Lơ 24/9, Ping gah tơring čar Gia Lai pơphun Jơnum hrŏm bruă kơplah wah khul apăn bruă Ping gah tơring čar hăng khul apăn bruă Ping gah 135 boh să, phường kiăng lăng glăi boh than ngă tui hơbô̆ bruă gong gai ƀon lan 2 gưl tơdơi kơ giăm 3 blan pok pơhai. Tui lăi pơthâo amăng mông jơnum, djop anom bruă Ping gah, gong gai, Jơnum min djop djuai ania mơnuih mơnam hăng khul grup ƀon lan hơmâo pok pơhai hruaih, tŭ yua. Anom bruă ngă hră pơ-ar gưl să mă bruă klă tui tơlơi rơkâo djru brơi mơnuih ƀôn sang hăng anom bơwih ƀong sĭ mơdrô. Đơ đam tơring čar hơmâo čơkă mă giăm rơbêh 300.000 hră pơ-ar, amăng anun rơbêh 90% pơsir brơi djơ̆ hăng hlâo hrơi mông pơkă.

Amăng mông jơnum, lu tơlơi pơgôp hiăp rơkâo tơring čar đing nao kah pơpha prăk man pơdong anih anom să, phường phrâo tơdơi kơ pơmut hrŏm; djru brơi gơnam măi mok, pơhrua biên chế ƀơi hơdôm anih dŏ kơƀah mơnuih mă bruă. Hơdôm boh ƀon lan ăt rơkâo tuh pơ alin man pơkra anih anom, jơlan glông, dơnao pơkŏng ia, sang hră, sang ia jrao, sang gru grua. Tui Khua git gai Ping gah tơring čar Gia Lai ơi Hồ Quốc Dũng, djop să, phường kiăng tŏ tui dưm dăp anih anom, pơhrua mơnuih apăn bruă, pơjing jơlan hơdră bruă mă tong ten, khut khăt ngă tui hơdôm hơnong pơkă pơđĭ kyar, pơlir hăng bruă pơhrŏ trun ƀun rin, pơhlôm tơlơi hơdip mơnuih mơnam. Ơi Hồ Quốc Dũng lăi pơtong, kiăng đĭ kơtang ƀiă dong boh tŭ yua bruă mă, tŏ tui pơtrut kơtang kah gưl, jao bruă glăm ba brơi rĭm boh să.