Ƀu ba pơƀuh boh thâo mrô gah măi mok, ia rơgơi yom hiưm pă ôh, mông jơnum anai lăi nao hơdôm bruă bơdjơ̆ nao bruă pơkra gơnam, sĭ mơdrô rim hrơi mơ̆ng mơnuih ngă hmua, kah hăng hyu ĕp hăng pơsit rơđah tơlơi pơhing, mă yua AI, livestream, sĭ gơnam online, djru ba ƀing tuai blơi gơnam, hăng pơtruh anih sĭ mơdrô; lăi nao bruă kiăng mơnuih ngă hmua dưi mă yua boh thâo mrô kiăo tui anŏ či kiăng.

Yă H’Giang Niê, Khua khul mơnuih ngă hmua tơring čar Dak Lăk lăi lĕ, Dak Lăk hơmâo lu tơlơi gêh găl kơ bruă ngă hmua, hăng lu mơta gơnam hmư̆ hing. Khă hnun, pơkra gơnam klă jing bruă năng blung a đôč. Mơnuih ngă hmua ăt lăp đing nao gru mrô, hruh pioh gơnam, hră pơčrâo anih pla, anăn gơnam hmư̆ hing, pơƀuh hyu hăng tơlơi thâo rơgơi pơkra gơnam kiăo tui anih sĭ mơdrô kiăng. Laih dong khŏm ba gơnam pơdă amăng plang internet đah mơ̆ng pơđĭ tui anŏ yom, dưi ba sĭ tañ hloh. anai jing hơdôm bruă kiăng biă mă, khŏm ngă yơh amăng mông anai: “Kiăng djru ba mơnuih ngă hmua dưi ngă pô ƀơi anih sĭ mơdrô, bruă kiăng ngă hlâo mơ̆ng ƀing gơmơi lĕ pok anih pơtŏp hrăm, djru neh met wa thâo rơđah djŏp bruă či ngă. Laih dong, Khul pơtô brơi mơnuih ngă hmua ngă hrŏm hăng ƀing KOC, KOL či ba gơnam mơ̆ng hmua sĭ amăng anih mơdrô điện tử. Tơdơi kơ anun, gơmơi amra akŏ pơdong khul djru ba sĭ gơnam mơ̆ng hmua, pơtô brơi neh met wa livestream sĭ gơnam ăt kah hăng pơčrâo brơi hơdôm glông sĭ mơdrô pơkŏn dong. Tơlơi čang rơmang prong hloh mơ̆ng ƀing gơmơi lĕ: Mơnuih ngă hmua pơpă, Khul ngă hmua pơ anun; Khul ngă hmua yơh anih đăo kơnang, mă bruă tơpă sit, gum djru neh met wa amăng hrơi blan mă yua boh thâo mrô”.

Ƀơi mông jơnum, ƀing khua ăt lăi nao bruă ngă hiưm pă kiăng ƀing blơi gơnam đăo kơnang, tŭ ư blơi gơnam. Hơdôm tơlơi hơmâo lăi nao lĕ ngă rơđah anih pla gơnam, mrô gơnam, QR, tơlơi pơhing bruă ngă hmua pla pơjing, tơlơi pôr pơhing sit, djru ba ƀing blơi gơnam tơdơi kơ sĭ giong, tơdah mơnuih blơi hơmâo tơlơi hơget thơ či kiăng lĕ khŏm djru brơi. Amăng lu thun sĭ gơnam online tŭ yua, yă Trần Thị Bích, sa čô mơnuih ngă hmua ƀơi să Ea Súp lăi, ta prăp lui djŏp tơlơi pơhing kơ gơnam tam, ruah mă glông či ba pơƀuh, prăp rơmet hlâo bruă ta či ngă, pơhiăp tom mơnuih dŏ lăng ta pơdah mơak, hiăp rơhmač, hnun kah bruă ba sĭ mơdrô amăng boh thâo mrô mơ̆ng tŭ yua: “Tơlơi yom hloh đah mơ̆ng dưi sĭ kloh gơnam lĕ, gơnam ta klă, hiam, tơlơi ta ră ruai khŏm sit, hrŏm hăng ta thâo djru brơi ƀing blơi gơnam dong. Tơdah kơnong livestream hiăp đôč đač, tui anun arăng ƀu hor či blơi ôh, yua dah ta ƀu djơ̆ ƀing KOL ƀudah KOC mơnuih arăng hmư̆ hing ôh. Yua hnun, anŏ yom, anŏ klă mơ̆ng gơnam yơh mơ̆ng dưi sĭ mơdrô”.

Amăng jơlan hơdră anai, Khul hơmâo ba pơƀuh grup Zalo “Mơnuih ngă hmua Dak Lăk sĭ gơnam online”, či pơtruh mơnuih ngă hmua, anom ngă ƀong hrŏm hăng ƀing hơmâo gơnam či ba sĭ amăng plang boh thâo mrô./.