Amăng tal nao čuă gưl kơnuk kơna truh pơ dêh čar Hàn Quốc, tlam lơ 12/8, ƀơi plơi prong jưh jom Seoul, Khua git gai ping gah ơi Tô Lâm hơmâo mông bưp hăng khua git gai pơ ala mơnuih ƀôn sang dêh čar Hàn Quốc, ơi Woo Won Sik. Ƀơi mông bưp, Khua git gai ping gah ơi Tô Lâm đăo kơnang dêh čar Hàn Quốc amra pơtrut tui bruă mă kơtang hloh pơđĭ kyar, tŭ mă lu boh tơhnal prong hloh, jai hrơi pơđĭ tui kơnuih amăng kual hăng jar kmar, amăng anun bruă Hàn Quốc djă bong kơjăp tơlơi gơgrong yom mơ̆ng sang bruă khua git gai pơ ala mơnuih ƀôn sang dêh čar.

Khua git gai ping gah ơi Tô Lâm rơkâo dua bơnah ngă hrŏm tong ten pok pơhai tŭ yua tơlơi phiăn ngă hrŏm dua bơnah hăng lu bơnah kah hăng pok prong bah amăng ba sĭ mơdrô gơnam tam mơ̆ng Việt Nam pơmut nao amăng dêh čar Hàn Quốc. Dua bơnah ăt pơčrong sai lu tơlơi amăng kual hăng jar kmar mơ̆ dua bơnah đing nao laih anun dong yua tơdruă amăng bruă ngă tui tơlơi phiăn jơnum lu dêh čar, amăng anun hơmâo khul pơlir hơbit djop sang bruă khua pơ ala mơnuih ƀôn sang dêh čar (IPU), khul ngă hrŏm sang bruă khua pơ ala mơnuih ƀôn sang djop dêh čar kual ASIA yua kiăng rơnuk rơnua iâu klah čun ( AAPP); tŭ ư hrŏm kơtưn bruă ngă hrŏm plah wah hơdôm bơnah ping gah git gai kơnuk kơna ƀơi kual ASIA.