Amăng mông mă bruă, Jơnum min mơnuih ƀôn sang tơring čar Dak Lak hơmâo lăi nao 18 mơta bruă ngă tơnap tap, gun găn amăng wai lăng kơnuk kơna kơ rơhuông adai lŏn mơnai. Amăng anun, tơlơi gun hloh lĕ wai lăng lŏn mơnai mơng phun lĕ lŏn pla đang glai. Anih djă pioh hră pơ-ar kơ lŏn đang glai aka ƀu pơgiong, aka ƀu mut hrŏm hăng hơdôm anih djă pioh hră pơ-ar lŏn mơnai. Lu hloh lŏn mơnai mơng lŏn ngă hmua, pla đang glai jao glăi pơ ƀon lan ră anai aka ƀu djơ̆ Jơnum min mơnuih ƀôn sang gưl să wai lăng, aka ƀu hơmâo wai lăng sit nik, lu kual lŏn arăng sua mă ngă hmua. Mơng anun, ngă tơnap tap brơi kơ ƀon lan amăng bruă mă yua lŏn mơnai tui tơlơi pơkă. Jơnum min mơnuih ƀôn sang tơring čar Dak Lak hơmâo hơdră wai lăng abih bang, mă yua lŏn mơnai mơng phun lĕ lŏn pla đang glai hơmâo  lăi pơthâo Ding jum wai lăng rơhuông adai lŏn mơnai hăng hơdôm anom bruă gah gơnong glông samơ̆ truh ră anai aka ƀu dưi sem lăng, git gai. Ơi Nguyễn Thiên Văn, Kơ-iăng khua Jơnum min mơnuih ƀôn sang tơring čar Dak Lak lăi nao tơlơi sit nik ră anai:

“Bruă bơrơsua, ƀom kiơng bơdjơ̆ nao lŏn mơnai ƀơi hơdôm akŏ bruă ngă hmua, pla đang glai hăng hơdôm boh kông ti ngă hmua, pla đang glai amăng ƀon lan ăt dŏ tơnap tap. Bruă pơsir hĭ bơrơsua, ƀom kiơng bơdjơ̆ nao lŏn mơnai hăng pơhrui glăi lŏn glai arăng sua mă ăt dŏ bưp tơnap tap, aka ƀu hơmâo hơdră tong ten kiăng pơsir hĭ khut khăt”.

Hrŏm hăng tơlơi tơnap tap, gun găn bơdjơ̆ nao wai lăng lŏn ngă hmua, pla đang glai, Jơnum min mơnuih ƀôn sang tơring čar Dak Lak ăt lăi nao lu bruă kiăng Ding jum wai lăng rơhuông adai lŏn mơnai hrŏm hăng hơdôm anom bruă gah gơnong glông sem lăng, pơsir hĭ. Sit biă ñu lĕ lơm tơlơi phiăn lŏn mơnai thun 2024 dưi mă yua, bruă ngă tui hơdôm tơlơi pơkă amăng tơlơi phiăn lŏn mơnai thun 2013 hăng hơdôm hră pơ-ar tui tơlơi phiăn dŏ sa, dua črăn aka ƀu djơ̆, ngă gun găn, kiăng sem lăng, črâo ba, pơplih pơkra. Tơlơi pơkă amăng mă yua lŏn mơnai mơng tơring čar Dak Lak truh thun 2025 hơmâo Khua dêh čar pơhrua amăng tơlơi pơtrun mrô 326 thun 2022 djơ̆ hăng tơlơi rơkâo sit nik. Tơlơi phiăn čuah lŏn hăng hơdăng pơtâo hăng hơdôm hră pơ-ar črâo ba bơdjơ̆ nao hơdôm pok hră pơ-ar brơi mă čuah hơdăng dŏ tơnap tap, sui hrơi, aka ƀu lăp djơ̆ hăng bruă mă čuah pơtâo kiăng yua man pơdong, sit biă ñu mă lŏn kiăng dor hluh…

