Amăng mông jơnum anai, gơnong glông đing nao pơčrông sai, sem lăng hăng pơsit lu bruă kơ hơdră ngă tui hăng klah čun tơlơi pơtrun mrô 18 mơng Khul apăn bruă Ping gah tal 12 kơ sa, dua bruă tŏ tui pơplih phrâo amăng dưm dăp mơnuih mă bruă amăng anih anom kơđi čar brơi hơbot ba glăi boh tŭ yua; kơ bruă pok glăi jơlan hơdră apui lơtrik ayuh Việt Nam hăng tŏ tui kơsem min akŏ bruă apui lơtrik ayuh Ninh Thuận, kơ sem lăng pơsir kơđi mơng ƀing apăn bruă Ping gah hơmâo ngă soh hăng sem lăng kiăng sa, dua čô mơnuih apăn bruă lui ngă Ding kơna Ping gah tal 13 hăng lăi pơthâo kiăng ruah pơhrua sa, dua čô khua mua anom bruă kơnuk kơna.

Đĭ pơhiăp git gai mông jơnum, Khua git gai Ping gah dêh čar ơi Tô Lâm črâo ba 2 mơta bruă kiăng gơnong glông sem lăng pơčrông sai hăng pơsit, anun lĕ kơ hơdră lăng glăi tañ ƀiă djop tơlơi pơtrun mrô 18 hăng tŏ tui dưm dăp, pơgiong bruă ruah mơnuih apăn bruă amăng anih anom kơđi čar brơi hơbot, mă bruă brơi klă, tŭ yua, sit biă ñu lĕ gưl gơnong glông. Lăi pơtong bruă pơhlôm hơbot mơnuih mă bruă amăng anih anom kơđi čar hơmâo lăi nao amăng hơdôm rơwang hăng amra khut khăt ngă tui pơplih phrâo.