Hok mơak hrŏm hrơi mông amăng dêh čar ta ngă yang huă pơsat ơi bung yă bai dêh čar, ƀing nai pơtô hăng čơđai sang hră gưl dua Nguyễn Văn Cừ plơi prong Ƀuôn Ma Thuôt, tơring čar Dak Lak pơphun lu bruă mă dik dăk kah hăng pơplông hơduah ĕp phun tơdŭ gru grua đưm rơnuk pơtao Hùng Vương, pơhrôp glăi tơlơi akhan đưm, pơphun ngui ngor bruă plơi pla....Mơ̆ng anun, kiăng ƀing ană amôn čơđai sang hră thâo hluh gru phun đưm djuai ania lŏn ia, hăng pơtrut pran jua thâo gum pơgôp laih anun gơgrong ba bruă mă anăp glăi kơ plơi pla, dêh čar pô.

Ƀơi lan sang hră gưl dua Nguyễn Căn Cừ, plơi prong Ƀuôn Ma Thuôt, tơring čar Dak Lak, ƀing ană amôn čơđai sang hră ngui ngor mơak biă mă, tui gru grua plơi pla đưm, kah hăng pơplông hơdui hrĕ, trut gai trul, suang kơplong yong gai, gôm mơta kiăo mă bê. Amôn Nguyễn Việt Hùng, čơđai sang hră anih 8B, brơi thâo, anai lĕ tơlơi ngui ngor ƀu kơnong mơak đôč ôh, dŏ jing sa tơlơi hrăm pơhrôp glăi gru grua đưm djuai ania, yua sang hră pơphun amăng hrơi mông hơdor glăi huă pơsat ơi pơtao Hùng Vương:

“Tui hăng hơdră anai, kâo ƀuh pơ-ư ang biă mă kơ gru grua đưm djuai ania hăng hrăm lu tơlơi ră ruai đưm djuai ania. Kâo pơmin hơdor tơngia prong biă kơ pran jua akŏ pơdong lŏn đưm mơ̆ng ơi yă rơnuk pơtao Hùng. Jing sa čô čơđai sang hră kiăng gir run hloh hrăm hră, khom triăng ƀu kơnong kiăng ngă lăp pran jua ƀing nai pơtô hăng amĭ ama đôč ôh, dŏ pơmin kiăng lăp hăng anăn păn amôn săng mơ̆gn wa Hồ”.

Bơ amôn Trần Văn Bảo hrăm anih 8 mơ̆n ƀu pơmin, tơlơi ngui ngor djơh hăng tŭ yua biă mă kơ tơlơi hrăm gru grua phun djuai ania, pơphun ngă sen ngui ngor pơhrôp glăi, ƀing čơđai sang hră čih dăp mă hăng pơdah tơlơi ngui ngor mơak, ră ruai glăi phun tơdŭ bruă pơkra rai ƀañ pơ anăn “ Ƀañ čưng ƀañ yâi”.

“Ƀing gơyut pơdah tơlơi ngă sen lăng mơak biă mă, kâo hor biă mă ñu mông ngă sen ră ruai glăi kơ tơlơi hơmâo bruă pơkra rai ƀañ čưng ƀañ yâi. Tơlơi ngă sen anun yom biă mă hăng sa tơlơi pơtô hiam, pioh kơ ta hrăm glăi lu tơlơi ră ruai gru đưm djuai ania. Kâo ƀuh sa tơlơi hrăm kơ ta pô, khom gir run hrăm hră thâo pioh djru pran jua man pơdong lŏn ia hăng pơhrăm kiăng jing sa čô mơnuih ƀôn sang tŭ yua kơ mơnuih mơnam amăng dêh čar tơdơi adih”.

Mơ̆ng akŏ blan 3 blan tơƀang, ƀing nai pơtô hăng čơđai sang hră gưl dua Nguyễn Văn Cừ, hơmâo pơphun hrăm glăi črăn hơdră tơlơi adoh suang, ngă sen, pơplông tơlơi ngui ngor mơak hăng bruă či hyu ngui hrăm sit nik gah rơngiao anih hrăm. Hăng akŏ tơlơi hrăm “Drah kơtăk djuai ania Lạc Hồng” hyu ngui hăng hrăm tui sit nik gah rơngiao sang hră anăp nao hơdor glăi hrơi huă pơsat pơtao Hùng Vương lơ 10/3. Nai Vũ Thị Thu Hằng, khua grup ƀing nai pơtô lịch sử-điạ lý-Giáo dục công dân, tơlơi hrăm gru phun lŏn ia amăng sang hră lăi; Ƀu kơnong sa tơlơi ngui ngor mơak kiăng čơđai mơak pran jua đôč ôh, sa tơlơi hrăm hyu ĕp lăng sit nik gah rơngiao mông hrăm amăng anih, pơtô hrăm tong ten gru phun hrơi huă pơsat ơi pơtao Hùng Vương, jing ơi bung yă bai djuai ania, mơ̆ng anun pơtrut ƀing ană tơčô, adơi đeh čơđai sang hră gir run hloh hrăm hră, mă bruă thâo khăp kơ lŏn ia.

