Tlam lơ 24/9 ƀơi Hà Nội, Khua git gai Ping gah dêh čar ơi Tô Lâm, Khua git gai Ping gah ling tơhan gơnong glông nao jơnum hăng đĭ pơhiăp amăng mông jơnum ƀơi Jơnum pơplông ngă truh kih djop khul ling tơhan tal XI rơwang thun 2020-2025. Khua git gai Ping gah dêh čar ơi Tô Lâm pơpŭ hơdôm tơlơi dưi prong mơng hơdôm anom bruă, ƀing mơnuih hăng khul grup dưi ngă amăng pơplông ngă truh kih amăng hrơi blan rơgao; laih dong brơi thâo tơlơi lar hyu mơng tal pơplông ngă truh kih ƀu djơ̆ kơnong dŏ glăi amăng puih kơđong, anom bruă ling tơhan đôč ôh mơ̆ ăt ngă lar hyu pơ hơdôm ding jum, gơnong bruă, ƀon lan, anom bơwih ƀong sĭ mơdrô hăng mơnuih mơnam, pơgôp ba gru amăng pơplông khăp kơ lŏn ia rơkâo pok prong amăng đơ đam amăng rơnuk pơjing hăng wai pơgang lŏn ia.

Kiăng tŏ ngă tui hơdôm boh than dưi ngă anai, Khua git gai Ping gah lăi rơđah bruă amăng rŏng lŏn tơnah, amăng kual pơ anăp anai dŏ lu tơlơi glêh tơnap, bruă blah ngă yua boh thâo phrâo jai kơtang tui; yua anun tơlơi rơkâo pơjing hăng wai pơgang lŏn ia amăng rơnuk phrâo khŏm pơplih brơi kjăp bruă, thâo rơgơi, pơplih phrâo, kiăng hơdeč hmar, thâo yua boh thâo phrâo. Amăng hrơi blan pơplông ngă truh kih khŏm dưi ngă: Ling tơhan ngă bruă tui hơnong pơkă hơmâo pơtop hrăm sit nik, giăm ƀing mơnuih, jê̆ anih, phao kơtuang, lăng bruă pơkra phao kơtuang tui boh thâo phrâo lĕ bruă khŏm ngă, lăng bruă hruă kjăp, rơnuk rơnua lĕ glông jơlan phun. Ƀrô tal anai, Khua mua Ding jum ling tơhan hơmâo jao hla kơ pơplông brơi 84 khul grup; ƀơi hră pơpŭ brơi hơdôm khul grup hăng ƀing mơnuih yua hơmâo lu tơlơi truh kih amăng bruă pơplông truh kih amăng djop khul ling tơhan tal 11.