Ƀơi ring bruă man pơdong  ƀut sang măi pơkra ming gơnam sĭ mơdrô Hòa Tâm hăng Tơdrun kompan Bãi Gốc, mông mă bruă ƀuh dik dăk hmar biă mă. Hơdôm hơpluh boh rơdêh čuk, rơdêh kuăi lŏn hăng lu gơnam yua mă bruă čuk pơdăo jơlan hăng anih man pơdong. Lăng nao kơ bruă ngă anai, hơmâo boh tơhnal mơ̆ng bruă pơklaih ala lŏn, tañ jao glăi čuk pơkra pioh man pơdong. Tui hăng khua mua wai lăng kơčăo bruă ƀut bơwih ƀong Phú Yên, tơdơi kơ pơphun tal ngă bruă tañ, hmar hloh anun amăng 45 hrơi mlam, kơčăo bruă dŏ glăi amăng đơ đam aka giong, hơpluh hektar lŏn ƀơi ƀut tuh tia pơkra ming Hòa Tâm hơmâo ngă giong, amăng abih bang đơ đam apah yua 215 hektar.

Ƀơi đơ đam lŏn glăi, hơdôm hơpluh hektar hlăk čuk pơdăo laih anun jao glăi kơ pô apah tuh pơ alin man pơdong. Kơnong ƀơi tơdrun kompan Bãi Gốc, abih bang 64,9 hektar lŏn hăng dưi jao glăi, ngă gêh găl brơi bruă man pơdong hơdôm črăn bruă phun yom bơwih brơi man pơdong prong hloh kơñ pơgi, khom ngă giong amăng blan 9 pơ anăp. Ơi Đỗ Văn Khánh, Kơ-iăng khua kông ty pơčruh ngăn tuh pơ alin hăng pơđĭ kyar atur man pơdong Ƀut sang măi Hoà Tâm lăi pơtong:

“Ơi Khua jơnum min ăt kah hăng ƀing khua mua tơring čar hơmâo akŏ pơjing khul mă bruă sem lăng hmar kiăng pơtrut bruă pơklaih ala lŏn khom ngă khut khăt tañ hmar biă mă. Khua mua wai lăng gah anom bruă Hòa Phát ăt ƀuăn akŏ blan 9 pơ anăp amra pok pơhai, pơhlom djơ̆ anŏ gêh găl gah tơlơi phiăn pơkă hăng anih piho kơ khua mua sang bruă tuh pơ alin ngă tui”.

Ƀu kơnong ƀơi Hoà Tâm, bruă ngă pơtrut hmar amăng pơklaih ala lŏn čuk pơdăo hlăk ngă tui hmar hăng tañ biă mă ƀơi lu anih pơkŏn. Ƀơi kual dơnao ia Ƀuôn Biếp, gah kơčăo bruă pơkong ia Yên Ngựa, să Liên Sơn, djop grup mă bruă krăp lăng tong ten, hơdai gum hrŏm brơi jŭ yap rim črăn bruă, hơdră duh glăi kiăng tañ ngă hră pơar. Truh ră anai, rơbêh 8,34 hektar lŏn mơ̆ng 31 boh sang anŏ mơnuih ƀôn sang hơmâo pơsit rơnoh duh glăi abih tih 10 klai 600 klăk prăk; tal 1, tal 2 ăt hlăk ngă giong hră pơar, jŭ yap glăi, kiăng gir run khom ngă giong amăng blan 8 anai, jao glăi ala lŏn pioh čuk pơdăo. Ơi Nguyễn Anh Tú, Khua jơnum min mơnuih ƀôn sang să Liên Sơn kah pơpha:

“Ră anai, hơmâo akŏ pơjing lu grup hyu pơtô lăi hăng mơnuih ƀôn sang. Khua mua anom bruă wai lăng tơlơi bơwih ƀong huă ngă hrŏm anom bruă wai lăng lŏn mơnai ƀơi să mơ̆ng khul anăn Khul wai lăng Ea Kar hlăk jŭ yap glăi laih anun hlong ngă bruă mơtam”.

