Hơjan prong sui hrơi ƀơi lu anih anom amăng kual gah ngŏ tơring čar Dak Lak, ngă kơ hơdôm rơtuh hekter hmua pơdai, đang hơbơi plum ƀơi să Hòa Thịnh ia dăo. Tui hăng să anai lăi, năng ai 300 hektar đang hơbơi ƀlang, hơbơi plum hăng rơbêh 600 ha hmua pơdai bơbeč djơ̆ sat răm.

 Să hơmâo iâu pơtum brơi nao 15 čô tơdăm dra mut phung hrŏm 50 čô khua mua, mơnuih apăn bruă, ling tơhan, tơhan kông an nao djru mơnuih ƀôn sang yuă pơdai, pơhrui gơnam đang hmua. Tơhan Trung đoàn 888, gah sang bruă khua tơhan tơring čar Dak Lak, kơtưn djru brơi nao 70 čô khua mua, ling tơhan glăi pơ să Hòa Thịnh ngă hrŏm hơpuă yuă hĭ hmua pơdai tơsă laih, buč hơbơi ƀlang dŏ glăi, kiăng plai ƀiă rơnoh răm ƀăm yua hơjan hlim ia ling dăo ngă. Hrŏm hăng djru ba mơnuih ƀôn sang, să Hòa Thịnh ăt hlăk dăp hơdră bong lui hlâo tui hluai hnơ̆ng tơdu ƀudah kơtang, brơi ƀing ling tơhan djop sang bruă, gơnam yua, rơdêh đĭ, djru pơgang brơi mơnuih ƀôn sang hăng pơhrŏ ƀiă anŏ răm ƀăm truh yua lơ̆n adai ngă.

Tơdơi kơ 2 wŏt hrơi tơjuh hơjan hlim djop bit anih, bruă ia ling dăo hăng lŏn tơhroh ƀơi hơdôm boh plơi pla amăng tơring čar Lâm Đồng glăk ngă tơnap tap.

Tlam kơnôl 23/9, Jơnum min mơnuih ƀon sang tơring čar rơkâo djop ƀon lan pel ĕp, ba đuăi mơnuih ƀôn sang mơng kual hŭi rơhyưt, amuñ ƀuh ia kor, lŏn tơhroh; laih dong nao tơl hơdôm kual ia guang dar, pơhlôm brơi mơnong ƀong huă, gơnam yua, anăm brơi mơnuih ƀôn sang rơmon rơpa. Rơma boh să bơdjơ̆ nao kơtang hơmâo Cát Tiên 2, Cát Tiên 3, Quảng Khê, Đam Rông 2 hăng Quảng Sơn hơmâo arăng rơkâo pơkiăo nao ling tơhan, gơnam măi mok djru brơi mơnuih ƀôn sang. Hơjan ia ling dăo ngă giăm 60 boh sang bơdjơ̆ nao, rơbêh 1.000 ektar phun pla ia lip; kơnong să Hàm Kiệm hơmâo giăm 400 ektar phun thanh long ia dăo dơlăm. Jơlan čun čoe Gia Bắc rôk tui jơlan mrô 28 tŏ tui ƀuh lŏn tơhroh, ngă rơdêh ƀu thâo nao rai. Aka ƀu hơmâo mơnuih rơngiă amăng tal hơjan ia ling dăo anai.