Ƀơi tơring čar Dak Lak ră anai hmâo rơbêh kơ 13.100 bôh anom bơwih ƀong glăk mă bruă, đĭ rơbêh kơ 700 bôh anom bơwih ƀong bơhmu hăng thun 2023. Hơdôm bôh anom bơwih ƀong ƀơi Dak Lak glăk pơplih klă hơdră măi mok, kơtưn măi mok rơnuk anai, dăp glăi bruă bơwih ƀong sĭ mơdrô lăp djơ̆ hăng tơlơi kiăng mơ̆ng anih anom sĭ blơi.

Amăng mông ngă lơphet hơdor glăi 20 thun hrơi pioh mơnuih bơwih ƀong Việt Nam hrŏm hăng bruă lok glăi phiăn juăt lăi pơthâo tơlơi găn rơgao wai lăng, git gai, bơwih ƀong sĭ mơdrô, hơdôm bôh anom bơwih ƀong ăt hmâo mơn lu tơlơi pơmin čang rơmang hăng rơkâo đĭ hơdră pơkă, hơdră bruă pioh bruă mă ba glăi bôh tơhnal hloh. Ơi Huỳnh Văn Dũng, Khua Khul bơwih ƀong sĭ mơdrô tơring čar Dak Lak brơi thâo, hơdôm bôh anom ƀơi tơring čar glăk kiăng hơdôm jơlan tô nao rai Kơnuk kơna pioh hrưn đĭ pơ̆ anih anom sĭ mơdrô jar kơmar./.