Anai jing tơring čar tal 31 mơng dêh čar ta laih anun jing tơring čar blung a kual Dap Kơdư ngă giong hră pơ-ar či pơtŏng glăi pơsit dưm dăp pơkă hơnong đĭ kyar gưl tơring čar. Bruă dưm dăp pơđĭ kyar tơring čar Dak Nông lăi nao 7 mơta tơlơi đĭ kyar, anăp nao truh pơ thun 2030 akŏ pơdong Dak Nông jing tơring čar bơwih ƀong huă đĭ, hơđong kơjăp mơng kual Dap Kơdư, jing anih prong pơkra bôxit - ñôm mơng dêh čar, anih pơkra apui lơtrik phjrâo mơng kual Dap kơdư; pơđĭ kyar tuai čuă ngui pơdơi pơdă, čuă lăng lŏn mơnai glai rưng kiăo tui tơlơi gêh gal ayuh hyiăng lŏn adai; pơđĭ kyar ngă hmua boh thâo phrâo, hơđong kơjăp. Anăp nao pơ thun 2050, gir djru Dak Nông jing tơring čar pơđĭ kyar mơng kual Dap Kơdư, hơmâo prăk pơhrui yap tui akŏ mơnuih lu hloh kơ mrô jŭ hrŏm mơng dêh čar.

Dak Nông pơsit pơjing 3 mơta tơlơi pơđĭ kyar hloh, kơ: Bruă pơkra bôxit - ñôm - pơsơi pơsă hăng pơkra apui lơtrik hơdjă; Ngă hmua hơđong kiăo tui tơlơi pơplih ayuh hyiăng pơlir hăng anih blơi gơnam; Tuai čuă ngui hyu lăng đang hmua, pơdơi pơdă pơlir hăng anŏ hiam mơng čư̆, mơng ia, plơi pla hăng tơdron čuă ngui lŏn pơtâo hiam UNESCO. Tơring čar pơđĭ kyar 11 kual plơi prong amăng 3 kual amuñ đĭ kyar, 4 anih bơwih ƀong tui glông jơlan 14, 14C, 28 hăng jơlan Ngŏ - Yŭ. Dak Nông ăt ba tơbiă 14 hơdră pơsir bruă đah mơng pơhrui abih tơlơi hơmâo pioh dưm dăp čuk pơkra, pơđĭ kyar tơring čar.