7 blan laih rơgao, mrô pơkra măi mok ia rơgơi mơ̆ng Dak Lăk đĭ giăm 14% pơhmu hăng tơđar; amăng anun boh thâo măi pơkra pơjing gơnam đĭ giăm 15%, pơkra hăng ba hyu apui lơtrik đĭ rơbêh 12%. Kiăng pơgôp amăng rơnoh đĭ kyar bơwih ƀong mơ̆ng 10% pơ ngŏ, Dak Lăk kiăng hơmâo rơnoh pơkra gơnam măi mok 5 blan rơnuč thun đĭ giăm 20%.

Khua jơnum min mơnuih ƀôn sang tơring čar Dak Lăk ơi Đỗ Hữu Huy brơi thâo, tơring čar pơƀut pơkra gơnam ƀơi sang măi glăk hơmâo, pơklaih brơi hră pơ-ar ngă tơnap đah mơ̆ng ba hơdôm kơčăo bruă phrâo dưi mă bruă amăng thun anai, laih dong, pơtrut pơkra gơnam dlăm, hăng pơhưč boh thâo ia rơgơi yom, măi mok djru ană  mơnuih mă bruă pơlir hăng logistics: “Ƀing gơmơi pơtrut tañ bruă ba hơdôm kơčăo bruă pơkra măi mok phrâo dưi mă bruă hlao amăng thun 2026. Pơplih kơtang jing pơkra gơnam klă hloh, tong ten hloh, pơđĭ tui anŏ yom mơ̆ng sa mơta gơnam pơkra rai, ăt kah hăng pơjing anăn hmư̆ hing gơnam mơ̆ng hmua; pơhưč, ruah mă hơdôm boh thâo ia rơgơi yom, măi mok djru ngă bruă, giong anun bơwih ƀong pơdar nao rai pơlir hăng logistics. Ƀing gơmơi amra pơhlom rơnuk rơnua apui yua, ngă hrŏm kjăp kiăng ba yua apui lơtrik phrâo mơ̆ng kơčăo bruă anai, huăi bơdjơ̆ nao lŏn glai ôh”.

Kơ apui yua, tơring čar Dak Lăk tŭ ư laih jơlan hơdră tuh pơ alin 19 kơčăo bruă hăng jua pơđuăi rơbêh 1.217MW; 4 sang măi apui lơtrik pơkĕ jua angin, dưi pơđuăi apui 200 MW hơmâo mă yua laih. Dak Lăk rơkâo kơ Ding jum pơkra gơnam hăng sĭ mơdrô djru pơđĭ tui mrô rơnoh apui lơtrik phrâo amăng Hơnong pơkă apui lơtrik VIII pơplih glăi, pơđĭ tui apui pơkĕ jua angin pơ ia rơsĭ hăng pơtrut tañ tuh pơ alin hrĕ dăng apui.

Kơ-iăng khua Ding jum pơkra gơnam sĭ mơdrô Trương Thanh Hoài pơsit, Dak Lăk gêh găl prong biă gah apui lơtrik, gơnam mơ̆ng hmua samơ̆ kiăng sa hơdră đĭ kyar phrâo, pơtruh kual Yŭ hăng kual Ngŏ; amăng anun gah Yŭ đĭ kyar boh thâo pơkra gơnam, bơ gah Ngŏ pơƀut pơkra kleng kleh, tơmla măi mok hăng blơi sĭ apui lơtrik: “Kual gah Ngŏ jing anih yua apui lu biă mă, samơ̆ gah Yŭ jing anih pơkra rai apui lu. Anun ta kiăng jŭ yap glăi hiưm thơ pơplih hơdôm anih pơkra gơnam măi mok pơprong gah Ngŏ či mă yua ha bơnah apui lơtrik mơ̆ng kual Yŭ. Bruă anai kiăng hơmâo jơlan gah ngă bruă, hơmâo anih đĭ kyar phrâo. Kâo pơmin tơring čar khŏm sem lăng pơtô brơi jơlan ngă bruă mơ̆ng anai truh thun 2030, lăng nao truh pơ thun 2035-2045”.

Kơ-iăng khua ding jum ăt kiăng Dak Lăk pơplih ngă amuñ ƀiă hră pơ-ar tuh pơ alin, biă ñu bruă pơkra apui lơtrik; laih dong pơtrut tañ ring bruă dăng apui, ba hyu apui yua. Ding jum pơkra gơnam sĭ mơdrô amra pơthâo brơi Kơnuk kơna kiăng abih bang mơnuih gum ngă, tuh pơ alin tui BOT hăng glông pơđuăi apui đah mơ̆ng hơmâo thim prăk gah rơngiao prăk kơnuk kơna brơi nao./.