Ƀơi mông tŭ jum, ơi Tô Lâm lăi pơtong, Việt Nam čang rơmang ngă kơjăp hloh bruă hơdai gum hrŏm dêh čar Español amăng djop bruă, sa ding kơna phun laih anun jơlan pơtruh nao rai mơ̆ng kual Mi kô̆; lăi pơtong boh yom tal rai čuă jơmư Việt Nam blung a mơ̆ng sa čô mơnuih apăn akŏ Kơnuk kơna dêh čar Español yap mơ̆ng hrơi dua bơnah dêh čar akŏ pơjing bruă pơtom hiăp hăng đăo kơnang sit nik tal rai čuă jơmư anai amra pơtrut tơlơi ngă giăng mah “Jing bơnah ngă hrŏm anăp nao kơñ pơgi” Việt Nam-Español yak nao amăng rơnuk phrâo, pơdrong sah, hing ang laih anun pơgang boh tŭ yua kơ ană plơi pla dua bơnah dêh čar, yua kơ tơlơi rơnuk rơnua, ngă hrŏm hăng pơđĭ kyar amăng kual laih anun ƀơi rŏng lŏn tơnah kar kăi mơ̆n.

Dua bơnah tŭ ư hrŏm, kơtưn hloh bruă mă gah ling tơhan pơgang lŏn ia-rơnuk rơnua mơnuih mơnam, bruă ngă hmua pla pơjing, pơtô hrăm, laih dơ̆ng pok pơhư prong ngă hrŏm amăng bruă pơčeh pơblih phrâo, ia rơgơi tơlơi kơhnâo, sĭ mơdrô gơnam pơkra hrĕ añĕ pơkĕ apui lơtrik amăng măi mok, ba yua ia rơgơi mrô.