Dua hrơi tơdơi kơ plơi Nhin pơmut hrŏm hăng plơi Nghĩa Hưng 1 hăng Nghĩa Hưng 2 jing plơi Nghĩa Hưng 2, să Biển Hồ, ayong Siu Ayun, mơnuih arăng đăo gơnang amăng plơi pla, hrŏm hăng ƀing khua plơi hơmâo nao ĕp lăng hơdôm ară jơlan mơ̆ neh met wa čang rơmang amra tañ tuh ƀêtông. Tơdơi kơ pơmut hrŏm, tơlơi mơ̆ mơnuih ƀôn sang đing nao ƀu djơ̆ kơnong bruă plơi pla pơplih anăn đôč ôh mơ̆ ăt lĕ hơdôm bruă mơnuih mơnam hơmâo djru brơi tañ ƀiă hă ƀŭ. Ayong Siu Ayun brơi thâo, lơm phrâo hmư̆ hơmâo tơlơi črâo trun pơmut hrŏm hăng dua boh plơi pla, ƀơi anai lu hloh lĕ yuăn, lu mơnuih amăng plơi pla ăt bơngơ̆t yua anŏ phara kơ phiăn juăt, tơlơi hơdip mơda. Samơ̆ găn rơgao lu wŏt pơčrông sai, pơtô pơblang hăng pơtrut pơsur, neh met wa ƀơƀrư̆ pơplih tơlơi pơmĭn, bruă dưm dăp huăi ngă rơngiă gru grua amăng plơi pla, mơ̆ ăt hơmâo lu tơlơi gal kiăng pơlir amăng mơnuih mơnam, djru tơdruă pơđĭ kyar. “Kar hăng phrâo anai ƀing gơmơi ăt hơduah tơña, ăt hơmâo tơlơi pơgôp hiăp kơ bruă man pơkra jơlan amăng plơi pla. Khua plơi ră anai thâo thăi ƀiă, hur har pran jua ngă bruă, laih dong ñu dŏ hlăk ai, kiăng hơget iâu telephôn mơtăm. Kâo čang rơmang mơng khua plơi truh pơ jơnum min djop djuai ania mơnuih mơnam amra ngă bruă brơi mơnuih ƀôn sang, jê̆ giăm mơnuih ƀôn sang ƀiă kiăng kơ djru brơi mơnuih ƀôn sang”.

Čang rơmang mơnuih ƀôn sang giăm gong gai ƀon lan, gong gai ƀon lan jê̆ mơnuih ƀôn sang, tơlơi anai amra hơmâo tơlơi rơkâo phrâo brơi ƀing apăn bruă ƀơi ƀon lan. Hăng ayong Đỗ Văn Túc, Khua plơi Nghĩa Hưng 2, să Biển Hồ, tơdơi kơ 15 thun ngă khua plơi, rơwang ngă bruă phrâo anai amra hơmâo lu tơlơi glêh tơnap. Tơdơi kơ pơmut hrŏm, plơi pla hơmâo rơbêh 600 boh sang anŏ, hăng rơbêh 2.400 čô mơnuih. Plơi pla prong giăm tlâo wŏt pơhmu hăng hlâo anun. Tơdah ăt wai lăng tui hơđăp amra ngă glêh tơnap biă mă kiăng djơ̆ hăng tơlơi kiăng, tơlơi čang rơmang mơng mơnuih ƀôn sang. Yua anun, tơdơi kơ dưm dăp, Khul Ping gah hăng khul mơnuih ƀôn sang hơmâo pơjing akŏ bruă tong ten brơi rĭm bruă mă, pơčlah plơi pla jing hơdôm ƀut plơi pla, pơpha mơnuih apăn bruă djru brơi hơdôm ƀut plơi pla. Him lăng, rĭm wŏt hrơi tơjuh, khul mơnuih ƀôn sang amra nao tơl rĭm ƀut plơi pla jơnum hăng mơnuih ƀôn sang, laih dong pơhlôm tŏ tui hơdôm grup ngă bruă mơng ataih kiăng tŭ mă, pơsir hĭ hơdôm bruă tañ hloh. “Plơi pla prong rơhaih, boh pơhiăp hăng gru grua phara dong. Pơ anăp anai kiăng mă yua boh thâo phrâo amăng tơlơi hơdip mơnuih ƀôn sang, amăng kual plơi pla Yuăn hiưm pă, kual plơi pla djuai ania ƀiă hiưm pă, ngă hiưm pă kiăng djru brơi mơnuih ƀôn sang hăng pơgiong bruă jao, anai lĕ hơdôm tơlơi ngă kâo pơmĭn na nao. Tơdơi kơ hơmâo tơlơi pơtrun, ƀing gơmơi hơmâo pơjing akŏ bruă anai mơtăm. Hlâo adih ƀing gơmơi wai lăng kual plơi pla đơđet, bruă mă ñu phara, huăi glêh tơnap đơi ôh. Samơ̆ ră anai kual plơi pla prong rơhaih tui anai, kiăng pơjing hơnong pơkă, akŏ bruă tong ten pơlir hăng kual plơi pla pơprong, mrô mơnuih lu tui dong”.

