Thun anai, Dak Lak hơmâo rơbêh 21.100 čô čơđai čih anăn nao pơplông, amăng anun hơmâo rơbêh 610 čô mơng gah rơngiao. Tơring čar Dak Lak tŏ tui prap lui 32 boh sang hră pơplông sit nik hăng 886 anih amăng 15 boh tơring glông, plơi prong. Truh ră anai, Jơnum min mơnuih ƀon sang tơring čar Dak Lak hơmâo akŏ pơjing Khul git gai gưl tơring čarhăng git gai djop ƀon lan akŏ pơjing khul git gai gưl tơring glông, plơi prong; pơgiong bruă dưm dăp, pel ĕp, pơplih pơkra hră pơ-ar brơi ƀing čơđai djơ̆ hăng tơlơi pơkă; prap lui djop tơlơi gal mơng gơnam tam măi mok, mơnuih djru brơi tal pơplông …Yă H’Yim Kđoh - Kơ-iăng khua Jơnum min mơnuih ƀon sang tơring čar Dak Lak, Khua khul git gai gưl tơring čar rơkâo, djop gưl, gơnong bruă, ƀon lan kiăng kơtưn amăng bruă gum hrŏm, gơgrong pơjing jơlan hơdră tong ten, sit nik, pơhlôm brơi tal pơplông rơnuk rơnua, tŭ yua, hơđong, djơ̆ tơlơi pơkă. Đing nao ƀiă dong kơ bruă pôr pơhing, pơtô pơblang brơi kơ tal pơplông.

“Pơhlôm brơi djop hmao tlôn, tơlơi pơhing lăp djơ̆ tui hơdôm tơlơi pơkă kiăng hloh bơdjơ̆ nao tal pơplông. Sit biă ñu, kiăng đing nao ƀing čơđai kual ataih asuek, kual tơnap tap kiăng dưi thâo djop tơlơi pơhing mơng anun amra hơmâo hơdră gum djru kiăng ƀing čơđai thâo djop tơlơi pơhing, tañ prap lui klă hloh tal pơplông anai”.

Thun hrăm 2022-2023 tơring čar Dak Lak pơđut hĭ laih. Anai ăt lĕ hrơi mông abih bang čơđai anih 9 ruah tơlơi hrăm tui ƀing gơñu hor. Pơplông mut hrăm anih 10 ƀơi hơdôm boh sang hră, nô̆p hră pơ-ar tui hơdră pơplông mut hrăm ƀudah ruah hrăm bruă lĕ tơlơi yôm kiăng đing nao. Gơnong bruă pơtô pơjuăt Dak Lak ăt glăk gir run amăng bruă pơmut ƀing čơđai hrăm anih 10 hăng pơčlah črâo ba tơdơi kơ hrăm giong gưl II.

Sang hră gưl tlâo Nguyễn Du, plơi prong Buôn Ma Thuột lĕ sa amăng hơdôm boh sang hră hơmâo lu čơđai ruah pơplông mut hrăm. Tui tơlơi pơkă, thun hrăm 2023-2024, sang hră amra pơmut 405 čô čơđai hrăm anih 10, hơmâo 9 anih hrăm lĕ ƀing rơgơi hăng 2 anih hrăm pơkŏn. Hrơi mông tŭ mă hră pơ-ar mơng lơ 25-31/5. Ơi Nguyễn Đăng Bồng - Khua sang hră gưl tlâo Nguyễn Du, tơring čar Dak Lak brơi thâo:

“Ƀing čơđai amra găn rơgao 2 tal sem lăng, tal 1 lĕ pel ĕp hră pơ-ar, ƀing čơđai kiăng pơhlôm brơi 2 tơlơi gal: 1 lĕ mrô puang hăng pran gir kơtir amăng 4 thun hrăm mơng khá pơ glông hăng dua lĕ pơplông abih gưl II ƀing čơđai pơhlôm mơng khá pơ glông. Lơ̆m ƀing čơđai hơmâo 2 tơlơi dưi anai ƀing gơñu amra mut nao rơwang tal 2 pơplông 4 tơlơi hrăm: Toán, Ngữ Văn, Ngọai ngữ hăng 1 tơlơi hrăm tui gơñu ruah”.

