Jơnum anai dưi pơphun tlam lơ 3/3, ƀơi sang bruă Ding jum prăk kăk hăng hơmâo Kơ-iăng khua dêh čar ơi Hồ Đức Phớc laih anun Kơ-iăng khua dêh čar Nguyễn Chí Dũng pơƀuh ƀô̆ mơta. Ƀơi mông jơnum, Khua anom bruă wai lăng gah mơnuih mă bruă amăng Ding jum prăk kăk pơđok hră Pơtrun mơ̆ng Kơnuk kơna pơkă kơ bruă mă, tơlơi dưi mơ̆ng Ding jum prăk kăk tơdơi kơ pơmut hrŏm, pôr pơthâo Hră pơtrun mơ̆ng Khua dêh čar pơsit bruă kơ 5 čô Kơ-iăng khua ding jum prăk kăk. Kơ-iăng khua dêh čar ơi Hồ Đức Phớc hăng ơi Nguyễn Chí Dũng hơmâo jao hră pơtrun pơđĭ bruă kơ ƀing kơ-iăng khua ding jum prăk kăk.

Ƀơi mông jơnum lăi pơthâo akŏ pơdong anom bruă ping gah Ding jum prăk kăk, lăi pơthâo jăng jai mrô mơnuih apăn bruă ding kơna ping gah, ding kơna khul apăn bruă phun, khua git gai, kơ-iăng khua git gai ping gah amăng anom bruă Ding jum prăk kăk rơwang bruă thun 2020-2025, giong anun lăi pơthâo hră pơtrun jao bruă pô ngă khua mơ̆ng 35 boh anom bruă gah Ding jum prăk kăk ăt kah hăng jao bruă kơ ƀing khua mua phrâo đĭ apăn bruă.