Sang măi pơkra boh troh sĭ pơ tač rơngiao Chánh Thu Dak Lak dưi pơkra 70.000 tơ̆n amăng ha thun hăng abih tih prăk tuh pơ alin rơbêh 476 klai prăk. Hrơi blan him lăng man pơkra giong amăng 18 blan. Lơ̆m mă yua sang măi amra đing nao blơi pơhrui, dưm amăng adung boh troh mơtah mơda hăng boh troh dưm amăng kơthung rơ-ơ̆ anun lĕ: sầu riêng, boh kruăi hrĕ, boh  čin, pơtơi, thanh long, boh pơ-ô̆…kiăng sĭ mơdrô mơng Khač, Japan, Mi, Australia.

Tui  ơi Hoàng Trung, Khua anom bruă wai pơgang phun pla, Ding jum ngă hmua hăng pơđĭ kyar ƀon lan, hăng tơlơi dưi amăng ngă hmua amăng tơring čar Dak lak, lơ̆m sang măi dưi mă yua pơkra pơjing boh troh pơ tač rơngiao Chánh Thu Dak Lak amra pơgôp ngă pơgiong rơnoh yôm gơnam đang hmua kah hăng hơmâo lu dong bruă mă ƀơi ƀon lan.