Tui hăng hơdră hlăk ngă dưi hơmâo tơring čar dăp glăi, mrô sang hră gưl muai hrŏ mơ̆ng 356 boh sang hră dŏ glăi 150 boh sang hră phun, hơmâo khua git gai, hơdôm dŏ glăi čơƀeng đôč; sang hră gưl sa mơ̆ng 450 trun dŏ 134 boh sang hră phun; sang hră gưl dua mơ̆ng 284 boh trun dŏ 92 boh sang hră. Lơ̆m anun, hơbô̆ bruă sang hră dua gưl lir hơbit hăng gưl sa jing sa boh hră đĭ tui mơ̆ng 63 truh 159 boh sang hră. Ƀơi sang hră gưl klâo, mrô sang hră him lăng hrŏ 10 boh sang hră, mơ̆ng 78 trun dŏ 68 boh sang hră. Gah bruă pơtô hrăm bruă mă-pơtô hrăm re se ăt dưi dăp glăi mơ̆ng 24 trun dŏ 9 boh sang hră pơtô pơhrăm re se, hơmâo 5 boh sang hră pơtô hrăm re se pơtô rah bruă mă hăng 4 boh sang hră dơnong pơtô bruă mă. Hơbô̆ bruă dăp glăi anai pơdjơ̆ nao ƀing khua mua, mơnuih apăn bruă amăng sang hră.

Him lăng hơmâo 643 čô khua sang hră, 780 čô kơ-iăng khua sang hră hăng 935 čô mơnuih apăn bruă amăng sang hră. Tơdơi kơ pơmut, lu sang hră amra prong hloh, lu nai pơtô, lu sang sang hră hloh pơkă hăng hlâo, pơpha lu sang hră čơƀeng ataih hloh hăng hơdră git gai phrâo hloh. Yă Lê Thị Thanh Xuân, Khua Gơnong bruă Pơtô hăng pơjuăt tơring čar Dak Lak brơi thâo, anom bruă pơtô hrăm hơmâo ngă hrŏm Gơnong bruă čar gum hrŏm lông ngă lăng pioh ĕp hơdră pơtô ba djop să, dăp glăi khul nai pơtô, ƀing khua mua sang hră:

“Pơ anăp anai, anom bruă pơtô hrăm ngă hrŏm Gơnong bruă čih pơkra tơhnal pơkă hrŏm pơtô brơi djop să, pioh ngă tui bruă dăp glăi mơnuih mă bruă git gai wai lăng. Rơwang hrơi kom anai, gơmơi ngă giong boh yom phun anai. Tơlơi pơkă lông ngă lăng hlâo sang hră sa čô khua, sa čô kơ-iăng dŏ glăi ƀơi hơdôm sang hră čơƀeng lĕ brơi sa čô kơ-iăng khua wai lăng”.

Tơlơi lăp đing nao hăng bruă pơhrŏ ƀiă mrô sang hră, tơlơi hrăm pơkă lĕ pơhlom pơgang brơi hơdôm sang hră laih pơmut giong. Lơ̆m sang sa boh sang hră hơmâo lu sang hră čơƀeng, lu anih hrăm pơdong raih daih ƀơi lu anih, bruă pơpha nao ƀing nai pơtô, hrơi mông mă bruă kơ ƀing khua mua pô wai lăng lĕ sa bruă mă, glăm ba tơnap hloh.

Khua git gai ping gah tơring čar Dak Lak, ơi Lương Nguyễn Minh Triết pơtrun hiăp kơ bruă dăp glăi, pơmut lu sang hră amra ƀu bơbeč djơ̆ kơ čơđai sang hră ôh. Khua mua apăn bruă phun ping gah tơring čar tŭ ư hrŏm hăng hơdră yua Jơnum min mơnuih ƀôn sang tơring čar lăi pơthâo, amra ngă giong hlâo kơ kơnôl 30/8. Hlâo kơ kơnôl 12/8 khom ngă giong tơhnal pơkă kơ pô či ngă khua sang hră, kơ-iăng khua sang; laih dơ̆ng pơpha rơđah bruă mă, tơlơi dưi gưl mă bruă, tơlơi glăm ba mơ̆ng ƀing khua mua wai lăng, tơdơi kơ pơmut giong, boh nik ñu hơdôm anih hơmâo lu sang hră pơdong raih daih, jing sang hră čơƀeng.

“Khom ngă pơrơđah hloh bruă pơpha tơlơi dưi bruă glăm ba mơ̆ng khua sang hră, kơ-iăng khua sang hră tơdơi kơ pơmut giong. Hlâo adih, sa čô khua sang hră git gai sa čô kơ-iăng, ră anai 5 boh sang hră čơƀeng khom pơpha mông pơtô hrăm pơhrŏ hiư̆m pă, kiăng pơsir anŏ kơƀah nai pơtô. Nai pơtô amra đuăi nao rai, pơblih pơpha hyu pơtô ƀơi djop sang hră čơƀeng anun amăng sa boh să, kah pơpha hiư̆m pă brơi găl, brơi djơ̆, tơlơi anai lĕ bruă glăm ba, pơpha bruă mă hăng tơlơi git gai mơ̆ng khua sang hră”.

Tui anun yơh, dăp bruă pơmut glăi sang hră ƀơi tơring čar Dak Lak ƀu kơnong ngă pơhrŏ mrô mơnuih mă bruă, akŏ bruă git gai ôh. Gah klôn kơ mrô anun lĕ kiăng dăp glăi bruă mă, git gai wai lăng, pơpha khul nai pơtô hăng pơhlom djop anŏ gêh găl kơ čơđai sang hră hrăm hơđong na nao.