Rơwang thun 2022-2026, tơring čar Dak Lăk hơmâo 60 bruă mă gah boh thâo, ia rơgơi gưl tơring čar hơmâo pơsit, jao glăi mă yua boh thâo. Hơdôm bruă hơmâo kơsem min ba yua amăng tơlơi hơdip mơda bơwih ƀong, djru đĭ kyar ngă hmua mă yua boh thâo ia rơgơi, pơkra gơnam mơ̆ng hmua, jrao akha kyâo, ba yua ia rơgơi mrô, răk pioh djon gen hăng wai lăng tơlơi suaih pral mơnuih ƀôn sang.

Bruă pơtruh plah wah Kơnuk kơna, ƀing kơhnâo hăng sang bruă mơdrô ăt hơmâo pok pơhai ngă amăng hơdôm bruă mă yua boh thâo kah hăng pơkra lu mơta gơnam mơ̆ng boh sâu riêng, pơkra lu ia jrao akha, sem lăng djuai hơbơi plum phrâo hăng pla bơmao ngă jrao gah yŭ glai rưng. Khă hnun, bruă jao glăi, sĭ mơdrô bruă hơmâo kơsem min ăt dŏ tơdu mơn; bruă wai lăng, brơi prăk pơjing boh thâo phrâo dŏ lu mơn tơlơi aka ƀu găl. Ƀơi mông jơnum, khua mua jơnum min mơnuih ƀôn sang tơring čar Dak Lăk kiăng Gơnong bruă boh thâo ia rơgơi lăng glăi abih djŏp bruă mă, pơtŏng rơđah anŏ tŭ yua tơdơi kơ kơsem min pơkra giong; ruah mă bruă kơsem min lăp djơ̆, tŭ yua či pok prong, ba sĭ, pơlir bruă kơsem min hăng anŏ či kiăng mơ̆ng tơring čar tui tơlơi pơtrun 57 mơ̆ng Ding jum kơđi čar. hăng hơdôm anŏ gun gah hră pơ-ar, tơring čar kiăng ječ ameč lăng glăi abih bang pơhrŏ trun aset biă mă lĕ 50% mrô hră pơkôl pơkă yua tơring čar wai lăng./.