Đĭ pơhiăp pơđut mông mă bruă, Khua ding jum wai lăng rơhuông adai lŏn mơnai ơi Đặng Quốc Khánh brơi thâo, grup hyu mă bruă mơng ding jum hơmâo mông mă bruă hăng hơdôm boh tơring čar kiăng pơsir hĭ tơnap tap, gun găn brơi kơ ƀon lan. Laih dong, mă tơlơi pơgôp hiăp mơng djop ƀon lan kiăng tañ pơjing, pơgiong tơlơi pơtrun ba tơlơi phiăn lŏn mơnai thun 2024 mut amăng tơlơi hơdip mơda. Anai lĕ tơlơi phiăn yôm phăn biă mă amăng tơlơi hơdip mơda. Amăng anun, Khua ding jum pơtă tơring čar Dak Lak kiăng gơgrong pok pơhai tañ, pơsit nua lŏn, anih djă pioh hră pơ-ar kiăng lơm tơlơi phiăn dưi tŭ yap amra mă yua mơtăm. Laih dong, tơring čar kiăng đing nao pơsir hĭ hơdôm anŏ aka ƀu klă mơ̆ gơnong bruă wai lăng rơhuông adai lŏn mơnai dưi ngă mơtăm, anun lĕ brơi hră pơ-ar bơdjơ̆ nao tơlơi dưi mă yua lŏn mơnai brơi mơnuih ƀôn sang hơmâo lŏn dŏ hơđong, huăi bơrơsua, huăi ngă soh hăng tơlơi phiăn.

Kơnong hăng bruă ngă hang tơngia hloh anun lĕ lŏn ngă hmua, pla đang glai, Khua ding jum Đặng Quốc Khánh rơkâo tơring čar Dak Lak kiăng pel ĕp glăi djop mơta hăng pơčlah kiăng lơm tơlơi phiăn lŏn mơnai thun 2024 dưi mă yua, dưi pơsir hĭ hơdôm tơlơi bơdjơ̆ nao. Khua ding jum lăi pơtong, bruă pơhlôm bơkơnar tơlơi dưi kơ mơnuih ƀôn sang hăng anom bơwih ƀong sĭ mơdrô bơdjơ̆ nao lŏn ngă hmua, lŏn pla đang glai:

“Rơkâo Jơnum min mơnuih ƀôn sang tơring čar, Khul apăn bruă Ping gah tơring čar git gai pel ĕp đơ đam lŏn ngă hmua, pla đang glai. Hlâo adih pơmut lŏn mơnuih ƀôn sang amăng kual lŏn glai, ră anai jing ngă pơmut hrŏm kơplah mơnuih ƀôn sang hăng anom wai lăng đang glai, kông ti ngă bơrơsua nao rai. Yua anun, lơm pơmut hrŏm, tơdah pơplih mă yua lŏn ƀu sem lăng tong ten, ƀu hơmâo hră kač, ƀu thâo prong hơdôm ƀơ̆i amra ƀuh bơrơsua mơtăm. Kâo rơkâo pel ĕp hăng pơčlah hĭ. Ƀing kông ñơn ăt lĕ mơnuih ƀôn sang, ƀing gơñu mă bruă ƀơi anun hơdôm pluh thun laih, yua hơget ngă ƀing gơñu tơnap tap. Ƀing ta kiăng pơhlôm bơkơnar tơlơi dưi wŏt mơnuih ƀôn sang, anom bơwih ƀong sĭ mơdrô hăng tui gru grua hơđăp. Tơlơi phiăn dưi mă yua, lŏn mơng anom bruă lăng đang glai samơ̆ mơnuih ƀôn sang bơwih ƀong mơng thun 2004 laih, wŏt lŏn ngă hmua, lŏn dŏ amra jao glăi mơnuih ƀôn sang. Bơ đơ đam lŏn bơrơsua kiăng sem lăng yua mơng đưm hlâo hiưm ñu. Hơget djơ̆ tơlơi phiăn ƀing ta kiăng ngă hlâo”.

Ding jum wai lăng rơhuông adai lŏn mơnai ăt rơkâo tơring čar Dak Lak kơtưn amăng bruă wai lăng gah kơnuk kơna kơ čuah pơtâo, ia yua, pơagaih asuk ruk, ia ƀâo brŭ; mơnuih apăn bruă mơng gơnong bruă wai lăng rơhuông adai lŏn mơnai lơm nao pơ anai amra pơpha gưl truh pơ 70% bruă mă mơng Ding jum truh pơ tơring čar. Khua ding jum ăt rơkâo tơring čar Dak Lak đing nao bruă pơgang apui ƀong glai amăng bơyan không phang anai, him lăng amra ƀuh ayuh hyiăng pơ-iă kơtang amăng thun anai./.