Jơnum hơmâo pơgôp hiăp amăng 8 boh tơhnal. Yôm hloh lĕ črăn hră lăi pơthâo boh than krăo lăng tui bruă phara: “Bruă ngă tui hơdră bruă, tơlơi phiăn kơ pơđĭ kyar hăng mă yua mơnuih mă bruă lăp djơ̆ hăng tơlơi rơkâo pơđĭ kyar bơwih ƀong huă-mơnuih mơnam, sit biă ñu lĕ mơnuih mă bruă thâo rơgơi”, pơplih pơkra jơlan hơdră čih pơkra tơlơi phiăn thun 2025; pơgôp hiăp amăng bruă klah čun Jơnum lok 9 hăng pơgôp hiăp blung a kơ bruă prap lui jơnum lok 10…

Jơnum min apăn bruă Khua pơ ala mơnuih ƀôn sang sem lăng, tŭ yap 3 tơlơi pơtrun tui tơlơi glăm ba, hơmâo: Tơlơi pơtrun čih pơkra glăi, pơhrua sa, dua tơlơi amăng tơlơi pơkă bruă mă mơng Jơnum min apăn bruă Khua pơ ala mơnuih ƀôn sang; tơlơi pơtrun kơ bruă pơphun hăng mă ngă mơng hră pơhlôm nua mơnuih mơnam, hră pơhlôm brơi mơnuih rơngiă bruă rơwang thun 2025-2027; tơlơi pơtrun kơ pơkôl pơkă, hơnong pơkă hăng rơnoh kah pơpha prăk yua rĭse ngăn drăp kơnuk kơna thun 2026.

Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, jơnum pơphun tơdơi kơ jơnum lok 9 mơng Khua pơ ala mơnuih ƀôn sang ba glăi tơlơi truh kih. Jơum anai hơmâo tŭ yap mă yua tơlơi pơtrun pơplih pơkra, pơhrua sa, dua črăn amăng Phiah phiăn thun 2013, tŭ yap 34 tơlơi phiăn, 34 tơlơi pơtrun. Ră anai ƀing Khua pơ ala mơnuih ƀôn sang glăk ngă tui bruă pơbưp mơnuih ƀôn sang ƀơi 34 boh tơring čar, ƀôn prong amăng đơ đam dêh čar. Sit biă ñu, tơdơi kơ jơnum lok 9, Khua pơ ala mơnuih ƀôn sang, kơnuk kơna, djop Ding jum, gơnong bruă hăng gong gai ƀon lan pok pơhai ngă bruă mơtăm, sit biă ñu lĕ bruă pok pơhai gong gai ƀon lan dua gưl.

Tui Khua git gai pơ ala mơnuih ƀôn sang dêh čar, bruă pơgôp hiăp blung a kơ črăn hră lăi pơthâo boh than krăo lăng tui bruă phara: “Bruă ngă tui hơdră bruă, tơlơi phiăn kơ pơđĭ kyar hăng mă yua mơnuih mă bruă lăp djơ̆ tơlơi rơkâo pơđĭ kyar bơwih ƀong huă-mơnuih mơnam, sit biă ñu mơnuih mă bruă thâo rơgơi” sit nik biă mă, kiăng ba glăi tơlơi yôm amăng hơdră bruă lơm lŏn ia ta glăk yak nao rơwang pơđĭ kyar phrâo, kiăng mơnuih mă bruă thâo rơgơi ngă atur brơi pơđĭ kyar tañ hăng hơđong kjăp.

Pơ anăp anai, Ding jum kơđi čar ăt amra ba tơbiă hơdôm tơlơi pơtrun đing nao pơđĭ kyar pơtô hrăm, pơtô pơjuăt hăng amăng bruă bơwih brơi tơlơi suaih pral mơnuih ƀôn sang. Phrâo rơgao, Khua pơ ala mơnuih ƀôn sang hơmâo tŭ yap mă yua 3 tơlơi pơtrun yôm phun amăng bruă boh thâo phrâo, pơplih pơčeh phrâo, pơplih mrô; tơlơi pơtrun pơplih phrâo bruă čih pơkra hăng mă yua tơlơi phiăn lăp djơ̆ hăng tơlơi rơkâo pơđĭ kyar lŏn ia amăng rơnuk phrâo; tơlơi pơtrun kơ pơđĭ kyar bơwih ƀong huă mơnuih ƀôn sang ngă pô.

