
Ding dăng truh hrơi kŏm či pơtô ană đah rơkơi ñu hơdor glăi tơlơi hrăm čing kram, ayong Y Duyệt Niê, ƀơi ƀuôn Phơng, să Ea Tul, tơring čar Dak Lăk ră ruai, anai jing hrơi mông yôm biă mă kiăng ngă kjăp hloh tơlơi khăp ƀu-eng hăng ană bă. Wơ̆t dua rơkơi bơnai ñu lêng kơ ngă nai soh, samơ̆ nao pơtô pơ ataih, hrơi mông mă bruă ƀu hơmâo pơdơi ôh, anun jing čem rông ană bă ƀu amuñ ôh. Ayong Y Duyệt brơi thâo, pơtô ană atông čing ƀu kơnong djă pioh gru grua Êđê đôč ôh mơ̆ ăt pơtruh tơlơi khăp ƀu-eng amăng sang anŏ:“Sang anŏ lêng kơ lăi pơthâo, ră ruai kơ tơlơi mơ-ak mơ-ai, biă ñu lĕ bruă mơ̆ ană bă dưi ngă lĕ ta gum ngă hrŏm. Kâo lêng kơ pơtă pơtăn ană bă hơdip tơphă, hơmâo tơlơi pơmin hiam. Hơmâo wan thơ, biă ñu amăng bơyan pơdơi prong lĕ pơtô ană bă atông čing kông čing kram laih anun brơi ană bă ngui hrŏm gơyut gơyâo, hăng ƀing tha, biă ñu lĕ mơnuih thâo hluh gru grua hiam mơ̆ng djuai ania Êđê”.

Hăng mơnuih čih tơlơi pơhing Đàm Thị Thuần, dŏ ƀơi phường Tân Lập, ñu juăt nao mă bruă pơ ataih biă, hrơi mông hai ƀu hơnong lơi. Tơlơi thâo hluh hăng tơlơi thâo djru mơ̆ng sang anŏ yơh ngă brơi ñu thâo bơkơnar bruă mă hăng sang anŏ. Amai Thuần mơak mơai lăi: tap năng bruă ñu ngă jing ia ƀlit pơlir brơi mơnuih amăng sang anŏ, ngă hơmâo tơlơi yôm phara biă mă:“Kâo hơmâo mă tơlơi djru lu biă mơ̆ng sang anŏ, yua dah kâo hơmâo sang anŏ khăp biă kơ bruă čih tơlơi pơhing. Rơkơi kâo hai juăt djru čih tơlơi pơhing mơn, ană đah rơkơi kâo lơ̆m bơyan pơdơi prong ăt čih tơlơi pơhing đơ anet kiăng hơmâo prăk blơi gơnam ñu hor. Hơdôm tal hyu ngui pơ ataih mơ̆ng sang anŏ gơmơi ƀu kơnong hyu ngui đôč ôh ăt jing hrơi hyu mă bruă hyu čih tơlơi pơhing mơn. Hơdôm tơlơi ră ruai anai yơh ngă brơi bruă čih tơlơi pơhing amuñ hloh”.

Tui hăng amai Nguyễn Minh Trang, dŏ ƀơi phường Tân An, Dak Lăk, djŏp rơnuk yơh kiăng sang anŏ mơak lĕ khŏm hơmâo tơlơi gum djru dua bơnah wơ̆t rơkơi hăng bơnai, ƀu djơ̆ kơnong đah kơmơi đôč ôh. Samơ̆ amăng tơlơi hơdip rơnuk anai, ƀing đah kơmơi kiăng prăp rơmet bruă mă lăp djơ̆, yôm hloh dong lĕ abih bang mơnuih amăng sang anŏ khŏm thâo hluh nao rai:“Kâo pơmin ngă bruă hơget tŭ mơn jing đah kơmơi yơh pô jŭ yap pơmin tong ten kah pơpha bruă mă lăp djơ̆ amăng sang anŏ, anun yơh yôm hloh. Kâo mơak biă lơ̆m hơmâo sang anŏ thâo hluh nao rai. Dua rơkơi bơnai gum ngă bruă amăng sang. Kah hăng bruă tơnă asơi hơbai añăm, kih rơmet..., ƀơi anŏ bơnai ƀu hmao lĕ rơkơi ngă, rơkơi ƀu hmao lĕ bơnai ngă; ană bă prong baih ăt thâo djru ngă bruă amăng sang mơn”.

Ơi Lê Phú Long, Kơ-iăng khua Gơnong bruă gru grua, bơrơguăt drơi jăn hăng tuai čuă ngui tơring čar Dak Lăk lăi, tơlơi hơdip rơnuk phrâo hăng lu tơlơi glêh tơnap glăk pơplih tơlơi hơdip amăng sang anŏ. Sang anŏ hơmâo lu rơnuk dŏ hrŏm hui đôč, ơi yă amĭ ama ană tơčô dŏ hrŏm pơhiăp tom ră ruai jai hrơi aset tui, yua dah ƀing čơđai ñu mă yua boh thâo phrâo, hyu mă bruă, laih dong dŏ ataih. Yua hnun yơh, Ping gah hăng Kơnuk kơna hơmâo lu tơlơi djru kiăng akŏ pơdong sang anŏ rơnuk pơplih phrâo.
Ơi Lê Phúc Long lăi rim boh sang anŏ kiăng hơmâo bruă mă hrŏm kiăng sang anŏ jê̆ giăm dŏ hrŏm hơbit:“Ră anai kiăng hơmâo 3-4 rơnuk dŏ hơdip hrŏm sa boh sang jing tơnap biă. Yua hnun mơn ƀing ta kiăng hơmâo bruă kiăng ngă hiư̆m pă mah glăk ngă bruă lu, ƀu hơmâo wan, tơlơi hơdip pơplih tui kar hăng ră anai samơ̆ ăt pioh mông kơ sang anŏ mơn. Mơ̆ng hơdôm bruă kah hăng hrơi pơplông pioh kơ sang anŏ, bruă ngui ngor kiăng sang anŏ bơră ruai, kah pơpha, lăng ba, gum djru nao rai. Mơ̆ng anun čang rơmang hiư̆m pă amăng sang anŏ kiăng jê̆ giăm dŏ hrŏm hơbit, sang anŏ yâo mơak, trơi pơđao anun kah mơnuih mơnam mơ̆ng đĭ kyar”.
Bong kjăp tơlơi yâo mơak amăng sang anŏ ƀu kiăng tơlơi hơget prong đơi ôh, ñu hơmâo mơ̆ng tơlơi anet aneo đôč, tơlơi thâo hluh, thâo khăp pap mơ̆ng rim čô mơnuih. Mah ƀơi hơdôm boh plơi ataih ƀudah amăng plơi prong, kơnong kiăng rim čô mơnuih gum pơgôp ƀiă tơlơi khăp ƀu-eng, thâo lăng ba, thâo djru nao rai tui anun sang anŏ amra pơđao na nao, mơ-ak na nao, jing anih kơnang kjăp amăng tơlơi hơdip rim čô mơnuih./.
Viết bình luận