Tal pơdơi lơphet anai, mơnuih ƀôn sang ƀuôn Tơng Jŭ, să Ea Kao, plơi prong Buôn Ma Thuột, tơring čar Dak Lak glăk bơwih brơi kơ bruă čơkă tuai. Jing anih hơdip mơda mơ̆ng đưm hlâo mơ̆ng neh wa djuai ania Êđê, amăng ƀuôn ră anai dô̆ djă pioh lu phiăn juăt tơlơi hơdip mơda đưm, sang dlông, pin ia, hơdôm bruă rơngaih mơñam băn ai, trah rup... Amăng buôn ră anai hmâo 18 bôh sang anô̆ mơnuih ƀôn sang gơgrong mă pô tum pơƀut glăi, gum hrŏm ngă bruă tuai čuă ngui hăng hơdôm bruă mă čơkă tuai lông lăng bôh thâo đưm hlâo kah hăng pơkra gông brô̆, kŏng tơpai čeh, ƀong gơnam tơnă hơbai, tơlơi adôh suang... Amai H’ Wân Buôn Krông, ƀơi ƀuôn Tơng Jŭ lăi pơthâo, hơdôm bruă wai lăng tuai čuă ngui plơi pla ƀu kơnong kơ pơjing dong prăk pơhrui glăi ôh mơ̆ ñu dô̆ djru ƀing Êđê djă pioh bôh thâo đưm dong:

“Pơ̆ sang kâo hmâo laih sang dlông, đang hmua hăng ăt čang rơmang mơn djă pioh hơdôm bôh yôm bôh thâo đưm kah hăng čing, čeh. Lơm hmâo tuai čuă ngui nao sang kâo hmâo laih đang phun bôh, dơnao rông akan, laih anun tơlơi adôh đưm suang đưm, pơdah atông čing hơgor leng kơ hmâo hơđăp pioh mă yua, laih anun hmâo wot gơnam ƀong huă đưm mơ̆ng djuai ania Êđê pioh tuai lông lăng. Wot anih tuai dô̆ glăi, tuai amra pơdơi pơdă, anih dô̆ amăng hơdôm bôh sang dlông mơ̆ng pô”.

Yua pơđĭ tui anŏ gêh găl hăng lu jơlan hơdră ngă phara hloh, kual tuai čuă ngui hyu ĕp amăng glai klô dêh čar wai lăng Măng Đen, tơring glông Kon Plong, tơring čar Kon Tum ră anai jing anih pơhưč pran jua ƀing tuai rai pơ kual Dap Kơdư. Thun hlâo, Kon Plong hơmâo čơkă 1,2 klăk wơ̆t tuai nao ngui. Mơ̆ng akŏ thun truh ră anai, ƀing tuai nao jai hrơi lu, hmar hăng tuai jar kmar nao pơ Kon Tum jai hrơi lu. Mơ̆ng bruă djă pioh gru grua hiam đưm djuai ƀiă. Ơi A Khan, Khua git gai ping gah plơi Tu Cần, Kon Plong, brơi thâo: mơnuih ƀôn sang beč bal tui, thâo hluh djă pioh gru grua hiam djuai ania, kiăng pơjing rai gơnam sĭ mơdrô čơkă tuai hyu ngui, bơwih brơi kơ ƀing tuai, ñu lăi:

“Ră anai, plơi gơmơi hlăk pơphun hrăm adoh suang, atông čing, suang arap hăng ngă hrŏm amăng mông ngui ngor gru grua. Djop plơi pla bơkơtưn hrŏm mă bruă djă pioh gru grua hiam đưm djuai ania hăng pơdah brơi tuai lăng. Kiăng dưi bong glăi hăng tơlơi hơdip mơda, bơwih ƀong huă phrâo, rim čô mơnuih ƀôn sang pơ anai khom pơblih hơdră tơlơi pơmin, hơdră mă bruă, kiăng hrăm tui hăng bơwih brơi kơ tuai hyu ngui ƀơi Măng Đen, Kon Plong jai hrơi lu”.

Amăng pơđĭ kyar čơkă tuai hyu ngui, gong gai kơnuk kơna tơring čar Kon Tum đing nao biă mă boh tơhnal mă bruă mơ̆ng plơi pla mơnuih ƀôn sang djuai ƀiă. Mơ̆ng plơi prong Kon Tum nao pơ kual ataih tơring glông Tu Mrông, Đak Glei....boh nik ñu tơring glông Kon Plong, hơmâo akŏ pơjing lu mơta gơnam gru grua tuai čuă ngui, mơnong ƀong huă, găn rơgao dŏ glăi hăng ană plơi pla, kah hăng plơi Kon Kơtu, plơi prong Kon Tum, Tu Thó, Tu Mrông, Vi Rơngeo, Kon Vơng Kia, Kon Chênh, Kon Plong....hlăk jing anih anom pơ-ư ang kơ mơnuih ƀôn sang djuai ƀiă tơring čar Kon Tum.

Djru dong mơnuih ƀôn sang djă pioh ngă tui gru grua bôh thâo đưm, hơdôm thun rơgao, tơring čar Lâm Đồng ƀu pơdơi pok pơhai hơdôm akô̆ bruă pơdŏng glăi, hơkrŭ glăi lu phiăn ngă yang đưm. Ră anai tơring čar hmâo 84 mơta tơlơi ngă yang jơnum ngui đưm mơ̆ng djuai ania djop djuai ania ƀiă.

Amăng anun, lu phiăn jơnum ngui ngă yang glăk dưi djă pioh na nao hăng pơdŏng hơkrŭ glăi hơdôm phiăn jơnum ngui, kah hăng: Ngă pơsat pơthi gah djuai ania Čru hăng djuai K’ho ƀơi tơring glông Đức Trọng; ngă yang huă asơi hle mơ̆ng djuai ania K’ho Srê, tơring glông Di Linh; jơnum Bok Chu-bur gah djuai ania Čru; hơdôm phiăn ngă yang hmua pơdai kơdư gah djuai ania Mạ ƀơi tơring glông Bảo Lâm; ngă yang ba pơdai mut amăng atông; phiăn ngă yang rah pơdai; phiăn tô̆ rơkơi; phiăn jơnum ngui Lông Tồng gah djuai ania Tày... Tui tha plơi K'Keo, ƀơi plơi Hàng Làng, să Gung Ré, tơring glông Di Linh, bruă hơkrŭ glăi truh kih phiăn jơnum ngui tŭ yua phara ha jăn.

“Anai lĕ gru grua bôh thâo đưm sui hăng anai, hơkrŭ glăi pioh djă pioh kơ ană tơčô, thâo gru grua bôh thâo đưm mơ̆ng djuai ania pô. Ƀơi anăp tơlơi tơnap mơ̆ng rơnuk anai, samơ̆ hăng pran jua mơ̆ng neh wa kơ tơlơi ha pran jua, gum hrŏm hơbit hăng pơlir hơbit hmâo pơphun hơkrŭ glăi truh kih phiăn jơnum ngui mơ-ak huă asơi hle anai. Ƀing gơmơi mơ-ak biă, lăng ƀuh ư-ang lơm pơgang bôh thâo đưm mơ̆ng djuai ania pô”./.