Bơyan pơdơi prong anai, sit truh čơtlăm, dơnao ia ƀơi anom mă bruă hlăk ai tơdăm ngek dra muai, čơđai muai tơring čar Gia Lai pok bah amăng pioh pơtô luai ia brơi đôč kơ hlăk ai tơdăm ngek dra muai, čơđai muai hmâo tơlơi hơdip mơda tơnap tap ƀơi plơi prong Plei Ku, tơring čar Gia Lai. Amăng rim mông hrăm rơngiao kơ pơtô bôh thâo luai ia, ƀing čơđai dô̆ dưi pơtô brơi hrăm luai pơtlaih mơnuih ia ƀlung, bôh thâo pơgang brơi ƀơƀiă lơm hmâo ia ƀlung. Čơđai Võ Mạnh Cường, čơđai sang hră ƀơi plơi prong Plei Ku lăi:

 “Sang tơnap tap anun ƀu hmâo prăk pioh nao hrăm luai, hrơi anai ƀơi anom hlăk ai tơdăm ngek dra muai, čơđai muai tơring čar Gia Lai pok khul luai ia kơ ƀing čơđai tơnap tap, čơđai hor biă hăng hmâo rơkâo nao hrăm mơtăm. Nai pơtô brơi kơ kâo hơdôm tơlơi luai ia kah hăng luai ajĭ, luai pa”.

Ayong Nguyễn Tiến Thịnh, pơhrăm luai ia mơ̆ng Khul luai ia hlăk ai tơdăm ngek dra muai, čơđai muai tơring čar Gia Lai brơi thâo, gum hrŏm anih hrăm, ƀing čơđai anet dưi pơhrăm bôh thâo phun kah hăng hrăm wot tơkai tơngan, suă jua. Rơngiao kơ hơdôm luai đih đang, luai asâo, luai pa, luai hơdơ̆ či hor, ayong Nguyễn Tiến Thịnh dô̆ pơhrăm dong bôh thâo pơgang pơgăn huĭ ia ƀlung hăng pơsir hơdôm tơlơi amra truh.

 “Lơm khul pok tơbiă hơdôm anih pơtô pơhrăm brơi đôč, drơi pô kâo ăt nao pơtô mơn kơ ƀing čơđai bôh thâo luai ia, pơgang pơgăn ia ƀlung, prăp brơi kơ ƀing čơđai pioh ƀing čơđai lơm bưp tơlơi ƀơi ia krông čroh hnoh, dơnao ia, ƀing čơđai pơsir mă pô ƀudah ia ƀlung hăng pô pơkon, djru prăp brơi kơ ƀing čơđai bôh thâo pơgang pơgăn ia ƀlung”.

Brơi ană nao hrăm anih pơtô luai brơi đôč, ơi Trần Văn Thanh, dô̆ ƀơi phường Hoa Lư, plơi prong Plei Ku čang rơmang ană pô dưi pơhrăm drơi jăn ƀơi anih anom tâ̆o klă, ăt kah hăng hmâo bôh thâo luai ia klă.

 “Kâo ƀuh ră anai čơđai ia ƀlung lu đơi anun kiăng brơi ană pô nao hrăm pioh ñu thâo luai, sit truh hrơi tơjuh ba ană rai pơ̆ anai luai ia pioh ñu thâo hreč hloh, tơdơi anai hmâo tơlơi hơget thơ ñu amra dưi pơtlaih mă pô".

Ƀơi Kon Tum, rơwang hrơi tơjuh rơgao ăt hmâo pơphun laih mơn mông ngă Lơphet pok phun bơyan pơdơi prong, hrơi Olympic čơđai muai hăng pok phun abih bang mơnuih ƀôn sang pơhrăm luai pơgang pơgăn ia ƀlung, hăng tơlơi gum hrŏm mơ̆ng rơbêh kơ 1.300 čô čơđai. Amăng mông ngă lơphet Grŭp pơphun bruă pok phun hăng iâo pơthưr hơdôm gưl, hơdôm gơnong bruă mơ̆ng tơring čar Kon Tum djă pioh, pơđĭ kyar hyu djop bruă pơhrăm bơkơjăp drơi jăn lăi hrŏm hăng tơlơi hrăm luai lăi ha jăn.

