Mơguah lơ 26/2, ƀơi plơi prong Buôn Ma Thuột, Khul pơphun jơnum ngui kơphê Buôn Ma Thuột tal 9 thun 2025, tŏ tui jơnum lăi pơthâo kơ tơlơi anai. Anai lĕ jơnum hăng ƀing čih tơlơi pơhing tal 3 tơdơi kơ dua wŏt pơphun ƀơi ƀôn prong Hồ Chí Minh hăng Hà Nội. Thun anai, jơnum ngui amra hơmâo 17 bruă mă sit nik. Hrŏm hăng hơdôm bruă tui tơlơi pơkă kar hăng hơdôm tal jơnum ngui hlâo anun, jơnum ngui tal anai hơmâo lu anŏ phara hăng hơdôm akŏ bruă hơmâo pok pioh čơkă 50 thun hrơi pơklaih rơngai Buôn Ma Thuột, anun lĕ mông pok man pơkra sang măi kơphê apui yua Trung Nguyên Legend; mông ngă lơphet pok man pơdong sang sĭ mơdrô-Sang jưh tuai-Sang dŏ ƀơi Buôn Ma Thuột; mông ngă lơphet tuh pơ alin man pơdong kual tuh tia pơkra ming Phú Xuân.

Jơnum ngui kơphê Buôn Ma Thuột tal 9 thun 2025, hăng anăn “Buôn Ma Thuột-Anih ba nao kơphê rŏng lŏn tơnah”, amra pơphun dong mơng lơ 9/3/2025 truh lơ 13/3/2025. Ơi Nguyễn Tuấn Hà, Kơ-iăng Khua Jơnum min mơnuih ƀôn sang tơring čar Dak Lak, Khua khul pơphun jơnum ngui brơi thâo, anai ăt lĕ hrơi mông pơsur sĭ mơdrô yôm phăn; hrơi mông kiăng ƀing wai lăng, anom bơwih ƀong sĭ mơdrô hăng gơyut gơyâo pơbưp nao rai, ngă hrŏm sĭ mơdrô, laih dong lăi pơthâo anăn apăn sĭ mơdrô kơphê Buôn Ma Thuột, pơđĭ kyar tuai čuă ngui hăng pơlir sĭ mơdrô.