Amăng rơwang thun 2021-2024, tơring čar Dak Lăk hơmâo pioh 35,7% mrô prăk pioh kơ bruă pơtô pơjuăt hăng pơtô hrăm bruă hăng rơbêh 28.300 klai prăk. Khă hnun, mrô mơnuih hơmâo hrăm bruă, hơmâo ƀang hăng mơnuih mă bruă rơgơi hơmâo ƀiă đôč. Ơi Nguyễn Bá Thành, Khua khul wai lăng ngă rah Khua phun kông ti pơčruh ngăn pơkra sik 333 Dak Lăk lăi, ră anai kông ti glăk pơtrut mă yua măi mok pơkra gơnam, samơ̆ ƀu hơmâo đơi ôh kông ƀơn apăn bruă kĭ thuâ̆t măi mok anun jing anom bruă khŏm pơtô mă pô kar hăng “djă tơngan pơčrâo brơi bruă”. Mah 75% mrô mơnuih mă bruă hơmâo hrăm ƀang laih, samơ̆ tơlơi rơgơi dlăm apăn bruă, biă ñu hơdôm bruă kiăng kiăo rơnuk phrâo hăng pơčeh phrâo lĕ kơƀah biă. Ơi Nguyễn Bá Thành lăi:“Boh thâo măi mok rơnuk phrâo aka ƀu hơmâo ôh bruă pơtô gah pơkra sik mơ̆ng phun tơbâo, jing gơmơi pơtô mă ƀơi anih, ƀing hlơi rơgơi pơtô brơi ƀing aka ƀu thâo ngă. Mơnuih hơđăp pơtô brơi mơnuih phrâo či mă bruă. Tơdah sang măi pơkiăo nao hrăm pơ anom bruă pơkŏn mơ̆ ƀu djơ̆ hrăm bruă gơñu mă lĕ jing lui soh mơn, ƀu thâo yua hơget ôh amăng bruă gơmơi kiăng”.

Tui hăng Nai prin tha Nguyễn Thanh Trúc, Khua sang hră Đại học Tây Nguyên, bruă kơƀah mơnuih mă bruă rơgơi pơ kual Dap Kơdư ră anai hơmâo lu tơlơi gun aka ƀu pơsir mơ̆ng bruă ruah mơnuih nao hrăm blung a mơtăm. Rơđah ñu, amăng mrô 35 bruă pơtô hrăm mơ̆ng sang hră, hơmâo lu bruă lăp djơ̆ hăng tơring čar kiăng, amuñ ĕp bruă hăng hơmâo prăk lu tơdơi kơ hrăm giong, samơ̆ ƀu pơhưč ƀing čơđai tui hrăm ôh:“Gah bruă ngă hmua pla kyâo ruah aset biă mơnuih hrăm, kar hăng thun 2024 kơnong kơ hơmâo 50% đôč. Khă hnun, amăng hră lăi pơthâo prăk pơhrui mơ̆ng čơđai sang hră tơdơi kơ hrăm giong gah bruă ngă hmua pla kyâo anai lu hloh kơ hrăm bruă pơkŏn, samơ̆ ƀing čơđai ƀu hor hrăm ôh bruă anai. Yua hnun glăk kơƀah mơnuih biă”.

Ƀơi kual Dap Kơdư, Dak Lăk jing tơring čar hơmâo lu mơnuih hloh, hăng rơbêh 2 klăk čô, samơ̆ tơlơi rơgơi mơ̆ng mơnuih mă bruă tơdu. Tui hăng ơi Nguyễn Thiên Văn, Kơ-iăng khua jơnum min mơnuih ƀôn sang tơring čar Dak Lăk, mrô mơnuih nao mă bruă tơdơi kơ hrăm giong, hơmâo hră pơsit ƀơi tơring čar kơnong kơ hơmâo 1/5 đôč. Lăp đing nao, tơring čar aka ƀu hơmâo mơnuih mă bruă rơgơi gah boh thâo măi mok phrâo, mă bruă tut gư̆ măi hăng mrô, pơkra gơnam hăng măi kơdah mă hơjăn. Tơlơi anai bơbeč djơ̆ tơlơi mă bruă hăng tơlơi dưi bơkơtưn mơ̆ng tơring čar:“Tơring čar Dak Lăk ră anai aka ƀu hơmâo lu anom bơwih ƀong sĭ mơdrô pơprong, lêng kơ anet hăng anet aneo, yua hnun ăt bơdjơ̆ nao bruă pơtô pơjuăt mơn. Mah hơmâo mơn hơdôm bruă pơtô hrăm pơlir hăng ngă lăng hlao mơtăm, samơ̆ anom bruă anun khŏm pok prong hăng pơđĭ kyar kah mơ̆ng dưi hơmâo mơnuih nao mă bruă”.

Tui hăng grup krăp lăng mơ̆ng Jơnum min gru grua - mơnuih mơnam mơ̆ng Ƀirô khua pơ ala mơnuih ƀôn sang dêh čar, Dak Lăk hơmâo tơlơi gêh gal prong biă samơ̆ tơring čar kiăng hơmâo hơdră ngă bruă sui thun, ngă ha amăng plĕ hăng sit nik hloh gah pơđĭ tui tơlơi rơgơi mơnuih mă bruă, biă ñu hơdră pơhưč mơnuih rơgơi glăi mă bruă, biă ñu mơnuih djuai ƀiă. Laih dong kiăng pơtruh kơplah wah sang hră, anom bơwih ƀong hăng gong gai kiăng hơmâo mơnuih mă bruă rơgơi, pơtô lĕ khŏm mă yua, djru mơnuih hrăm dưi glăi mă bruă pơ plơi hlao mơtăm.

Ơi Đinh Công Sỹ, Kơ-iăng khua Jơnum min gru grua mơnuih mơnam mơ̆ng Ƀirô khua pơ ala mơnuih ƀôn sang dêh čar lăi, bruă anai jai kiăng pơsir hmar hloh, lơ̆m bruă pơmut hrŏm tơring čar, să, lui hĭ gưl tơring glông ƀiă či giong laih. Sa boh tơring čar Dak Lăk prong hloh, hăng hơdôm rơtuh boh să amăng tơring čar, jai kiăng hơmâo mơnuih mă bruă rơgơi hloh:“Pơ anăp anai tơring čar prong biă, ƀing ta khŏm pơplih hơdră pơtô pơjuăt bruă mă, anih pơtô, laih anun tơring čar ăt kiăng prăp lui hlâo hơdră ngă bruă amăng hrơi blan pơ anăp. Tal dua lĕ lăng ba bruă pơčrâo brơi bruă mă či pơhưč nao ngă bruă amăng hơdôm boh sang bơwih ƀong glăk kiăng mơnuih mă bruă gah đang hmua, glai rưng”.

Pơđĭ tui mơnuih mă bruă, biă ñu mơnuih mă bruă rơgơi, ƀu kơnong jing tơlơi kiăng ƀơi anăp đôč ôh mơ̆ ăt jing phun atur đĭ kyar hơđong kjăp mơ̆ng Dak Lăk pơ anăp anai. Truh ƀing ta hơmâo mơnuih mă bruă rơgơi kah mơ̆ng thâo mơneč mă tơlơi gêh gal hăng hrưn đĭ kjăp kơtang hloh amăng rơnuk lŏn ia pơplih phrâo hăng mut hrŏm jar kmar./.