Hrŏm hăng anun, jơnum lok 9, Khua pơ ala mơnuih ƀôn sang hơmâo tŭ yap mă yua tơlơi phiăn nai pơtô, tơlơi pơtrun lui duh, djru brơi prăk hrăm hră kơ ƀing čơđai sang hră čơđai muai, ƀing sang hră djop gưl. Kơnuk kơna hơmâo tơlơi pơtrun kơ bruă djru brơi ƀing čơđai kual ataih, asuek…

Kơ bruă sem lăng pơplih pơkra Jơlan hơdră čih pơkra phiah phiăn thun 2025, Khua git gai pơ ala mơnuih ƀôn sang dêh čar ơi Trần Thanh Mẫn rơkâo kiăo tui tơlơi rơkâo sit nik. Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, thun 2025, jơlan hơdră čih pơkra tơlơi phiăn kiăng djơ̆ tơlơi rơkâo pơtrut pơsir hĭ hơdôm tơlơi tap tap, gun găn amăng bruă bơwih ƀong huă-mơnuih mơnam, ling tơhan, wai pơgang rơnuk rơnua kah hăng pơjing anih anom mă bruă gong gai 2 gưl:

“Tơdơi kơ rĭm wŏt jơnum, ƀing ta amra pơphun lăng glăi djop mơta, mơng anun, tum pơƀut glăi hơdôm bruă kiăng tŏ tui ngă, pơplih phrâo kiăng ba glăi tŭ yua, pơtrut kơtang amăng bruă mă mơng Ƀirô Khua pơ ala mơnuih ƀôn sang. Jơnum lok 10 lĕ jơnum rơnuč rơwang ngă bruă, pơgiong hơdôm bruă jao ba tơbiă, laih dong ngă atur brơi rơwang ngă bruă phrâo. Hăng tơlơi yôm phun anun, bruă prap lui kiăng klă hloh, gơgrong, pơplih phrâo kơtang wŏt boh tơhnal, jơlan gah hăng bruă mă kiăng pơsit tong tơlơi gơgrong čung ba, črâo ba mơng Ƀirô Khua pơ ala mơnuih ƀôn sang dêh čar hăng Kơnuk kơna”.

Khua git gai pơ ala mơnuih ƀôn sang dêh čar brơi thâo, pơ anăp anai lĕ hơdôm blan rơnuč amăng rơwang mă bruă mơng Ƀirô Khua pơ ala mơnuih ƀôn sang dêh čar tal XV hăng bruă mă lu biă mă, lu bruă jao kơđi čar yôm phăn, hăng tơlơi rơkâo prong ƀiă hăng pran gơgrong prong tui mơn. Yua anun, hơdôm anom bruă mơng Ƀirô Khua pơ ala mơnuih ƀôn sang kiăng gum hrŏm kjăp hăng Kơnuk kơna, hơdôm anom bruă bơdjơ̆ nao, đing nao pơgiong hơdôm bruă jao amăng jơlan hơdră, akŏ bruă ba tơbiă amăng thun 2025 hăng amăng ha rơwang ngă bruă tal XV. Laih dong, krăo tui tơlơi git gai mơng gưl glăm ba, gơgrong kiăo tui lăng hăng pok pơhai mơtăm hơdôm bruă jao phrâo, laih dong, ječ ameč prap lui hơdôm boh tơhnal mơ-it nao Jơnum min apăn bruă Khua pơ ala mơnuih ƀôn sang pơhlôm djơ̆ hrơi mông, ngă bruă klă, anăm tum pơƀut glăi mă bruă giăm hrơi jơnum./.