkâo hơmâo mơit nao. Khul khua pơ ala mơnuih ƀôn sang dêh čar, Khul pơ ala mơnuih ƀôn sang tơring čar Dak Lăk ăt krăp lăng hơdôm tơlơi ƀuăn mơ̆ng Jơnum min mơnuih ƀôn sang tơring čar ăt kah hăng hơdôm gơnong bruă, să phường hăng anom bơwih ƀong: “Tơring čar Dak Lăk pơsit ha wơ̆t dong, lăng yom biă tơlơi gơgrong mơ̆ng kual anom bơwih ƀong lăi hrŏ, biă ñu lĕ kual bơwih ƀong mơnuih ƀôn sang ngă pô. Anai jing bruă yom biă kiăng tơring čar dưi đĭ kyar hơmâo 2 mrô pơ anăp. Gơmơi čang rơmang anom bơwih ƀong hơduah ĕp, kiăo tui tơlơi phiăn, pơplih tơlơi pơmin sĭ mơdrô, tŭ mă hơdôm tơlơi djru hơmâo lăi nao amăng Tơlơi pơtrun 68 mơ̆ng Ding jum kơđi čar kơ đĭ kyar bơwih ƀong huă mơnuih ƀon sang ngă pô či đĭ kyar anom bơwih ƀong”.

Mơ̆ng hơdôm tơlơi ƀuăn ƀơi mông jơnum, Dak lăk glăk pôr pơthâo kơtang kơ sa gong gai pơplih phrâo klă hloh, mă anom bơwih ƀong yơh či bơwih brơi. Bruă pơplih bruă pơhiăp tom, jao bruă rơđah rơđông hăng krăp lăng boh than ngă bruă ƀu kơnong djru pơklaih anŏ tơnap ƀơi anăp đôč ôh, ăt pơjing pran jua đăo kơnang kơ anom mơdrô. Anai ăt jing bruă ngă rơđah rơđông či ba tơlơi pơtrun 68 mơ̆ng Ding jum kơđi čar sit nik mut amăng tơlơi hơdip, pơjing tơlơi pơhmư̆ jing bruă ngă, pơjing hơdôm tơlơi ƀuăn jing boh than đĭ kyar rơđah rơđông./.