Bơyan không amăng kual giăm guai dêh čar ƀơi tơring glông Čư̆ Jŭt, tơring čar Dak Nông pơ-iă hang h’uh kơtang biă mă. Amăng kual glai pơkă mrô 833, gah lŏn glai Dak Wil, să Dak Wil wai lăng, hla kyâo pơtâo luh trun krô abih laih, phun kyâo amur ăt hyŭ hla, ngă kơ tơlơi hŭi apui ƀong glai či hơmâo hăng rơnoh pơkă mrô 4 jing hơnơ̆ng hŭi hyưt laih. Ayong Phạm Văn Nhị, mơnuih mă bruă ƀơi anom wai lăng glai mrô 1, Kông ty wai lăng glai kyâo Dak Wil brơi thâo, 6 čô mơnuih mă bruă amăng anih gak gơñu mă bruă ĕp lăng na nao, pok pơhai bruă mă pơhlôm, pơgang glai rưng:

“Ƀing gơmơi pơkă kual, kăng lui anih ngă glông kiăng pơgăn apui huăi ƀong rôk hyu sit čuh tơnuh pơgăn apui. Glông jơlan pơgăn apui ƀong rôk hyu ngă prong mơ̆ng 5-7 met, tơdah hơmâo apui ƀong glai lĕ, ñu rôk hyu rơnang ƀiă, tañ dưi pơgăn hĭ. Ƀơi anih mơnuih ƀôn sang juăt mut tơbiă hyu amăng glai, ƀing gơmơi hlă pơnăng čih kom čuh apui hăng pơtô lăi mơnuih ƀôn sang anăm mut amăng glai čuh tơnuh ôh hŭi apui rôk hyu”.

Kông ty wai lăng kyâo glai Dak Wil hlăk wai lăng giăm 29.000 hektar glai rưng, amăng anun 100 hektar  glai kyâo pla, dŏ glăi glai hơnơ̆ng hơđăp, ter guai plah wah tơring čar Dak Lak hăng Dak Nông laih anun jĕ guai hăng dêh čar Kur. Ơi Nguyễn Hồng Việt, Kơ-iăng Khua kông ty lăi, ayuh hyiăng adai ƀơi kual guai dêh čar pơ-iă hang kơtang biă mă, phara hăng anih pơkŏn mơ̆ng 7-10 đô̆ C, anun hŭi biă mă hơmâo tơlơi truh apui ƀong glai. Yua kơ anun, bruă mă pơhlôm pơgang apui ƀong glai khom prăp lui tañ hloh:

“Amăng akŏ bơyan không phang adai pơ-iă kơtang, kông ty brơi hyu tir rim hrơi, sit ƀuh pơpă či hơmâo apui ƀong, khom nao kăng lui, brơi tơhan nao pơčruih hăng hơprah apui mơtam yơh. Abih bang hơmâo 11 anih dŏ găk krăo lăng amăng glai, sa anih hơmâo 2 boh bung man pơdong pioh lui ia pơhlôm 4000 lit sa boh hăng sa boh bung atŏng ia pioh mơñum 5000 lit, sit hơmâo apui ƀong glai ăt mă yua ia anun mơ̆n ba pơčruih apui. Rơngiao kơ anun, djop anih dŏ gak lêng kơ hơmâo đing pơčruih apui hăng măi soh”.

Tơring čar Dak Nông ră anai dŏ năng ai 249.000 ha glai rưng, amăng anun 196.000 ha glai rưng hơnơ̆ng đôč, lu biă mă ñu ƀơi tơring glông Dak Glong, Dak Mil, Dak Song, Čư̆ Jŭt hăng Tuy Đức. Tui hăng ơi Trần Văn Linh, Kơ-iăng khua anom bruă tơhan pơgang glai tơring čar Dak Nông, thun 2024, đơ đam tơring čar hơmâo 30 wơ̆t apui ƀong glai, ngă răm ƀăm 32 hektar, lu hloh kơ thun hlâo kơ anun. Kiăng pơhrŏ ƀiă mrô apu ƀong glai, anom bruă tơhan pơgang glai hơmâo dăp hơdră tañ hloh kiăng pơđĭ tui tơlơi thâo hluh kơ bruă wai pơgang glai rưng, pơhlôm apui ƀong glai. Ơi Trần văn Linh brơi thâo:

“Anom bruă tơhan pơgang glai tơring čar hơmâo lăi pơthâo hăng Gơnong bruă Đang hmua hăng pơđĭ kyar plơi pla, jơnum min mơnuih ƀôn sang tơring čar Dak Nông brơi git gai djop khul wai pơgang glai rưng, glai pơgang plơi, jơnum min mơnuih ƀôn sang djop tơring glông, plơi prong kơtưn hyu sem lăng, hyu tir, ĕp lăng anih amuñ hơmâo apui ƀong glai, kiăng hơmâo hơdră pơhlôm pơgang hlâo apui ƀong. Rơngiao kơ anun, anom bruă tơhan pơgang glai ăt git gai djop sang bruă, pô glai kơtưn hyu ĕp lăng, bruă pơhlôm pơgang apui ƀong glai amăng bơyan không; ngă hrŏm abih bang khua khul anom bruă pơgang glai, hơdôm kông ty pla kyâo, wai lăng glai rưng ngă klă bruă hyu sem lăng, pơgăn jơlan mut tơbiă nao rai amăng glai klô, kiăng ngă klă bruă hơdai gum hrŏm pơgang apui ƀong glai amăng thun 2025.