Mah lu kơčăo bruă hơmâo pơblih laih, pơklaih ala lŏn giong samơ̆ ăt dŏ đôč anih kơđông prong amăng bruă tuh pơ alin prăk kơ bruă čar. Tui hăng khul khua mua wai lăng Kơčăo bruă tuh pơ alin kơ bruă čar, ring bruă jơlan glông hăng bruă ngă hmua pơđĭ kyar plơi pla tơring čar Dak Lak, anom bruă anai wai lăng 35 kơčăo bruă, amăng anun 17 kơčăo bruă ăt dŏ gun hăng hlăk ming pơkra glăi. Kơnong kơ bruă duh glăi ƀơi 19 boh să, bơbeč djơ̆ hrơi blan mă bruă hăng ba yua prăk tuh pơ alin. Ơi Trần Tiến Đông, Khua wai lăng gah kơčăo bruă tuh pơ alin ring bruă jơlan glông hăng Ngă hmua pơđĭ kyar plơi pla tơring čar Dak Lak brơi tâo:

“Hơdôm kơčăo bruă dŏ gun aka ƀu mă yua prăk tuh pơ alin yua đôm kơ bruă pơklaih ala lŏn đôč. Dŏ glăi hơdôm anih duh glăi lŏn giong laih hlăk git gai pơčrâo bruă čuk pơdăo hmar hloh, pioh man pơdong, mơneč mă hrơi blan adai gêh găl mă bruă hrơi hăng mlam, pơtrut ngă bruă hmar hloh kiăng tañ giong”.

Truh kơnôl 10/7/2026, tơring čar Dak Lak hơmâo mă yua prăk tuh pơ alin 2.921 klai prăk, dưi ngă 30% akŏ bruă jao. Kiăng dưi ngă giong tơhnal pơkă pơđĭ kyar dua mrô, jơnum min mơnuih ƀôn sang tơring čar pơtrun hiăp djop anom bruă, plơi pla hăng pơsir hĭ tơlơi gun pơkă hnơ̆ng man pơdong, bruă lŏn mơnai, ngă hră pơar tuh pơ alin, pơgang ayuh hyiăng hăng gơnam yua man pơdong; jŭ yap glăi tong ten, pơsir giong abih 396 kơčăo bruă dŏ kaih; khom ngă tui djơ̆ “jơlan mơtah” kiăng ngă hmar brơi ba yua prăk kơ bruă čar hăng Bruă pơtrut ngă 45 hrơi mlam pơklaih ala lŏn hăng pơđĭ tui tơlơi gơgrong ba mơ̆ng 5 grup ngă bruă kiăng pơsir abih tơlơi tơnap tap rim kơčăo bruă, rim anih man pơdong. Tơhnal pơkă truh bơyan tal klâo, klâo blan tal III khom ba yua boh ƀiă ñu 67% rơnoh prăk tuh pơ alin, truh abih thun klâo blan tal IV ngă djop 92% hăng djop 100% hlâo kơ kơnôl 31/1/2027. Ơi Đỗ Hữu Huy, Khua Jơnum min mơnuih ƀôn sang tơring čar Dak Lak lăi pơtong:

“Jŭ yap glăi abih akŏ bruă pok pơhai 6 blan či rơnuč thun, pơtong rơđah rim bruă glăm ba phun amăng blan 7, blan 8 hăng klâo blan tal III; pơtum pơsir hĭ khom giong hơdôm anŏ kơđông hlăk ngă gun hĭ rơnoh pơđĭ kyar hăng rơnoh pơhrui glăi. Rim čô khua git gai khom nao truh pơ plơi pla, anih pơphun bruă, kiăng ĕp lăng, ngă bruă hăng sang bruă mơdrô, ƀing tuh pơ alin, hăng mơnuih ƀôn sang kiăng pơsir tơlơi tơnap tap; pran jua kiăng lĕ jao bruă khom kiăo tui truh kih, ƀuăn laih khom ngă, ngă khom hơmâo boh tơhnal”.

Mơ̆ng tơlơi pơblih kơtang anun djop ring bruă truh pơ bruă ngă khut khăt, pơčrâo trun, pơpha bruă, Dak Lak hlăk ngă pơhluh tui ƀơƀrư̆ anŏ ngă kơđông amăng bruă pơklaih ala lŏn, pơtrut hmar ba yua rơnoh prăk tuh pơ alin kơ bruă čar. Lơ̆m kơčăo bruă phun dưi lăng anŏ pơtrut hmar hăng rơnoh prăk mă yua dưi djru pơtrut tơlơi bơwih ƀong huă amra jing pran kơtang ba tơring čar ngă tui djop tơhnal pơkă pơđĭ kyar dua mrô amăng thun 2026.