Ƀơi Gia Lai, Jơnum min mơnuih ƀôn sang tơring čar phrâo lăi pơthâo kiăng ngă bruă ječ ameč thun 2026, amăng anun pơsit man pơdong bơnư̆, dơnao kŏng ia jing bruă akŏ phun mơ̆ng bruă ngă hmua, plơi pla. Klâo ring bruă bơnư̆ kŏng ia prong, prăk tuh pơ alin năng ai 810 klai, amra hơmâo ngă amăng thun 2026-2030, pơsir hĭ tơlơi kiăng ia yua ngă hmua hăng hơdip mơda kơ kual Yŭ tơring čar, anih dŏ hơmâo lu anih či ngă hmua samơ̆ dơnao ia, akŏ kli ƀu djơ̆ hăng tơlơi kiăng.

Tui hăng akŏ bruă, bơnư̆, dơnao kŏng ia Djang ƀơi să Kbang pơhlom ia pruih kơ 800 ha đang hmua, laih anun brơi ia yua kơ năng ai 3.500 čô mơnuih. Dơnao ia Ka Tung ƀơi să Tơ Tung dưi prui ia kơ 1.000 ha lŏn ngă hmua hăng brơi ia yua kơ rơbêh 2.600 boh sang anŏ. Dơnao ia Đăk Trau Dle ƀơi să Kon Chiêng dưi brơi ia pruih kơ 600 ha đang hmua, laih dong djru pơgang ia dăo. Ơi Cao Thanh Thương, Khua gơnong bruă hmua hăng ayuh hyiăng tơring čar Gia Lai brơi thâo: “Anih ngă hmua pơhlom ia pruih hơđong ƀơi kual Yŭ tơring čar Gia Lai hơmâo rơbêh 12% anun kiăng pơtrut tơlơi gêh găl, akŏ pơjing kual ngă hmua pla gơnam prong kơ tơring čar hăng amăng kual lĕ khŏm pơƀut pơkra dơnao ia. Amăng tơlơi pơtrun jơnum ping gah tơring čar Gia Lai rơwang thun 2025-2030 pơƀut lăng glăi dơnao kŏng ia đah mơ̆ng pơtrut tơlơi hơmâo gah lŏn ngă hmua, biă ñu amăng bruă tơjŭ pla pioh pơkra gơnam klă, hăng ba sĭ pơ čar rơngiao”.

Lơ̆m Gia Lai pơƀut man pơkra dơnao kŏng ia kiăng hơmâo ia sui lĕ, ƀơi Dak Lăk, bruă pơgang tơlơi truh lŏn adai ngă glăk hơmâo ngă ječ ameč, ƀơi anăp tơlơi pơhŭi hlâo adai ƀu lăp amăng bơyan hơjan. Mơ̆ng akŏ thun truh ră anai, Dak Lăk hơmâo 9 wơ̆t laih tơlơi truh, hơmâo hơjan prong, grŏm kơmlă, hơkruah yâo, ngăkơ 1 čô mơnuih djai, 85 boh sang răm rai, mrô răm rai yap hăng prăk truh 2,86 klai.

Yak nao amăng bơyan hơjan, đơ đam tơring čar hơmâo 80 bit anih lŏn tơhlŏm, amăng anun 12 bit anih hŭi rơhyưt hloh kiăng pơsir tañ. Lăp đing nao, mah truh bơyan hơjan laih, tơlơi kơƀah ia yua, pruih kơ đang hmua truh 23% đơ đam lŏn hmua, lu biă mă ñu, hmua na kơnang kơ ia pơđoh mơ̆ng bơnư̆ pơkong hăng ia pling nao amăng hmua pơdai thu hăng tơki kơ ia hơjan tơnap biă mă. Kơ-iăng khua jơnum min mơnuih ƀôn sang tơring car Dak Lak ơi Nguyễn Thiên Văn pơtrun hiăp: “Hăng djop gơnong bruă, anom bruă, plơi pla pơdjơ̆ nao anih lăi lui hlâo, prăp lui dăp hơdră, lăi pơthâo tơlơi pơhing djru pơtô brơi ană plơi, prăp lui mơnuih mă bruă, gơnam yua, abih bang tui hluai anŏ gêh găl mơ̆ng anom bruă, mơ̆ng anunm gum hrŏm, lir hơbit amăng plơi pla kiăng ngă tui sa hnơ̆ng, hơmâo tơlơi pơtrun ngă bruă hrŏm, git gai, pơčrâo ba lăp djơ̆. Sit hơmâo tơlơi či truh hơgĕt lŏn adai ngă, khom pơdjru ba pơsir tañ, hmao kru, pơhrŏ ƀiă tơlơi răm ƀăm hŭi djơ̆ mơnuih laih anun pơgang ba kông ngăn kơnuk kơna, mơ̆ng mơnuih ƀôn sang”.

Bruă Gia Lai pơtrut bruă tuh pơ alin ming pơkra glăi djop bơnư̆ pơkong ia pơprong, lơ̆m anun Dak Lak kơtưn lu hơdră pơhlom pơgang tơlơi truh lŏn adai ngă amăng kual Dap Kơdư, pơblih nao kơ bruă mă bong glăi hăng dŏ hrŏm anŏ pơblih ayuh hyiăng lŏn tơnah. Jơlan glông, atur ring bruă bơnư̆ akŏ tli, hrŏm hăng bruă lăi lui hlâo, pơhŭi hlâo laih anun pơhlom tơlơi či truh lŏn adai ngă, jing sa bruă mă atur yom biă mă hăng bruă pơgang tơlơi hơdip mơda mơnuih ƀôn sang, laih anun pơđĭ kyar bruă ngă hmua hơđong kơjăp lơ̆m ayuh hyiăng lŏn adai jai hrơi pơblih sat kơtang tui ƀu thâo lăi lui hlâo ôh./.