4 čô mơnuih soh anun lĕ : Lâm Văn Đạo, Vũ Duy Tư, Nguyễn Văn Quynh hăng Nguyễn Văn Hảo yua tơlơi soh ngă soh glăi tơlơi pơkă pơhlôm hơdjă mơnong ƀong huă sĭ mơdrô. Hlâo kơ anun, tơhan pơlih ĕp lăng gah tơlơi bơwih ƀong huă mơ̆ng sang bruă tơhan kông an tơring čar hơmâo nao ĕp lăng ƀơi 6 boh sang bruă pơkra ming mơnong ƀong huă pio sĭ mơdrô, gơñu pơkra rai rơtă čăo (čăt) pioh ƀong mơtah ba sĭ mơdrô ƀơi plơi prong Ƀuôn Ma Thuột hăng ƀuh 4 čô mơnuih anai hlăk dŏ tuh ia jrao pơkra rai rơtă čăo hăng djuai ia jrao sat, ngă bơbeč kơtang kơ mơnuih ƀong djơ̆ rơtă čăo anun.

Anai lĕ djuai ia jrao arăng kom yua amăng bruă pơkra ming mơnong ƀong huă sĭ mơdrô ƀơi Việt Nam. Ƀơi sang bruă kông an, ƀing ngă soh anai hơmâo pơhaih lĕ, gơñu ba sĭ laih amăng thun 2024 truh kơ 2.900 tơn rơtă čăo tram ia jrao kom anai, lơ̆m sa hrơi gơñu sĭ mơ̆ng 8 tơn truh 10 tơn arăng blơi ƀong.