Sang anô̆ ơi Hồ Văn Thiếp, ƀơi plơi Tru - Chaih, să Đông Sơn, tơring glông A Lưới, tơring čar Thừa Thiên Huế gah sang anô̆ ƀun rin hơdôm thun anai. Sang anô̆ ƀu hmâo lŏn kơdư pioh ngă đang hmua, dua rơkơi bơnai hyu mă bruă arăng apah, hyu ĕp ƀong sa prăk pran mă bruă. Phrâo anai, Puih kơđông pơgang guai dêh čar ƀơi amăng jang A Đớt djru sang anô̆ ñu sa drơi rơmô pioh rông hăng pơtô brơi hơdră bơwih ƀong huă. Ơi Hồ Văn Thiếp hăng lu sang anô̆ ƀơi anai thâo tơngia kơ bruă gum djru mơng ƀing ling tơhan pơgang guai dêh čar:

 “Bơni kơ Puih kơđông pơgang guai dêh čar biă, hmâo djru laih neh wa ƀun rin tâ̆o klă. Čang rơmang lĕ pơgi kơdih anai pô rông, pô bơwih brơi klă, kiăng sang anô̆ yak rơgao tơlơi tơnap”.

Phrâo anai, Ƀirô git gai Ling tơhan pơgang guai dêh čar tơring čar Thừa Thiên Huế gum hrom hăng Khul pơlir hơbit Đah kơmơi tơring čar pơphun bruă pơdŏng sang “Pơđao guai dêh čar” ƀơk brơi kơ sang anô̆ ƀun rin guai dêh čar. 4 bôh sang anô̆ ƀun rin ƀơi hơdôm bôh să Đông Sơn, Lâm Đớt, A Roàng hăng Hương Nguyên mơng tơring glông A Lưới dưi djru rim sang 60 klăk prăk pioh pơdŏng sang. Mơnuih apăn bruă tơhan, ling tơhan hơdôm Puih kơđông pơgang guai pơdŏng ƀơi să djru neh wa hrơi bruă pơdŏng sang, tañ hơđong tơlơi hơdip mơda. Amai Huỳnh Thị Bé, ƀơi plơi Chi Lanh – A Roh, să Lâm Đớt, tơring glông A Lưới lăi lĕ, Ling tơhan pơgang guai dêh čar juăt djru neh wa, kah hăng pơdŏng sang, brơi rơmô rông, un rông, djru neh wa pơđĭ kyar bơwih ƀong, hrŏ trun rin rơpa, pơplih tơlơi hơdip mơda:

 “Puih kơđông pơgang guai dêh čar ƀơi A Đớt ngă gal brơi kơ mơnuih ƀôn sang klă biă. Ƀing ling tơhan djru mơnuih ƀôn sang lu biă, kah hăng pơkra ring bruă kơ sang anô̆ ƀun rin, djru rơmô rông kơ hơdôm bôh sang anô̆ ƀun rin, ngă gal brơi kơ mơnuih ƀôn sang yak rơgao ƀun rin. Rim thun, ăt hmâo mơn sang anô̆ mơnuih ƀôn sang tơtlaih mơng ƀun rin”.

Kual guai dêh čar ƀơi tơring čar Thừa Thiên Huế dô̆ hmâo lu tơlơi tơnap, bơwih ƀong kaih đĭ kyar. Yua anun, Ling tơhan pơgang guai dêh čar tơring čar Thừa Thiên Huế gum hrom na nao djru mơnuih ƀôn sang sut lui rin rơpa. Đại uý Võ Xuân Minh, Kơ-iăng Khua apăn bruă kơđi čar Puih kơđông pơgang guai ƀơi bah amăng jang A Đớt, Ling tơhan pơgang guai dêh čar tơring čar Thừa Thiên Huế lăi pơthâo, anom bruă gơgrong ƀơi 3 bôh să Lâm Đớt, Đông Sơn, Hương Phong, tơring glông A Lưới hăng rơbêh kơ 1.890 bôh sang anô̆ mơnuih ƀôn sang, amăng anun rơbêh kơ 1.000 bôh sang anô̆ ƀun rin. Puih kơđông hmâo gum hrom laih hăng Khul mơnuih ngă đang hmua, Khul đah kơmơi tơring glông, thâo rơđah tơlơi tơnap mơng rim sang anô̆, mơng anun djru neh wa pơđĭ kyar bơwih ƀong:

 “Ră anai, Puih kơđông glăk djă pioh hăng ngă tui hơdôm jơlan hơdră “Čung tơkai čơđai nao sang hră”, “Ană rông Puih kơđông”, “Ƀưh braih khăp păp”... Puih kơđông djru ba na nao 2 bôh sang anô̆, rim sang anô̆ 20 kg braih sa blan, laih anun pơsur ƀing thâo khăp păp djru hơdôm jơlan hơdră kah hăng pơdŏng sang dô̆ kơ mơnuih ƀun rin guai dêh čar, thun 2023 pơdŏng 2 bôh sang, rim sang 60 klăk prăk. Rơngiao kơ anun, Puih kơđông ăt djru dong mơn kơ hrơi bruă gum neh wa pơkra sang dô̆”.

Hơdôm hrơi rơgao, khul Ling tơhan pơgang guai dêh čar hmâo gum hrom hăng gong gai hơdôm anih anom ngă tui lu jơlan hơdră, hơdră djru mơnuih ƀôn sang, kah hăng: “Grŭp wai lăng mă pô jơlan guai dêh čar, pŏng guai dêh čar”; “Čung ba tơkai adơi nao sang hră”; “Gum hrom hăng Đah kơmơi guai dêh čar”... Mơng anun, gum pran hrom pơdŏng plơi pla phrâo nao hrom hăng hrŏ trun ƀun rin kơjăp phik ƀơi plơi pla, Đại tá Đặng Ngọc Hiệu, Kơ-iăng Khua apăn bruă Ping gah Ling tơhan pơgang guai dêh čar tơring čar Thừa Thiên Huế brơi thâo, rim thun Ling tơhan pơgang guai dêh čar tơring čar pơdŏng rơbêh kơ 50 bôh sang dô̆ ƀơk brơi kơ neh wa ƀun rin kual guai dêh čar. Mơnuih apăn bruă hơdôm Puih kơđông pơgang guai dêh čar ngă klă bruă lăi pơhing, pơsur hăng pơtô brơi neh wa pơplih phun pla, hlô rông, hrưn đĭ hrŏ trun ƀun rin kơjăp:

 “Adơi ayong ngă juăt hăng hơdôm bôh sang anô̆ mơnuih ƀôn sang kiăng lăi pơhing, pơsur, laih anun pơtô brơi neh wa bruă mă bơwih ƀong huă kiăng pơđĭ kyar bơwih ƀong – mơnuih mơnam. Ăt hluai tui bruă mă mơ̆ adơi ayong pơsur lĕ ƀuh pran kơtang ƀudah bruă mơng neh wa kiăng pơphun brơi neh wa bruă bơwih ƀong huă, sĭ mơdrô, hơdră ngă gơnam sĭ mơdrô, bôh than tŭč rơnuč lĕ pơđĭ kyar bơwih ƀong”./.