Lăng tui na nao hơdôm tơlơi pơhing bơdjơ̆ nao hơdră pơtrun pơmut hăng ruah mă hlôm rơbô̆t jơlan gah bruă mă, mơnuih ping gah Nguyễn Văn Lập, ƀơi să Hoà Thắng, plơi prong Buôn Ma Thuột lăng ƀuh anai sit nik jing bruă ngă hơkrŭ. Drơi pô ñu hăng lu mơnuih ƀôn sang đăo kơnang lĕ, tơlơi pơplih anai amra pok tơbiă pơgi kơdih pơđĭ kyar kơ lŏn ia.

“Tơhnal pơkă hăng bruă pơđĭ kyar bơwih ƀong amra pok prong hloh, ngă gal brơi pioh pơtrut hơdôm tơlơi pơmin phrâo, mơnuih ƀôn sang tô nao rai prong hloh, bơkơtuai lu  hloh, hăng sit ñu tơlơi hơdip tâ̆o yâo ăt amra lu mơta, pơhrôh hloh mơn”.

Hăng yă Ngô Thị Minh Trinh, Kơ-iăng Khua git gai Ping gah tơring glông Krông Pač, tơring čar Dak Lak, bruă pơđut bruă mơ̆ng jơlan gah mă bruă čar gưl tơring glông, ñu hăng mơnuih apăn bruă, mơnuih mă bruă čar ha gưl amra bơdjơ̆ nao lu biă. Khă hnun hai, bruă ruah mă hlôm, rơbô̆t jơlan mă bruă jing tơlơi kiăng hloh, hmâo yua kơ bruă mă hrŏm anun rim mơnuih apăn bruă, mơnuih ping gah ƀơi tơring glông leng kơ thâo rơđah bruă gơgrong mơ̆ng pô.

“Rơwang blung a sit ñu hmâo tơlơi sư̆ rơbư̆, bơngot lĕ tơlơi ƀu tlaih ôh. Samơ̆ hluai tui bruă lăi pơhing, lăi pơthâo nao rai, lăi pơthâo abih lĕ, mơnuih apăn bruă, mơnuih ping gah hăng mơnuih mă bruă čar thâo rơđah tơhnal yôm phăn mơ̆ng hơdră pơtrun, mơ̆ng anun ha pran jua ngă tui yua kơ tơlơi pơđĭ kyar hrŏm mơ̆ng lŏn ia”.

Tui hăng jơlan gah pơmut hrŏm gưl să hmâo pel ĕp amăng mông Jơnum tal 11 Grŭp mă bruă Ping gah dêh čar ta tal 13, mrô plơi pla gưl să amra hrŏ trun năng ai ñu 70%, anun lĕ amra hmâo bruă 3 bôh să pơmut hrŏm jing sa bôh să. Ƀing apăn bruă mơnuih ping gah ƀơi Dak Lak leng kơ pơsit, lơm mă bruă amra ƀu bĕ hơdôm tơlơi tơnap blung a tơdơi kơ pơmut hrŏm, mơ̆ng tơlơi juăt, rơwang nao rai truh kơ anih anom mă bruă phrâo. Khă hnun hai, pran jua ba jơlan hlâo hăng bruă gơgrong mơ̆ng mơnuih apăn bruă, mơnuih ping gah ƀơi anai hmâo pơjing laih pran đăo kơnang hăng tơlơi pok pơhai hơdră pơtrun kơjăp phik. Yă Cao Thị Thúy Nga, Khua git gai Ping gah să Tân Lập, tơring glông Krông Ƀuk, tơring čar Dak Lak, brơi thâo:

“Ƀing gơmơi kơtưn brơi nao mơnuih apăn bruă pơ̆ plơi pla, pioh ngă klă hloh hơdôm bruă djru mơnuih ƀôn sang - djơ̆ hăng pran jua ‘Mơnuih apăn bruă lĕ pô djru mơnuih ƀôn sang’. Khă amăng sa wot khom gơgrong lu bruă jao, samơ̆ hăng pran jua gơgrong prong, ƀing gơmơi pơsit na nao; dô̆ sa hrơi ngă mơnuih apăn bruă lĕ dô̆ abih pran jua yua kơ bruă mă hăng yua kơ mơnuih ƀôn sang”.

Ră anai, đơ đam tơring čar Dak Lak hmâo 180 bôh anom bruă čar gưl să (hmâo să, phường, tơring kual), tơdơi kơ dưm dăp pơkă hlâo kơnong kơ dô̆ 45 bôh anom – hrŏ trun năng ai ñu 75%. Tui hăng ơi Nguyễn Hoài Dương, Khua Grŭp pơtô bruă Ping gah hăng pơtô ba mơnuih ƀôn sang Ping gah tơring čar Dak Lak, bruă dưm dăp anai ƀu kơnong kơ djru ngă rơbô̆t glông jơlan mă bruă, hơdră dăp glăi mơnuih apăn bruă ôh mơ̆, dô̆ jing tơhnal pioh pơpha gưl, pơpha bruă apăn kơtang tit hloh kơ gưl să. Mơ̆ng anun, gong gai giăm mơnuih ƀôn sang hloh, djru mơnuih ƀôn sang gêh gal hăng ba glăi bôh tơhnal hloh.

"Hơdôm hrơi rơgao, hơdôm anih anom hăng hơdôm gơnong bruă hmâo amăng ƀrư̆ dưm dăp glăi bruă mă hăng truh ră anai djop bruă leng kơ glăk nao djơ̆ jơlan. Pơ̆ anăp anai, ƀing ta amra pơtrut kơtang bruă pơmut hrŏm tơring čar, lui lơi gưl tơring glông, pơmut hrŏm gưl să. Anai lĕ hơdră pơtrun ngă giong lăp djơ̆, pơmut hrŏm sit, djru pơsir hơdôm tơlơi tơnap ră anai hăng ngă tui ba glăi bôh tơhnal anô̆ gal mơ̆ng rim anih anom, djru pơđĭ kyar bơwih ƀong – mơnuih mơnam nao hrŏm hăng pơhlôm pơgang lŏn ia, rơnuk rơnua plơi pla kơjăp phik”.

Bruă pơmut hrŏm hơdôm anom bruă čar ƀơi Dak Lak ƀu kơnong kơ rơkâo amăng bruă pơplih phrâo đôč ôh mơ̆, ñu dô̆ pơdah pran pơsit bruă kơđi čar kơtang biă amăng bruă pơdŏng glông jơlan mă bruă čar rơbô̆t, ba glăi bôh tơhnal, djru mơnuih ƀôn sang klă hloh. Khă gah anăp dô̆ lu tơlơi lông, samơ̆ hăng tơlơi tŭ ư hrŏm dơlăm prong, pran jua gơgrong prong mơ̆ng mơnuih apăn bruă, mơnuih ping gah hăng tơlơi dŏng yua mơ̆ng mơnuih ƀôn sang, tơring čar Dak Lak glăk amăng ƀrư̆ ngă tui pơplih phrâo hơdră pơtrun mơ̆ng Ping gah, Kơnuk kơna hmâo akô̆ tlôn, khut khăt hăng bă kơ tơlơi đăo kơnang. Hơdôm tơlơi gir run hrơi anai amra lĕ phun akha kơjăp phik pioh Dak Lak yak mut amăng rơwang pơđĭ kyar phrâo - hur har, rơnuk anai hăng kơjăp phun hloh amăng pơgi kơdih./.