Bruă jơnum lăp đing nao amăng hơdôm hrơi rơgao lĕ ngă Lơphet hơdor glăi 50 thun Hrơi Tlaih rơngai kual Dơnung dêh čar, pơlir hơbit lŏn ia amăng lơ 30/5 ƀơi ƀôn prong Hồ Chí Minh. Mông ngă lơphet hơdor glăi kơdrưh kơdrom hăng prong, hăng tơlơi gum hrŏm mơ̆ng hơdôm rơbăn čô mơnuih ƀôn sang hăng tuai dêh čar tač rơngiao. Mông ngă Lơphet hơdor glăi 50 thun Hrơi Tlaih rơngai lŏn ia hmâo 48 khul tơhan rơbat trui, hăng năng ai ñu 13.000 čô mơnuih gum hrŏm rơbat trui. Khul ling tơhan dêh čar Khač, Lao hăng Kur gum hrŏm rơbat trui tal anai. Amăng mông ngă Lơphet hơdor glăi, khul ling tơhan pơphun pơanah 21 bôh phao kơnong ƀơi jua tơlơi adôh Lŏn ia Việt Nam. Khul tơhan pơgang rơhuông adai – Khul tơhan rơdêh por iâo pơhrui hơdôm pluh bôh rơdêh bek, rơdêh por blah wang pơdah ƀơi rơhuông adai.

Ƀơi ƀôn prong HCM jơnum hơdôm anih pơnah mlăi apui rup bơnga bơwih brơi mơnuih ƀôn sang lăng hrơi mơak kơ lŏn ia. Mlam lơ 30/4 pơnah mlăi apui bơnga lu hloh hăng hơmâo 28 bit anih pơnah mlăi apui bơnga anŏ dlông man ƀrô hăng 2 boh anih pơnah mlăi dlông hloh amăng ƀôn prong. Hrŏm hăng anun lĕ lu bruă mă pơdah thâo tơlơi bơngač apui pơčrang rup ƀơi adai rơngit amăng mlam lơ 26/4 hăng lơ 30/4 hăng 10.000 mơta rơdêh pôr anet ƀu hơmâo mơnuih mơgăt, gơnam pơpor đĭ pioh pơdah rup rap hiam djă jă tơlơi hiam anŏ klă kơ ƀôn prong HCM amăng 50 thun laih rơngao.

Hrŏm hăng anun ƀơi ƀôn prong Hồ Chí Minh pơphun hơdôm bruă mă pơdah tơlơi adôh suang phara ha jăn. Anun lĕ tô nao rai pơdah rup gưl lŏn ia “vang mãi khúc khải hoàn”. Jơlan hơdră adôh suang phara ha jăn yua kơ Ding jum bôh thâo, bơkơjăp hăng tuai čuă ngui git gai, gum hrŏm hăng ƀôn prong Hồ Chí Minh pơphun ƀơi ding Thống Nhất lơm lơ 29/4. Bruă pơdah ayup kèn pơkĕ hrŏm hăng hơdôm hră mă yua măi mok ƀơi axeh yua kơ Ding jum Kông ang git gai, pơdah ƀơi kual jơlan Lê Lợi hăng jơlan Nguyễn Huệ rơbah tơkai amăng ƀôn prong.

Ƀơi Hà Nội, jơlan hơdră adoh suang gah bruă kơđi čar anăn “Tơlơi pơƀuăn Kơdư hăng Dơnung” hơmâo pơphun ƀơi tơdron čưng boh lông dêh čar Mỹ Đình, hơmâo rơbêh 800 čô mơnuih thâo adoh suang, ƀing ngă phim hăng ƀing tơhan hơđăp, ƀing tom ƀuh hrơi mông lŏn ia pơklaih rơngai. Jơlan hơdră anai pơdah thâo gru phun kơ lŏn ia, tơlơi pơhing čih ră ruai tañ, bruă mă adoh suang hăng ƀing kơhnăk adoh suang phrâo rơnuk anai pơdah. Biă mă ñu amăng jơlan hơdră anai hơmâo 2 boh rơdêh ssar T54, rơdêh sar blah ayăt Mi. Tơlơi pơƀuăn kual Kơdư hăng Dơnung, hơmâo pơdong tơrưng adoh suang prong biă mă, hơmâo ƀut pơdong pleh ploh nao rai kiăng pơƀuh brơi kual Kơdư hăng Dơnung, tong krah hơmâo tơdrông tua Hiền Lương. Hrŏm hăng anun, hơmâo boh thâo ia rơgơi pơčrang apui 3D mapping ta blung a pơdah amăng jơlan hơdră djơh hăng anai.

Hlâo kơ anun, ƀơi Sang rông Thống Nhất (Gru grua lŏn ia phara ha jăn Ding Độc Lập) pơphun jơlan hơdră adôh suang “Lŏn ia pơhlôm tơlơi mơ-ak”. Jơlan hơdră hmâo 3 črăn: “Khát vọng thống nhất”, “Khát vọng vươn lên” hăng “Khát vọng hùng cường”; dưi pơdŏng hmâo tơhnal bơni gru grua, hmâo hơdôm djuai bơni, suang, pĕ gông, anih pơdah, anih anom pơhrôp, tơlơi ră ruai kơtuai akhan... pơdah glăi hơdôm rơwang gru grua đưm hur har mơ̆ng djuai ania, lŏn ia hăng pơtŏng sit tơhnal prong prin mơ̆ng Truh kih Bơyan bơnga thun 1975.

Ƀơi Hà Nội, Gong phun jua pơhiăp Việt Nam, pơphun jơlan hơdră phun adoh suang anăn “Khúc ca khải hoàn”. Jơlan hơdră anai, hơmâo 3 črăn : Hà Nội hmư̆ tơlơi pơhing blah dưi; Kơsung nao pơ Sài Gòn; Lŏnia tơdơi kơ pơlir jing sa. Sa črăn sa tơlơi ngă dlưh pran jua, pơƀuh glăi hrơi mông hing ang, lăp hơdor glăi sa boh lŏn ia Việt Nam pơblih phrâo, mut phung hăng pơđĭ kyar. Ơi Ngô Thiệu Phong, Khua anom bruă Hră pơhing Điện tử Gong phun jua pơhiăp Việt Nam lăi:

“Amăng jơlan hơdră “Khúc ca khải hoàn”, ƀing gơmơi kiăng pơhơdor glăi mông mơak hrơi blah dưi lơ 30/4/1975 ƀơi Gong phun jua pơhiăp Việt Nam. Biă mă ñu amăng anih pơhrip jua pơhiăp Gong phun jua pơhiăp Việt Nam, ƀing adơi ayong mă bruă čih pôr ƀơi anăp kơ tơlơi pơhing blah dưi lơ 30/4/1975. Hơdôm ƀing hơmâo tơlơi pơhing hmar blung a, gơñu mơak pran jua dưi pôr tơlơi pơhing gơñu kơ mơnuih ƀôn sang hmư̆ hrŏm, brơi kơ mơnuih hmư̆ brô̆ amăng đơ đam dêh čar hăng ƀơi rŏng lŏn tơnah, thâo kơ tơlơi pơhing prong, yom hloh ƀơi lŏn ia Việt Nam hơmâo pơklaih rơngai hlom bom laih”.