Bruă mă čơđeh tơlang ƀudah asar AND lĕ dưi ngă hrŏm dua bơnah, tơlang pô tơhan pơsăn drơi hăng mă drah ƀudah čơđeh asar mơnuih amăng sang anŏ pô dŏ hơdip, ba pơčrang hrŏm, tơlang ƀing tơhan aka ƀu thâo krăn pô ƀudah kuai mă tơlang ƀơi pơsat dor aka ƀu thâo anăn pô, hơdră mă drah ƀudah čơđeh asar lĕ, mă gah kơnung djuai amĭ, yă gah amĭ, adơi ayong adơi amai, anong, neh wa gah yă hăng abih bang ană amôn gah amĭ soh či mă drah ba pơčrang hrŏm, tơdah djơ̆ hrŏm arăng pơsit anăn, pơsit pô tơhan djai pơsăn drơi jăn aka ƀu thâo pô mơ̆ng hlâo djơ̆ lăp hloh.Tơdah tơhan pơsăn lĕ đah kơmơi, mă drah amĭ ñu, ană bă ñu, tơčô jing ană đah kơmơi ñu tơkeng rai ăt gah amĭ soh, adơi amai, adơi ayong anong wa, neh wa gah amĭ soh, wơ̆t ană amôn, ană adơi amai gah amĭ mơ̆n mă drah hlâo.

Yă Nguyễn Thị Thanh Lịch, Kơ-iăng khua Jơnum min mơnuih ƀôn sang tơring čar Gia Lai, Khua git gai khul pơčrâo bruă hyu hơduah ĕp rŭ tơlang tơhan pơsăn drơi jăn yua kơ lŏn ia tơring čar Gia Lai brơi thâo, bruă duñ mă hơduah ĕp čơđeh AND jing sa bruă mă yom gah kơđi čar, kiăng ngă tui djơ̆ tơlơi phiăn gru grua djuai ania “Ƀong boh hơdor kơ pô pla, mơñum ia hơdor kơ pô klơi”, hơdor tơngia, pran jua, ai hơtai mơ̆ng ƀing tơhan khin hơtai djai drơi yua kơ lŏn ia.

“Tañ kiăng sem anăn, krăn pô tơhan djai pơsăn drơi jăn yua kơ lŏn ia, đah mơ̆ng tañ ba glăi tơlang tơleh nao dor pơ plơi pla hơđăp ƀing gơñu, bruă ngă anai pơtrut ƀing gơmơi ngă abih pran jua, găn rơgao lu tơlơi tơnap tap. Biă mă ñu či Hrơi hơdor glăi 80 thun pioh kơ ƀing tơhan rơka rơkač hăng mơnuih djai pơsăn drơi jăn yua kơ lŏn ia, mông pioh kơ khul hlăk ai čơđai rơnuk anai hơdor tơngia kơ ƀing tuh drah pơčah asar yua kơ lŏn ia, ba glăi tơlơi rơngai mơ-ai pô ră anai. Ngă bruă tong ten, ba glăi boh tơhnal pơtong rơđah AND kơ tơhan djai pơsăn drơi jăn, hơduah ĕp sang anŏ, kơnung djuai ƀing gơñu”.

Amăng dua hrơi kơnôl sa hăng kơnôl 2/7, mơ̆ng tơlơi pơhing lăi pơthâo, Grup K51, anom bruă khua tơhan tơring čar Dak Lak git gai, ngă hrŏm sang bruă khua tơhan să Krông Bông brơi ĕp lăng, ƀơi ter kơnua čư̆ Yang Sing. Boh tơhnal, hơmâo ĕp ƀuh 2 per tơlang tơhan djai pơsăn drơi. Lơ̆m rŭ mă, kuai amăng lŏn Grup K51 ƀuh hơmâo gơnam đôm glăi amăng pơsat kah hăng ao hơjan, ao kaki, măi tơlơi pơhing, rajio pơhiăp nao rai amăng ling tơhan, gơnam yua pơkŏn samơ̆ phŏ laih yua sui thun. Kiăng djru bruă pơtong glăi anăn krăn pô lĕ, hơmâo mă čơđeh ba pơčrang AND ƀơ̆i.

Ƀơi phường Nha Trang, Khua tơhan tơring čar Khánh Hòa ăt pơphun jơnum lăi pơthâo hră pơtrun mơ̆ng Ding jum ling tơhan brơi akŏ pơjing grup hyu mă bruă hmar hơduah ĕp pơsat, rŭ kual mă tơlang tơleh tơhan djai pơsăn drơi jăn yua kơ lŏn ia, kiăng tañ pơsit anăn krăn pô ñu, djru tañ ngă bruă djơ̆ tui bruă kiăng “Hơdor tơngia tla pran”. Pơhiăp ƀơi mông jơnum jao bruă, Thiếu tướng Lương Đình Chung, ding kơna apăn bruă ping gah tơhan kual 5 lăi pơtong, bruă hyu hơduah ĕp, rŭ kual mă pơtum tơlang ba pơčrang AND tal anai, kiăng pơdah pran jua hơdor tơngia mơ̆ng djuai ania ta “Ƀong bong hơdor kơ pô pla, mơñum ia hơdor kơ pô klơi”, hơdor tơngia kơ ƀing tuh drah pơčah asar yua kơ lŏn ia ta dưi rơngai mơ-ai po kah hăng ră anai.

Khul apăn bruă ping gah tơhan kual 5 pơtrun hiăp kơ khua mua, ling tơhan ngă hrŏm bruă anai, gir run abih pran jua mă bruă kiăng tañ pơsit anăn krăn pô; lăng anai bruă ngă tơlơi pơtrun mơ̆ng hơtai boh pran jua sit nik, mơ̆ng gru grua djuai ania ta juăt ngă.