Tlam (24/9), ƀơi Ƀirô Kơnuk kơna, Khua dêh čar ơi Phạm Minh Chính git gai jơnum tal 4 Khul git gai mơng Kơnuk kơna kơ bruă pơđĭ kyar yua boh thâo ia rơgơi, pơplih pơčeh phrâo hăng akŏ bruă mrô 06. Ngă tui tơlơi pơtrun mrô 57 mơng Ding jum kơđi čar, truh ră anai bruă yua boh thâo ia rơgơi, pơplih pơčeh phrâo hăng pơplih mrô hơmâo yak nao pơđĭ kyar kơtang. Blan 8 thun anai, Việt Nam dong amăng Top 10 jar kmar kơ pơđuăi glông yua Internet; 1/4 mrô mơnuih mă yua 5G; pok mă yua anom bruă djă pioh hră pơ-ar dêh čar mrô 1; mă yua glông hrĕ internet amăng rŏng lŏn glông giăm 4.000 km tô nao rai hăng 5 boh dêh čar. Gơnong bruă tuh tia pơkra ming yua boh thâo phrâo tŏ tui pơsit tong tơlơi gơgrong phun lơm 8 blan rơgao pơhrui rơbêh 3,2 klăk klai prăk…

Amăng mông jơnum, Khua dêh čar ơi Phạm Minh Chính lăi rơđah, hơdôm tơlơi pơtrun mơng Ding jum kơđi čar phrâo ba tơbiă bruă bơdjơ̆ nao yua boh thâo phrâo, pơplih pơčeh phrâo, pơplih mrô; yua anun gir ngă rĭm hrơi, rĭm mông kiăng ba boh thâo ia rơgơi, pơplih pơčeh phrâo hăng pơplih mrô  amăng djop bruă mă. Khua dêh čar rơkâo ječ ameč pơjing giong anih djă pioh hră pơ-ar djop gơnong bruă, djop gưl amăng thun anai. Khua dêh čar lăi pơtong, hăng pran jua pok pơhai ječ ameč, tŭ yua, pơtrut tañ djop mơta; kiăng lăng mơnuih ƀôn sang, anom bơwih ƀong sĭ mơdrô ngă phun, ngă pô, tơlơi pơtrut, ngăn rơnoh amăng pơđĭ kyar. Kơ ngă tui gong gai 2 gưl, Khua dêh čar rơkâo đing nao pơgiong pơplih mrô, sit biă ñu gưl ƀon lan.