Dak Lăk glăk hơmâo năng ai 44.000 ha đang sâu riêng, amăng anun hơmâo rơbêh 33.000 ha mơboh laih, amăng thun 2026 pơhrui hơmâo năng ai 500.000 tơn. Anai jing sa amăng hơdôm gơnam mơ̆ng hmua nua yom, ba sĭ pơ tač rơngiao prong hloh mơ̆ng tơring čar, gum pơgôp đĭ kyar bơwih ƀong huă hăng prăk pơhrui mơ̆ng mơnuih ƀôn sang.

Khă hnun, hăng tơlơi pơkă jai hrơi tơnap mơ̆ng anih blơi, arăng kiăng thâo djŏp anih pla, pơkra, sem lăng hlăt kman, hăng anŏ hơdjă, bruă wai lăng mrô kual pla, mrô anih anung gơnam ƀơi hơdôm anih ăt aka ƀu rơđah mơn, amuñ ngă kơ arăng ƀu đăo kơnang dong tah laih anun ngă tơnap kơ bruă ba sĭ gơnam.

Khul khua apăn bruă phun ping gah tơring čar Dak Lăk kiăng Ping gah Jơnum min mơnuih ƀôn sang tơring anai git gai hơdôm gơnong bruă, djŏp tơring ječ ameč lăng glăi abih bang mrô anih pla, mrô anih anung gơnam pioh amăng kơthung hơmâo hră pơ-ar; kiăng tañ brơi hră kơ hơdôm kual dưi hơmâo djŏp tơlơi pơkă; khut bơtơhmal mơtăm bruă sĭ mơdrô, brơi apah yua jăng jai mrô anih pla, mrô anih anung gơnam, hăng hơdôm bruă leč pleč pơkŏn dong amăng hră pơ-ar ba sĭ pơ čar rơngiao.

Tơring čar Dak Lăk ăt hơmâo hơdră ngă hrŏm hăng anom bruă ngă hmua, tuh tia pơkra gơnam, kông an, anom bruă rô nao rai sĭ mơdrô hăng čar rơngiao, anom bruă jia, hăng gong gai đah mơ̆ng pơkă djơ̆ hrŏm djŏp tơlơi pơhing, wai lăng kjăp anih pơkra - blơi - ba sĭ pơ tač rơngiao; laih dong pơtrut mă yua boh thâo mrô, akŏ pơjing anih djă pioh hră pơ-ar, tơlơi pơhing bơwih brơi bruă wai lăng, pơhŭi hlâo hăng git gai.

Tui hăng ơi Lương Nguyễn Minh Triết, Ding kơna ping gah, Khua ping gah tơring čar Dak Lăk, lu tơlơi dŏ gun mơ̆ng bruă mơdrô sâu riêng ră anai bơdjơ̆ nao tơlơi phiăn, hơdră ngă bruă mơ̆ng Gơnong dlông, biă ñu bruă brơi mrô anih pla, mrô anih anung gơnam ba sĭ, thâo krăn anih pơkra rai gơnam hăng bruă sem lăng, pơčrang kman ƀơi phun pla. Tơring čar Dak Lăk hơmâo tum pơƀut abih bang tơlơi rơkâo đĭ giong anun lăi pơthâo pơ Gơnong dlông sem lăng, tañ pơsir brơi, hŭi ngă tơnap kơ bruă ba sĭ gơnam amăng thun anai: “Tơlơi rơkâo kơ bruă ngă pơgiong djŏp tơlơi pơkôl pơkă bơdjơ̆ nao anih pla, brơi mrô kual pla, mrô anih anung gơnam, laih anun pơtrut abih bang mơnuih gum sem lăng pơčrang kman, pơčrang anŏ hơdjă. Ră anai, Khul pla sâu riêng hăng anom bruă mơdrô sâu riêng glăk ƀu mơ-ak, hơmâo tơlơi bơngơ̆t kơtang biă kơ tơlơi anai. Jing tơlơi anai kơnang kơ tơlơi djru mơ̆ng Gơnong dlông, bơ tơring čar ăt thâo tui anun đôč mơn, samơ̆ ƀu dưi pok pơhai ngă bruă anai ôh”.

Hăng hơdôm tơlơi git gai mơ̆ng Ping gah tơring čar hrŏm hăng tơlơi gum ngă mơ̆ng djŏp gưl, anom bruă, Dak Lăk čang rơmang amra pơklaih brơi tañ hơdôm tơlơi dŏ gun, wai lăng kjăp djŏp bruă pơkra gơnam hăng ba sĭ sâu riêng pơ čar rơngiao. Mơ̆ng anun, ƀu kơnong pơgang ba anăn sâu riêng Dak Lăk ƀơi anih mơdrô jar kmar đôč ôh, ăt djru pơđĭ rơnoh hơđong kjăp kơ bruă bơwoh ƀong akŏ phun anai./.