Ăt tui hơdră pơmut čơđai hrăm anih 10 thun 2023-2024 mơng tơring čar Dak Lak, hrŏm hăng sang hră gưl tlâo Nguyễn Du, djop sang hră kơnuk kơna čem rông ba čơđai djuai ania ƀiă N’Trang Lơng hăng sang hră Đam San ăt amra ngă tui hơdră pơplông mut hrăm. Djop sang hră gưl tlâo kơnuk kơna pơdong pơkŏn amra pơmut tui puang hrăm abih gưl dua. Bơ hơdôm boh sang hră gưl tlâo, sang hră gưl tlâo hơmâo lu gưl hrăm amra pơmut čơđai phara hluai tui akŏ bruă pơmut hrăm mơng Jơnum min mơnuih ƀon sang tơring čar.

Hăng ƀing čơđai tơdơi kơ pơplông abih gưl dua ƀu pơhlôm puang mut hrăm hơdôm sang hră gưl tlâo, ăt amra dưi ruah hơdôm sang hră pơtô rĭse, sang hră pơtô bruă mă amăng tơring čar, tơlơi anai pơhlôm brơi djơ̆ tơlơi kiăng hrăm bruă pơlir hăng hrăm abih gưl tlâo. Ơi Đỗ Tường Hiệp, Kơ-iăng khua gơnong bruă pơtô pơjuăt Dak Lak brơi thâo: Bruă pơčlah čơđai tơdơi kơ pơplông abih gưl dua ƀơi Dak Lak lĕ lu biă mă, dưm dưm 80% amăng abih tih čơđai hrăm anih 9.

“Hăng ƀing čơđai ƀu pơhlôm djơ̆ tơlơi gal mut hrăm hơdôm boh sang hră gưl tlâo, ƀing gơñu amra črâo brơi kiăo tui hrăm hơdôm boh sang hră pơtô bruă mă, sang hră trung cấp, cao đẳng hăng pơhlôm brơi hrăm abih gưl tlâo. Yua anun bruă črâo brơi hrăm bruă mơng sang hră hơmâo pơtrut kơtang kiăng črâo brơi ƀing čơđai yak nao amăng tơlơi hơdip hăng hrăm hră, ƀu djơ̆ kơnong sang hră gưl tlâo đôč ôh mơ̆ hăng lu anih kiăo tui hră amra pơhlôm brơi tơlơi hơdip, bruă mă pơgi kơdih anai”.

Amăng hơdôm thun laih rơgao, djop sang hră gưl tlâo hăng anih pơtô bruă mă, sang hră pơtô hrăm rĭse ƀơi Dak Lak gum hrŏm kjăp amăng bruă pơtô hrăm bruă mă brơi ƀing čơđai. Rĭm thun hơmâo giăm 3.000 čô čơđai hơmâo pơtô brơi, 30.000 truh 35.000 čô hơmâo črâo brơi bruă mă, hyu hrăm bruă lăp djơ̆ hăng tơlơi hor mơng ƀing gơñu hăng tơlơi kiăng mơng anih anom mă bruă. Jơlan hơdră hrăm abih gưl tlâo pơlir hăng pơtô bruă mă ƀơi hơdôm sang bruă pơtô bruă mă, sang bruă pơtô rĭse hơmâo pok pơhai, pơgôp prong prin amăng bruă črâo brơi anih hrăm tơdơi kơ hrăm abih gưl dua tui akŏ bruă “Pơtô hrăm brơi bruă mă hăng jơlan hơdră pơčlah brơi lăp djơ̆ amăng pơtô hrăm rơwang thun 2018-2025”.