Tơngan rơwang greñ gruñ dŏ djă đing ƀôp ia pruih kơ đang kơphê rơbêh 1 hektar, djă đing ba nao pơ hnoh ia Dak Sôr, ơi Lê Quang Lâm, plơi Quảng Thành, să Dak Sôr, tơring glông Krông Knô ĕp lăng tong ten rim črăn đing ia ñu  hlăk tô. Yap mơ̆ng hmua đang kơphê sang anŏ ñu, pơtrun đing truh pơ hang ia lĕ rơbêh pluh čơgŭl đing, sa čơgŭl dlông 50 met, yua kơ anun ñu khom ĕp lăng, pơhlôm hlâo bruă tô đing. Hơdôm hrơi hăng anai, črăn hnoh ia Dak Sôr anih ñu ƀôp ia či bruih kơphê thu abih tơl ƀuh atur baih. Samơ̆ kông ty wai lăng bơnư̆ ia pioh ngă hmua lăi pơthâo, hơdôm hrơi pơ anăp amra hơmâo ia mơ̆ng bơnư̆ pơkong ia tơring glông Dak Mil pok pơhai glăi ia kơ hnoh ia Dak Sôr brơi mơnuih ƀôn sang bruih, sa tơlơi pơhing phrâo hmư̆ mơak biă mă. Ơi Lâm ăt kah hăng lu sang anŏ pơkŏn rơmet lui yơh măi ƀôp ia, đing ia, kiăng pruih pơgang phun pla huăi djai krô.

“Bơngơ̆t biă mă anun yơh hơdôm hrơi hăng anai, pit ƀu hơđong dong ƀu mơak pran jua. Ia hnoh thu mơ̆ng hrơi tal 6 ƀong têt laih. Dŏ čang rơmang ia arăng phai rai pioh ƀôp mă pruih pơgang kơphê huăi krô boh mơda. Thun anai ƀuh adai không phang kơsing pah prong, hơdôm thun hlâo adih, hnoh ia anai rô na nao đôč ƀu thu ôh".

Hnoh ia Dak Sôr lĕ sa amăng hơdôm hnoh ia ania prong hloh ƀơi tơring glông Krông Knô, găn nao ƀơi 2 boh să Dak Sôr hăng Nam Xuân. Ƀơi hnoh ia anai hơmâo 3 ring bruă arăng bư̆ pơkong, anun lĕ bơnư̆ bư̆ pơkong ia pioh mă ia bruih kơ đang hmua bơyan phang. Samơ̆ mông anai, 3 boh bơnư̆ anun, hăng hnoh ia Dak Sôr hai ia thu abih, năng ai mơ̆ng 1.300 truh 1.500 hektar đang phun pla mơ̆ng mơnuih ƀôn sang ter hnoh ia amra kơƀah ia bruih. Lu đang kơphê mơ̆ng mơnuih ƀôn sang kơƀah ia tơl djai than, krô tơdŭ laih, anun lu sang anŏ mơnuih ngă hmua pit ƀu hơđong ƀong huă ƀu mơak pran jua ôh bơngơ̆t yua kơ không phang kơƀah ia bruih.

Ơi Nguyễn Văn Đại, Khua anom bruă wai lăng bơnư̆ pơkong ia tơring čar Dak Nông anom bruă čơƀeng ƀơi tơring glông Krông Knô lăi, thun anai tơlơi pơhing ayuh hyiăng kơsing pah prong kơtang hloh kơ hơdôm thun hlâo adih. Jơlah ia abih bang 33 ring bruă pơkong ia amăng tơring čar lêng kơ hrŏ trun soh pơkă hăng tơđar thun, hơmâo anih kơtang tơl thu khôt abih. Kông ty ngă hrŏm hăng lu sang bruă ƀơi tơring čar, tơring glông pơkŏn kah hăng Dak Mil, Dak Song, hơmâo ia bruih hơđong, kiăng pok pơhai kah pơpha ia djru mơnuih ƀôn sang tơring glông Krông Knô bruih kơ phun pla.

