Djop mơta bruă lêng kơ pơđĭ kyar prong soh pơhmu tui tơđar thun hlâo. Mrô jŭ yap tuh tia pơkra ming him lăng đĭ rơbêh 20%; abih tih mrô pơhrui sĭ gơnam tam hăng pơhrui mơng bơwih ƀơwang rơbêh 10.000 klai prăk; pơhrui ngăn drăp rơbêh 4.900 klai prăk. Bruă sĭ mơdrô pơ tač rơngiao, tuh pơ alin, gru grua-tuai čuă ngui hăng djru tơlơi hơdip mơnuih mơnam ăt ba glăi boh tŭ yua. Bruă djru man pơdong, ruh pơkra glăi sang dŏ jang jai, sang tơ̆i phŏ hơmâo pok pơhai ječ ameč, rơbêh 54% tui tơlơi pơkă.

Hrŏm hăng hơdôm boh than anun, jơnum ăt lăng nao tơpă sa, dua anŏ aka ƀu klă anun lĕ pơđĭ kyar bơwih ƀong huă aka ƀu hrưn đĭ kơtang; lu akŏ bruă tuh pơ alin dŏ kaih pok pơhai; mrô anom bơwih ƀong sĭ mơdrô pơdơi ngă bruă ăt dŏ lu. Amăng mông jơnum, ơi Nguyễn Đình Trung, Khua git gai Ping gah tơring čar Dak Lak rơkâo khua mua hơdôm boh ƀon lan, gơnong bruă amăng tơring čar gơgrong, khut khăt ngă tui hơdôm bruă jao ba tơbiă; pơplih pơkra kơ bruă gun găn amăng anih anom mă bruă tơdơi pơmut hrŏm ƀơi sa, dua anih anom, anăm brơi bơdjơ̆ nao kơ bruă mă hrŏm amăng tơring čar.