Mơguah lơ 10/3, Ding jum bruă hmua hăng pơđĭ kyar ƀon lan hơmâo ngă hrŏm hăng Jơnum min mơnuih ƀon sang tơring čar Dak Lăk pơphun mă yua dơnao kŏng ia rơbêh 1.600 klai prăk - dơnao kŏng ia Ea H’leo 1, ring bruă yôm biă mă hăng kual lŏn kơƀah ia tơring glông Ea H’leo. Kơ-iăng khua dêh čar ơi Trần Lưu Quang gư̆ bơnut pơphun mă yua kơčăo bruă anai. Dơnao kŏng ia Ea H’leo 1 hơmâo Ding jum bruă hmua hăng pơđĭ kyar ƀon lan pơsit tuh pơ alin mơng thun 2017, prong 26 klăk m3. Anai jing ring bruă blung a ƀơi tơring čar Dak Lăk hăng ƀơi kual Dap Kơdư hơmâo bơnư̆ pơgăn ia krông pơjing rai dơnao ia, bơnư̆ kŏng ia hơmâo pơkra hăng bê tông kơjăp, hơmâo mă yua phụ gia tro bay.

Dơnao kŏng ia anai amra pơpha hyu ia mơng ia krông Ea H’hleo đah mơng hơmâo ia pruih hơđong kơ phun pla hơmâo nua pơmă; brơi ia yua kơ mơnuih ƀon sang, brơi ia rông hlô mơnong, sang măi pơkra gơnam, tuai čuă ngui...djru pơplih bruă ngă hmua klă tui, hơmâo nua pơmă laih anun đĭ kyar kơjăp, pơplih tui tơlơi hơdip mơnuih ƀon sang. Tui hăng hơdră pơkra, ring bruă hơmâo mă yua amra brơi ia kơ 5.000 ha lŏn ngă hmua, brơi ia yua kơ năng ai ñu 15.000 čô mơnuih amăng kual hơmâo dơnao ia.