58 boh sang anŏ kông an rơgơi mơbruă hơmâo pơpŭ, pơ ala brơi kơ hơdôm rơtuh rơbâo boh sang anŏ amăng khul tơhan kông an. Rim boh sang anŏ hơmâo tơlơi hơdip mơda, bơwih ƀong phara, samơ̆ leng kơ thâo gum pơgôp pran jua, thâo kah pơpha, jing mơnuih djru gah tlôn kiăng ƀing khua, ling tơhan dưi găn rơgao tơnap tap, ngă truh kih djŏp bruă hơmâo jao.

Hmư̆ hing kah hăng sang anŏ Trung tá Cù Thị Thu Hà, Anom bruă tơhan hơduah ĕp kơđi gah ma túy, Kông an tơring čar Phú Thọ. Gah tlôn pô đah kơmơi ngă khua lĕ rơkơi ñu, glăm ba djŏp bruă măng sang, bơwih bơwang lăng ană bă, anun mơn bơnai ñu mơ̆ng hơđong či ngă bruă. Ayong Nguyễn Minh Luân, rơkơi Trung tá Cù Thị Thu Hà, lăi: “Anŏ phara mơ̆ng kông an hơduah ĕp kơđi gah ma túy hŭi rơhyưt, glêh glar biă mă. Djơ̆ hrơi ñu bơnai kâo hyu mơ̆ng bơbrui, truh krah mlăm aka ƀu glăi ƀơ̆i, iâu telephôn lĕ ƀu pơhmư̆ ôh. Lơ̆m anun, kâo thâo tơguan đôč ôh, čang rơmang huăi hơmâo tơlơi truh sat. Thâo hluh hăng bruă bơnai kâo ngă, jing kâo hăng sang anŏ leng kơ gum hrŏm, kiăng bơnai kâo ñu hơđong pran jua ngă bruă”.

Pơhiăp git gai, Thượng tá ơ Lê Quốc Hùng, Ding kơna Ping gah, Kơ-iăng khua ding jum kông an pơsit, hăng tơhan kông an, sang anŏ yơh pô djru gah tlôn kjăp biă, pơtrut pơsur pran jua kiăng rim čô tơhan găn rơgao tơnap tap, bong kjăp tơlơi ƀuăn yua kơ bruă pơgang ba rơnuk rơnua Lŏn ia. Dong gah tlôn rim bruă ngă hing ang anun leng kơ hơmâo tơlơi gum hrŏm, tuh rơyuh pran jua kret kruai mơ̆ng ƀing amĭ, ama, rơkơi, bơnai hăng ană bă amăng rim bo sang anŏ.

Kiăng bruă mă mơ̆ng sang anŏ hăng mơnuih dong gah tlôn djru ba tơhan kông an jai hrơi dlăm hloh, Kơ-iăng khua ding jum ơi Lê Quốc Hùng kiăng ping gah, khua mua djŏp anom bruă pơplih tơlơi pơmin, sit nik lăng ba tơlơi hơdip mơda, pran jua kơ khua mua, ling tơhan, biă ñu lĕ ƀing tơhan mă bruă pơ kual ataih, guai dêh čar ƀudah pơ anih mơ̆ ta ƀu thâo. Laih dong, hơdôm khul grup kiăng bong kjăp bruă djru tơlơi hơdip mơda mơnuih tơpuôl kah hăng “Ană rông Kông an să” ƀudah “Amĭ rông”.

Kơ-iăng khua ding jum ơi Lê Quốc Hùng čang rơmang rim boh sang anŏ pơtrut tui gru hiam, pơtô ană bă hơdip hiam, kjăp tơlơi pơmin, gum akŏ pơdong khul tơhan kông an jai hrơi kơtang amăng rơnuk đĭ kyar phrâo mơ̆ng lŏn ia: “Kâo đăo kơnang, hăng gru tơhan sông kơtang, thâo khăp pap, hơdor tơngia mơ̆ng tơhan kông an mơnuih ƀôn sang, hăng tơlơi gum hrŏm mơ̆ng hơdôm boh sang anŏ hăng tơlơi gir mơ̆ng abih bang mơnuih tơpuôl, rim čô khua, tơhan Kông an mơnuih ƀôn sang ƀơi abih bang djŏp bruă mă hơmâo thim tơlơi pơtrut pơsur, pơyơr pran jua kiăng ngă truh kih bruă mă, gum pơgôp akŏ pơdong tơhan Kông an mơnuih ƀôn sang amăng bruă bơkơtưn “ngă djơ̆ tơlơi phiăn hloh”, “kjăp pran hloh” hăng “jê̆ giăm ană plơi hloh”, yua kơ tơlơi hơdip rơnuk rơnua mơ̆ng mơnuih ƀôn sang”./.