Tơring čar Dak Lăk glăk hơmâo lu tơlơi gêh găl phara biă mă, hmư̆ hing kah hăng "anih pla kơphê prong hloh” mơ̆ng Việt Nam, anăp nao jing anih pla kơphê hmư̆ hing hloh mơ̆ng rŏng lŏn tơnah. Dak Lăk jing anih pơtruh brơi kual bơwih ƀong Kơdư - Dơnung laih anun Ngŏ - Yŭ; hơmâo tơlơi gêh găl đĭ kyar logistics, bơwih ƀong ia rơsĭ, pơkra gơnam klă hloh, apui lơtrik phrâo laih anun bơwih ƀong ngă hmua pla kyâo glai. Anai ăt jing phun tơhnal kiăng tơring čar čih pơkra rơnoh đĭ kyar GRDP rơbêh 11%/thun amăng rơwang thun 2026-2030.

Bruă dưm dăp čuk pơkra tal anai hơmâo pơplih glăi, pơsit hơbô̆ bruă đĭ kyar “3 kual - 3 glông jơlan - 2 anih phun - 3 mơta bruă đĭ kyar”, anăp nao pơphun glăi anih bơwih ƀong kjăp phik, mơneč mă abih djŏp tơlơi gêh găl mơ̆ng rim kual. Laih dong, tơring čar pơƀut amăng 3 hơdră đĭ kyar akŏ phun, hơmâo boh thâo ia rơgơi, ba yua ia rơgơi mrô; mơnuih mă bruă hăng tơlơi phiăn; anih anom, jơlan nao rai hiam.

Bơkơtuai ƀơi mông jơnum, yă Đào Bảo Minh, Khua ping gah, Khua Jơnum min pơ ala mơnuih ƀôn sang phương Tuy Hòa brơi thâo, bruă dưm dăp čuk pơkra hơmâo hơdôm boh tơring ngă hrŏm sem lăng tong ten đah mơ̆ng pơjing rai “sa anih čuk pơkra đĭ kyar hrŏm djơ̆ mơ̆ng akŏ truh pơ tlôn”, pơtrut klă hloh tơlơi gêh găl mơ̆ng rim kual: “Rim boh tơring, tui hluai kơ anih anom mơn, lơ̆m čuk pơkra gơmơi sem lăng tong ten laih anun čang rơmang, pơmin či đĭ kyar pơ anăp, laih anun gơmơi ba tơbiă tơlơi pơmin anai amăng bruă čuk pơkra. Lơ̆m bruă čuk pơkra hơmâo kĭ brơi, jing tơlơi gêh găl brơi ƀing gơmơi kiăo tui tơlơi pơsit anun, jing gơmơi hơmâo pô tuh pơ alin, dưi đĭ kyar. Tuh pơ alin mơ̆ng Gơnong dlông, mơ̆ng tơring čar, wơ̆t hăng tơlơi gir mơ̆ng tơring čar dong”.

Amăng bruă čuk pơkra hơmâo pơsit rơđah laih anŏ kiăng đĭ kyar čơkă tuai hyu ngui jing sa amăng hơdôm bruă bơwih ƀong akŏ phun mơ̆ng tơring Dak Lăk. Sit hnun yơh, amăng mông dưm dăp, prăp rơmet čuk pơkra, Gơnong bruă gru grua, bơkjăp drơi jăn hăng tuai čuă ngui ngă hrŏm kjăp biă hăng hơdôm anih pơtô brơi, amăng anun gơñăm kơ bruă čuk pơkra đĭ kyar anih čuă ngui amăng tơring čar. Ơi Trần Hồng Tiến, Khua gơnong bruă gru grua, bơkjăp drơi jăn hăng tuai čuă ngui tơring čar Dak Lăk brơi thâo, lu anih čuă ngui akŏ phun hơmâo pơjing rơđah rơđông, mơ̆ng anih hyu čuă ngui kual tong wing Xuân Đài, dap kơdư Xuân Hòa truh pơ đang glai dêh čar Yok Đôn, dơnao ia Lăk, hơdôm kual anih anom, čroh hnoh, glai klô, čuă ngui amăng plơi pla, čuă lăng đang hmua hăng plơi pơkra gơnam: “Tơdơi kơ hơmâo Khua dêh čar pơsit bruă prăp rơmet čuk pơkra tơring čar, gơmơi amra lăi pơthâo, pơčrâo brơi ba pơmut amăng kơčăo bruă đĭ kyar čơkă tuai hyu ngui laih anun pok pơhai akŏ bruă čuk pơkra djơ̆ jơlan gah”.

Tui hăng ơi Đỗ Thái Phong, Kơ-iăng khua Jơnum min pơ ala mơnuih ƀôn sang tơring čar Dak Lăk, tơlơi yom hloh amăng tal pơplih anai lĕ pơjing rai anih đĭ kyar prong hloh, pơtruh nao rai rim kual gah Ngŏ hăng gah Yŭ. Amăng anun, gah Ngŏ amra  đĭ kyar boh thâo măi mok, tuh tia pơkra gơnam, bơwih ƀong gah ia rơsĭ hăng čuă ngui ƀơi ia rơsĭ; bơ gah Yŭ pơƀut ngă hmua mă yua boh thâo phrâo, pơkra gơnam klă hloh, apui lơtrik phrâo. Anai jing dua mơta bruă pơhrua nao rai đah mơ̆ng akŏ pơjing rơnoh yom bơwih ƀong huă phrâo mơ̆ng Dak Lăk: “Pơplih bruă čuk pơkra tal anai jing tơlơi phiăn laih anun phun tơhnal yom biă mă. Djŏp jơlan đĭ kyar bơwih ƀong huă - mơnuih mơnam, pơgang lŏn ia - rơnuk rơnua mơ̆ng tơring čar pơ anăp leng kơ kiăo tui bruă čuk pơkra mơ̆ng tơring čar”.

Tui hăng tơlơi jŭ yap amăng bruă čuk pơkra, pơkă hơnong, mơ̆ng anai truh thun 2030, Dak Lăk kiăng pơhrui hơmâo 676.000 klai prăk tuh pơ alin mơ̆ng abih bang mơnuih tơpuôl đah mơ̆ng pok pơhai man pơdong jơlan nao rai, logistics, tơdrun kom păn, tơdron rơdêh por, kual sang măi pơkra gơnam, kual bơwih ƀong hăng anih anom bơwih brơi prong. Anai ăt jing thun blan tơring čar Dak Lăk pơƀut pơsir hĭ anŏ kơđông kơ anih anom, jơlan nao rai, pơtruh nao rai kual hăng anih đĭ kyar đah mơ̆ng pơjing phun atur đĭ kyar sui pơ anăp.

Bruă čuk pơkra tơring čar Dak Lăk ƀu kơnong pok rai anih đĭ kyar phrâo đôč ôh, ăt pơƀuh pran jua kơtưn, hrưn đĭ kơtang biă mơ̆ng tơring čar amăng thun blan đĭ kyar phrâo. Lăng nao sui pơ anăp, pơplih tơlơi pơmin hăng gir ngă bruă, Dak Lăk glăk akŏ pơjing phun atur kjăp phik đah mơ̆ng hrŏm hăng dêh čar ta mut amăng rơnuk hrưn đĭ mơ̆ng djuai ania./.