Yă Rčom H’ Phít, Khua git gai Ping gah să Ia Khươl, brơi thâo, mơnuih ƀôn sang ƀơi anai čang rơmang Gia Lai amra pơplih phrâo pơđĭ kyar kơtang. Ră anai tơring čar hmâo ia rơsĭ anun tơhnal gal mơ̆ng čư̆ siăng prong prin amra dưi ngă tui:

“Tơdơi kơ pơmut hrŏm, tơlơi pơkĕ hrŏm čư̆ siăng hăng kual lŏn đang hmua prong biă, amra pơkĕ hrŏm hăng ia rơsĭ lĕ tơring čar Gia Lai amra hmâo tơlơi pơlir hơbit kơjăp kơ logistic amăng bruă ngă đang hmua, sĭ gơnam kơ dêh čar tač rơngiao, bơwih ƀong mơ̆ng ia rơsĭ… Kâo pơmin lĕ tơlơi pơkĕ hrŏm anai amra pok jơlan kơ sa Gia Lai sa tơlơi pơđĭ kyar phrâo hnuă”.

Ơi Nguyễn Danh, sa čô mơnuih juăt hăng rơbêh kơ 40 thun ƀơi Gia Lai, lăng ƀuh bruă pơmut hrŏm Gia Lai hăng Bình Định amra tañ pơtlaih hơdôm tơlơi gun kơ tơlơi pơđĭ kyar. Hơdôm măi mok pioh kơ pơđĭ kyar apui yua pơkra glăi, măi mok pơkra gơnam ƀơi Gia Lai, amra nao tơpă mơ̆ng tơdrun tum păn tơring čar găn jơlan đuăi hmar amra dưi pơdŏng. Mrô lu gơnam tam hrŏm hăng rơdêh gêh gal đuăi tui glông ia. Ơi Nguyễn Danh lăi:

“Lơm pơmut hrŏm Gia Lai amra hmâo gơnam pioh pơkra, apui yua pơkra hăng dưi sĭ kơ dêh čar tač rơngiao tui jơlan tơdrun tum păn ia rơsĭ, jơlan rơdêh por ƀudah tui jơlan bah amăng guai dêh čar hăng hơdôm bôh dêh čar Đông Dương pơjing rai jơlan pơkĕ hrŏm gah bruă ngă rai gơnam tam, gah pơkra gơnam tam, sĭ gơnam kơ dêh čar arăng hrŏm hăng anun pơđĭ kyar jơlan glông logistic mơ̆ng tơring čar phrâo hluai tui hơdôm glông jơlan Kơdư – Dơnung hluai tui jơlan mrô 1 hăng jơlan Ngŏ – Yŭ tui jơlan 19”.

Tui hăng mrô yap, tơring čar Gia Lai phrâo, hmâo lŏn prong 21.000 km2, mrô mơnuih giăm truh 3,6 klăk čô mơnuih – dŏng amăng ƀut tơring čar hmâo kual lŏn hăng mrô mơnuih lu hloh đơ đam dêh čar. Khua Jơnum min mơnuih ƀôn sang tơring čar, ơi Phạm Anh Tuấn lăi rơđah, kiăng tañ ngă tui hơdôm anô̆ gal, tơhnal gal glai – ia rơsĭ, tơring čar amra đing nao 3 tơlơi pơplih phrâo khom dưi: pơplih mơ̆ng tơlơi pơmin wai lăng hơdai nao bơwih brơi, mơ̆ng hră pơ-ar hơdai nao pơčeh phrâo, hăng mă mơnuih ƀôn sang – anom bơwih ƀong ngă phun akha amăng djop tơlơi pơsit.

“Tơring čar Gia Lai phrâo lĕ tơlơi ruah mă mơ̆ng dua kual lŏn hmâo phiăn juăt, anô̆ kơpal bruă hơkrŭ ư-ang, gru grua bôh thâo đưm lu mơta. Biă ñu pran jua gum hrŏm hơdit hăng tơlơi čang rơmang hrưn đĭ kơtang gum hrŏm pran jua ngă bruă khut khăt ha amăng plĕ ba glăi bôh tơhnal yua kơ pơgi kơdih anai pơđĭ kyar lăp djơ̆”.

Ơi Hồ Quốc Dũng – Khua git gai Ping gah tơring čar Gia Lai – brơi thâo, tơring čar pơsit pran jua ngă tui tơhnal pơkă pơđĭ kyar 8% amăng thun anai, pơjing pran gơgrong pioh kơ rơwang 2026-2031 djơ̆ tui rơnoh đĭ kyar dua mrô:

“Tơdơi kơ pơmut tơring čar lĕ rơnoh bruă bơwih ƀong mơ̆ng tơring čar Gia Lai phrâo năng ai ñu rơbêh kơ 250 rơbâo klai prăk, hmâo wot sa kual čư̆ siăng prong prin, 134km hang ia rơsĭ, sa kual lŏn dăo klă hiam, dua bôh tơdrŏn rơdêh por, tơdrun tum păn, hmâo jơlan rơdêh treng, jơlan ƀơi rŏng lŏn… Tum pơƀut djop tơlơi gal, mut hrŏm, rơnuk rơnua, tơlơi dô̆ glăi lĕ ngă hiưm hơpă gir run ngă tui hơdôm tơhnal gal pioh pơđĭ kyar tơring čar Gia Lai jing sa tơhnal đĭ kyar mơ̆ng kual”.

Mơ̆ng hơdôm bôh than phun kah hăng rơnoh pok tơbiă jơlan nao rai, kah hăng tơdrŏn rơdêh por, tơdrun tum păn, rơdêh treng, jơlan prang…, truh tơlơi lu mơta mơ̆ng lŏn drŏn – bơwih ƀong: Ia rơsĭ, kual lŏn dăo, čư̆ siăng, tơring čar Gia Lai phrâo dưi čang rơmang amra jing bruă čung jơlan đĭ kyar kual Tŏng Krak – Dap Kơdư amăng rơwang tô̆ tui./.