Hmư̆ tui tơlơi jak iâo mơ̆ng Khua mir sir dêh čar ta ơi Lương Cường, Khua mir sir dêh čar Bulgaria Rumen Radev hăng Bơnai ñu hmâo rai truh laih pơ̆ plơi prong jưh jom Hà Nội, pơphun tal rai čuă dêh čar Việt Nam mơ̆ng lơ 24 truh lơ 28/11/2024. Mơguah lơ 25/11, ƀơi Anih mă bruă Khua mir sir, Khua mir sir dêh čar ta ơi Lương Cường hăng Bơnai ñu hmâo git gai mông ngă Lơphet čơkă sit nik Khua mir sir ơi Rumen Radev hăng Bơnai ñu rai čuă Việt Nam.

Tơdơi kơ mông čơkă jum, Khua mir sir dêh čar ta ơi Lương Cường hăng Khua mir sir dêh čar Bulgaria Rumen Radev ba jơlan hlâo Grŭp gưl dlông dua bôh dêh čar pơphun bơkơtuai, pơsit bôh tơhnal gum hrŏm kơplah wah dua bôh dêh čar hơdôm hrơi rơgao hăng ba tơbiă hơdôm jơlan gah gum hrŏm pơ̆ anăp anai. Dua gơñu hmâo lăi pơthâo nao rai dơlăm laih kơ pơsit jơlan gah prong, hơdôm bruă rơđah pioh kơtưn gum hrŏm hăng pơđĭ dlông tơhnal rô nao rai pơ̆ anăp anai. Biă ñu kơtưn pơbưp gưl dlông, hơkrŭ đĭ phun than gum hrŏm kơ sĭ mơdrô, tuh pơplai, pơtrut pơsur hơdôm Ding jum, gơnong bruă tơring čar, ƀôn prong hăng anom bơwih ƀong dua bơnah pok pơhai ba glăi bôh tơhnal Tơlơi pơkôl pơkă sĭ mơdrô mơ-ak klă Việt Nam hăng EU; pơtrut kơtang gum hrŏm amăng hơdôm bruă đang hmua, bôh thâo bơkơjăp, hơdră mă yua măi mok pơhing, pơkra lŏn čuah, anih anom dô̆. Dua bơnah pơtŏng sit amra gum hrŏm kơjăp, lăi pơthâo tơlơi găn rơgao hăng dŏng yua tơdruă ƀơi hơdôm mông bơkơtuai lu bơnah, djru tơngan hrŏm pơsir hơdôm tơlơi lông đơ đam rŏng lŏn tơnah./.