Mơng 40 boh plơi pla hlâo adih, tơdơi kơ pơmut hrŏm, să Biển Hồ dŏ 2 boh plơi pla, hrŏ trun 42,5%. Hrŏm hăng bruă ngă hơbot anih anom, să ăt hơmâo ruah dưm dăp khul git gai Ping ga, Khua plơi tui jơlan gah brơi djơ̆ hăng tơlơi thâo thăi, pran mă bruă hăng thâo mă yua boh thâo phrâo amăng git gai wai lăng.

Amăng đơ đam tơring čar, truh kơnôl 2/7, Gia Lai hơmâo pơgiong bruă dưm dăp mơng 2.693 dŏ 1.400 boh plơi pla, hrŏ trun 1.293 boh plơi pla, dưm dưm 48,01%.

Ơi Nguyễn Thanh Vũ, kơ-iăng Khua gơnong bruă wai lăng bruă mă tơring čar Gia Lai brơi thâo, hrŏm trun anih anom lĕ sa hơnong pơkă amăng bruă dưm dăp. Tơlơi yôm ƀiă dong lĕ hrưn đĭ klă mơnuih apăn bruă ƀơi ƀon lan kiăng gong gai ƀon lan kiăo tui ngă bruă ƀơi ƀon lan, djru brơi mơnuih ƀon sang klă ƀiă dong lơm anih wai lăng jai prong tui. Tơring čar tŏ tui dưm dăp anih anom, laih dong pel ĕp, lăng glăi hăng pơjing akŏ bruă pơtô pơjuăt brơi ƀing khua git gai Ping gah, khua plơi tui jơlan gah lăp djơ̆ tơlơi rơkâo wai lăng ƀơi ƀon lan amăng rơwang phrâo. “Tui tơlơi pơtrun mrô 185/2026/NĐ-CP kơnôl 26/5/2026 mơng Kơnuk kơna, amăng anun jao tơlơi glăm ba mơng tơring čar kiăng ba tơbiă hơdôm tơlơi pơkă djơ̆ hơnong, tơdơi anun pơtô pơjuăt tui jơlan gah mơng gơnong glông. Hăng ƀing pô anai, rơkâo kiăng hrăm mơng gưl II pơ glông. Dua dong lĕ bruă mă yua boh thâo măi mok. Khua git gai Ping gah lĕ kiăng thâo mă yua hră čih pioh điện tử, anai lĕ sa bơnah amăng bruă pơplih mrô. Hăng ƀing pô anai, rĭm thun amra hơmâo akŏ bruă pơtô pơjuăt. Lơm dưm dăp giong, tơring čar amra hơmâo akŏ bruă pơtô pơjuăt tañ hloh kiăng ƀing adơi ayong hơđong bruă mă pơ anăp anai”.

Tơdơi kơ dưm dăp plơi pla, Gia Lai hơmâo ngă hơbot giăm ha mơkrah anih anom ƀơi ƀon lan. Samơ̆ tơlơi dưi mơng tơlơi črâo trun anai ƀu djơ̆ kơnong pơkă lăng hăng mrô anih anom, plơi pla hrŏ trun đôč ôh mơ̆ ăt tŏ tui pơjing mơnuih apăn bruă ƀơi ƀon lan rơgơi bruă, pơplih phrâo jơlan gah wai lăng kiăng djru brơi mơnuih ƀôn sang klă ƀiă./.