Amăng hrơi blan rơgao, Ping gah tơring čar hăng Jơnum min mơnuih ƀôn sang tơring čar Lâm Đồng hơmâo ba tơbiă lu tơlơi črâo trun, hră pơ-ar git gai, pơtrut pơsur hơdôm anih anom, hơdôm boh tơring glông, plơi prong amăng tơring čar đing nao mă yua djop ngă rơnoh pok pơhai man pơkra hơdôm ring bruă, akŏ bruă…Samơ̆, truh ră anai, bruă jao prăk tuh pơ alin man pơdong amăng tơring čar Lâm Đồng dŏ aset, ngă tui kơnong 1.446 klai prăk amăng abih tih rơbêh 9.340 klai prăk, dưm dưm 15,5% tui mrô pơkă.

Amăng mông jơnum, Khua Jơnum min mơnuih ƀôn sang tơring čar Lâm Đồng Trần Hồng Thái brơi thâo, bruă jao prăk tuh pơ alin man pơdong amăng tơring čar dŏ aset tui anai lĕ ngă ƀu djơ̆ ôh. Ñu rơkâo khua mua hơdôm boh tơring glông đing nao pơtrut tañ, kiăng ngă tui khut khăt bruă pơhrui glăi lŏn mơnai kiăng hơdôm akŏ bruă dưi pok pơhai jao prăk, amăng anun kiăng đing nao hơdôm akŏ bruă man pơkra jơlan rơdêh đuăi hmar.