Anai arăng lăng lĕ hơdră bruă pơplih phrâo kiăng pơtrut pơplih ngă hră pơ-ar, hrưn đĭ klă amăng bơkơtưn hăng pơhưč hơdôm akŏ bruă pơtrut djru brơi hơnong pơkă pơđĭ kyar bơwih ƀong huă dua mrô amăng tơring čar. Tui tơhnal pơkă anai, hrơi blan ngă tui hră pơ-ar hơmâo bơtŭ ư ƀudah pơplih tơlơi črâo trun tuh pơ alin tui tơlơi glăm ba mơng Khua Jơnum min mơnuih ƀon sang tơring čar hăng hră pơ-ar jao, pơplih hră pơsit čih anăn tuh pơ alin amra pơhrŏ ƀiă 50% pơhmu tui ră anai. Tơhnal pơkă hơmâo mă yua hăng hơdôm akŏ bruă man pơdong ƀơi kual tuh tia pơkra ming, anih phun logistics, tơdrun kŏmpăn; hơdôm akŏ bruă man pơdong sang dŏ, apui yua hăng hơdôm akŏ bruă hơmâo abih tih prăk tuh pơ alin mơng 800 klai prăk pơ glông.

Hơdôm hră pơ-ar dong amăng anih kiăng ngă hơmâo mrô pơƀuh brơi kiăng pơpha tui glông, kiăo tui lăng hăng pơsir hĭ tañ amăng djop tơhnal ngă. Sit biă ñu, djop gơnong bruă, sang bruă hăng ƀon lan rơkâo đing nao dưm dăp mơnuih mă bruă, hrơi mông ngă brơi hră pơ-ar. Tơdah hlơi kaih lăi glăi ƀudah ƀu lăi glăi djơ̆ hrơi mông pơkă amra glăm ba hăng hơdôm boh tơhnal bruă mă tui bruă wai lăng mơng anom bruă gơñu.