Khă tui anun, bruă pok pơhai kah pơpha ia dưi djru kơ mơnuih ƀôn sang hơmâo ia bruih tal 4, rơnuč blan 4. Bơ blan 5, tơdah adai dŏ không phang na nao aka ƀu hơmâo ia hơjan hơdôm rơbâo ha phun pla ăt amra bong ƀơi anăp kơƀah ia kơtang đôč:

“Ngă tui bruă pơpha ia bruih 2 tal mơ̆ng hnoh ia Dak Sôr hăng hrơi blan pơkă tal I lĕ mơ̆ng 12-15 hrơi, ia pling rai mơ̆ng tơring glông Dak Mil hăng Dak Song glăi pơ tơring glông Krông Knô lĕ mơ̆ng 300.000 truh 500.000 met khô̆i sa tal. Sit mơ̆n amra pơpha ia dưi djop truh tal 4. Tal 5 lĕ amăng blan 5, tơdah ayuh hyiang adai rơngit dŏ không kơtang phang khôt lĕ aka ƀu khin lăi nao ôh djop ia bruih".

Ơi Doãn Gia Lộc, Khua anom bruă Ngă hmua hăng pơđĭ kyar plơi pla tơring glông Krông Knô, tơring čar Dak Nông brơi thâo, bơyan puih phang thun anai tơring glông hơmâo năng ai 4.600 hektar hmua đang phun pla ƀiă hrơi, hrŏm hăng anun amăng tơring glông hơmâo giăm 30.000 hektar đang phun boh troh. Bơyan không thun anai, him lăng hlâo amra phang khôt kơtang, yua kơ anun tơring glông pok pơhai lu hơdră pioh kơtưn amăng bruă mă pơhlôm anŏ răm ƀăm yua không phang hang pơđiă kah hăng brơi pơblih pơjeh phun pla, pla pơjing pơtum sa hnong, pơtô brơi mơnuih ƀôn sang yua ia thâo pơkrem, kuăi rơnăk king hmua, ia hnoh. Mah hnun, kiah abih blan 2 đôč ia thu hơmâo ƀơi lu anih laih, ƀu djop ia bruih kơ phun pla, laih dơ̆ng bơyan phang sui truh blan 5, blan 6, hơdôm blah đang hmua ƀơi djop să Dak Sôr, Nam Nung, Nam Xuân, Tân Thành kơƀah ia bruih kơtang biă mă. Tơring glông Krông Knô hlăk mă bruă hăng hơdôm sang bruă kơnuk kơna, brơi kah pơpha ia bruih kơ mơnuih ƀôn sang ngă hmua ƀơi kual thu ia kơtang.

Ơi Doãn Gia Lộc brơi thâo, tơring glông hơmâo mă bruă hăng kông ty drai ia apui lơtrik hơmâo ring bruă ƀơi hnoh ia krông Knô kah hăng sang măi drai apui lơtrik Ƀuôn Kuôp, sang măi Čư̆ Pông Krông kiăng pơpha brơi ia amăng bơyan phang anai, bĕ hĭ bruă mơ̆, sit ană plơi pla kiăng lĕ sang măi ƀu pok pơhai ia, truh mơnuih ƀôn sang ƀu kiăng lĕ pok pơhai ia phăk phai, mơnuih ƀôn sang ƀu thâo yua.

“Ƀing gơmơi ăt him lăng hlâo laih mơ̆n tơlơi pơhing mơ̆ng ră anai truh abih bơyan phang anŏ či kiăng ia bruih amra lu hloh, samơ̆ ia či ƀôp pioh bruih lĕ thu tui laih. Yua kơ anun tơring glông hơmâo ngă hrŏm djop sang bruă kah hăng kông ty drai apui lơtrik Ƀuôn Kuôp, kông ty yua ia bơnư̆ pơkong ia Dak Nông hăng hơdôm ring bruă sang măi drai apui lơtrik amăng tơring glông, dăp hơdră pơpha hrơi blan pokpơhai ia pioh brơi mơnuih ƀôn sang ngă hmua pơ kual gah tơkai ia krông Knô, amăng anun hơmâo 7 boh să treng hang ia krông bơbeč djơ̆ ƀơi anăp, kiăng pok pơhai ia pơpha djơ̆ lăp gêh găl hloh.