 “Mông ngui ngor anăn drah kơtăk djuai ania Lạc Hồng, pơphun brơi kơ ƀing čơđai sang hră hyu ĕp lăng phun tơdŭ gru grua djuai ania, giong anun ĕp hơdôm tơlơi adoh bơni glăi kơ yă Âu Cơ, ơi Lạc Long quân hăng brơi ƀing čơđai sang hră čih dăp mă hơdră, pơhrôp glăi, adoh suang ƀudah ngă sen ră ruai kơ rơnuk pơtao Hùng, jao glăi grê pơtao kơ Lang Liêu ană đah rơkơi ñu, tơlơi ră ruai tơkeng rai 100 asar boh, čeh jing 100 čô ană, pơhrôp hăng ayun suang. Mơ̆ng bruă ngă djơh hăng anun, djru kơ ƀing čơđai sang hră anăp glăi bruă mă amăng plơi pla ta đưm adih ƀơi djop kual djop tơring čar ƀôn lan dăp hơdră mơak biă mă”.

          Kiăng djru ƀing čơđai sang hră thâo hluh gru phun lŏn ia rơđah hloh, sang hră pơphun pơplông hơduah ĕp glăi tơlơi ră ruai gru phun rơnuk pơtao Hùng Vương, pơhưč lu čơđai sang hră čih anăn pơplông. Ƀing čơđai sang hră pơpha lu khul grup, pơpha lu črăn tơlơi tơña hăng lăi glăi, hơduah ĕp gru phun lŏn ia, gru grua hiam mơnuih ƀôn sang đưm pơdjơ̆ nao rơnuk pơtao Hùng Vương. Hrŏm hăng anun, djop anih hrăm prăp lui hơdôm tơlơi hrăm, kiăng pơhrôp glăi tơlơi ră ruai akhan đưm : Sơn Tinh –Thuỷ Tinh, pơtao ia hăng pơtao čư̆; tơlơi akhan glăi phun hơmâo ƀañ tơpung anung hla pơtơi juăt ƀañ čưng ƀañ yâi....Mơ̆ng anun djru kơ ƀing čơđai ƀuh hăng thâo hluh tong ten dơlăm hloh kơ djuai ania ta đưm adoh. Amôn Nguyễn Hoàng Nam, čơđai sang hră hrăm anih 8C, sang hră gưl dua Nguyễn Văn Cừ, hok mơak lăi:

 “Kâo pơhrôp tơdăm phu Đệ Nhị amăng tơlơi ngă sen akhan glăi gru phun ƀañ čưng ƀañ yâi. Mơ̆ng bruă ngă anun, kâo thâo hluh tong ten bruă mă mơ̆ng rơnuk pơtao Hùng jao glăi ngă pơtao kơ ană ñu Lang Liêu mơnuih rơgơi kơhnâo, khin hơtai laih anun thâo pơpŭ khăp kơ amĭ ama hăng pơčeh phrâo amăng bruă mă. Mơ̆ng anun, ăt kiăng pơđĭ tui pran jua gir mă bruă pơčeh phrâo ia rơgơi mơ̆ng mơnuih ƀôn sang Việt Nam. Kâo pơ-ư ang biă mă gru grua đưm djuai ania ta”.

Tui hăng ơi Nguyễn Văn Lợi, Kơ-iăng Khua sang hră gưl dua Nguyễn Văn Cừ, plơi prong Ƀuôn Ma Thuôt, tơring čar Dak Lak, bruă pơtô hrăm lịch sử ruai gru phun lŏn ia ngă tui lu hơdră. Rơngiao kơ bruă pơtô hrăm, ngă yang, ba gơnam pơyơr ƀơi pra yang, pơsat gru grua h’ŭ kơ pơtao Hùng, rơnuk anai hơmâo lu hơdră mơ̆n pơtô kơ čơđai sang hră thâo hluh tong ten kơ phun akha djuai ania dêh čar ta pô:

 “Pơtô pơhrăm kơ ƀing ană amôn čơđai sang hră thâo hluh kơ gru grua phun djuai ania, kơnung djuai drah kơtăk Lạc Hồng hăng thâo hluh tơlơi hơdor tơngia kơ ơi yă đưm đă ră hlâo amăng bruă akŏ pơdong hăng wai pơgang lŏn ia pioh kơ ƀing gơñu thâo khăp laih anun gơgrong ba bruă man pơdong lŏn ia tơdơi adih. Bruă ngă pơtô hrăm gơñu kiăng gir run hloh, ngui ngor mơak, pơjing hrơi mông ngui ngor tơpă hiam mơak”.

Kơnang kơ bruă mă hyu hrăm gah rơngiao kơ mông hrăm ƀơi sang hră, hăng hơdră pơphun bruă ngui ngor lu mơta djru čơđai sang hră ƀơi Dak Lak thâo hluh dơlăm hloh kơ gru phun lŏn ia laih anun ƀư̆ pran jau thâo khăp laih anun hrăm hơdeč amăng bruă tơpuôl, phung lu mơnuih ngă hrŏm, pơdah rai pran jua thâo gum pơgôp djuai ania hơdor glăi kơ phun tơdŭ lŏn ia. Anai lĕ rơnoh yom djru ƀing čơđai pơhrăm pran jua khăp kơ djuai ania, khăp kơ lŏn ia djă pioh gru grua hiam hăng anăn “Ƀong boh hơdor kơ pô pla mơñum ia hơdor kơ pô klơi” mơ̆ng djuai ania Việt Nam.