Tơlơi ia ƀlung juăt truh biă ñu lĕ hăng čơđai muai amăng bơyan pơdơi prong. Kiăng pơhlôm klă brơi giăm truh 168.000 čô čơđai mơ̆ng tơring čar amăng tal pơdơi prong thun anai, tơring čar Kon Tum iâo pơthưr hơdôm gưl, hơdôm gơnong bruă, sang hră, sang anô̆ hăng abih bang mnuih mơnam kơtưn wai lăng pioh plai ƀiă hmâo tơlơi ia ƀlung, biă ñu hăng čơđai muai. Ơi Nguyễn Xuân Truyền, Kơ-iăng Khua Gơnong bruă bôh thâo, bơkơjăp drơi jăn hăng tuai čuă ngui tơring čar Kon Tum brơi thâo, bơyan pơdơi prong anai amra iâo pơhrui abih bang djop mơta anih pioh luai kiăng pơphun pơtô luai brơi, lăi pơthâo hăng pôr pơhing kơ bôh thâo pơgang pơgăn ia ƀlung kơ čơđai muai.

 “Čang rơmang ƀing hlăk ai, tơdăm dra, čơđai gưl dlông, ƀing čơđai sang hră, ƀing amĭ ama čơđai sang hră hăng abih bang mơnuih ƀôn sang ƀu kơnong kơ pơhrăm klă bruă luai ia ôh mơ̆, dô̆ jing sa mơnuih pôr pơhing hyu pơsur gơyut gơyâu, mơnuih amăng sang anô̆ pô prăp brơi kơ pô bôh thâo, tơlơi thâo pơgang pơgăn ia ƀlung djru amăng ƀrư̆ hrŏ trun tơlơi ia ƀlung ƀơi đơ đam tơring čar pioh anăp nao tơhnal ba tơbiă "Sang dô̆ pơhlôm klă”, “Sang hră pơhlôm klă” hăng “Plơi pla pơhlôm klă”.

Ƀơi tơring čar Lâm Đồng, ngă Lơphet pok phun bơyan pơdơi prong, Hrơi Olympic čơđai muai hăng pok phun abih bang mơnuih ƀôn sang pơhrăm luai ia, pơgang pơgăn ia ƀlung ƀơi čơđai muai thun 2024 ăt dưi pơphun mơn ƀơi plơi prong Đà Lạt. Mông ngă lơphet dưi pơphun pioh pơsur čơđai muai amăng đơ đam tơring čar gum hrŏm klă hơdôm bruă bơkơjăp drơi jăn, ngui ngor pơdơi pơdă amăng bơyan pơdơi prong, pơđĭ dlông drơi jăn, bôh thâo hơdip, biă ñu bruă pơhrăm luai ia, pơgang pơgăn ia ƀlung kơ čơđai muai.

Việt Nam lĕ sa amăng hơdôm bôh dêh čar hmâo lu čơđai ia ƀlung rim thun ƀơi rŏng lŏn tơnah. Ƀơi tơring čar Lâm Đồng, amăng thun 2023 phrâo rơgao, hmâo laih 20 čô mơnuih ia ƀlung; hơdôm blan akô̆ thun 2024 anai amăng đơ đam tơring čar truh ră anai hmâo laih 10 čô mơnuih tui anun. Jơnum min mơnuih ƀôn sang tơring čar Lâm Đồng rơkâo hơdôm gơnong bruă, hơdôm gưl amăng tơring čar khom gum hrŏm klă amăng hơdôm bruă mă pơdơi prong kơ čơđai sang hră ăt kah hăng ngă klă bruă pơsur pơphun brơi čơđai muai, čơđai sang hră hơdôm gưl hrăm luai, pơphun hơdôm pri luai ia čơđai sang hră, hlăk ai tơdăm ngek dra muai amăng thun ăt kah hăng amăng bơyan pơdơi prong pioh đĭ mrô cơđai muai, čơđai sang hră thâo luai ia amăng tơring čar; hơdư̆ đut hlah rơnoh ƀiă hloh hơdôm mơnuih ia ƀlung lăp ruă pran jua./.