Ƀuôn Kla, să Dray Săp ăt kah hăng hơdôm bôh ƀuôn Êđê ƀơi tơring čar Dak Lak, hăng jơlan plơi pla hăng hơdôm đang kơphê giăm ƀơi hơdôm bôh sang dlông. Samơ̆ amăng lăm ƀuôn Kla lĕ tơlơi phar hăng sa bôh măi pơkra kơphê ha hrơi tơ-oa hyu mơngưi ñu. Anun lĕ sang măi mơ̆ng Sang bruă Êđê Café.

Y Pôt Niê – pô pơčeh pơjing hăng jing khua git gai mơ̆ng sang bruă ăt glăi ƀơi anai mơn. Ñu phrâo mă yua măi hna, mah, poi dơi, hrŏm hăng anun tơngan mă – mơbah pơhiăp, pơčeh phrâo bôh yôm mrô kơ tơlơi anom bơwih ƀong pô mă yua măi mok rơnuk anai pioh pơkra djop mơta kơphê klă hiam. 

Tơdơi kơ 4 thun pok phun bruă, mơ̆ng sa čô ơi ia jrao pơwot glăi hăng bruă ngă kơphê, Y Pôt Niê hmâo yak rơgao lu tơlơi tơnap kơ anô̆ gun bôh pơhiăp, kơƀah tom prăk kak hăng tơlơi găn rơgao. Ñu lăi pơthâo, kâo bưng biă lơm dong mơ̆ng phun hmâo lăng yôm tơlơi pơmut hrŏm kơplah wah bôh thâo đưm hăng bơwih ƀong sĭ mơdrô. Gơnam “Kơphê asăp” hrŏm hăng tơlơi lăi nao apui djuh, gŏ gang, sung hlâu tul hăng tơngan mơ̆ng ƀing amĭ amăng plơi ƀuôn Kla lơm pơjing rai djuai kơphê anai, hmâo djru laih ñu ƀuh lu mơnuih blơi yua hăng wot hơdôm mơnuih djru bruă hăng ñu:

“Kâo bưng biă lơm phrâo pơphun bruă mă, kơphê blung a mơtăm, hmâo ba truh hơdôm mơnuih hmâo hrŏm tơlơi hor kah hăng kâo. Gơñu hmâo iâo telephone rơkâo dưi gum hrŏm. Mơ̆ng anun drơi pô kâo Pôt hmâo dưm dăp mơnuih mă bruă amăng sang bruă. Đa gơgrong bruă ƀơi kual pla kơphê, đa lĕ gơgrong bruă hna mah. Bơ̆ drơi pô kâo Pôt lĕ mơnuih hyu hơduah ĕp, nao pơtrut bruă sĭ mơdrô ƀơi hơdôm bôh tơring čar, gum hrŏm hơdôm wot jơnum ngui sang čơ hăng hloh kơ anun dong lĕ nao pơtrut sĭ mơdrô pơ̆ dêh čar tač rơngiao”.

Anô̆ gun gah bôh pơhiăp dưi pok tơbiă hăng tơlơi gir run pơhrăm ƀu pơdơi, ră anai Y Pôt Niê hmâo djop pran kơjăp amăng hơdôm tal nao pơ̆ Thái Lan, Japan, Đức, Canada. Ƀuôn Kla hyel miel hăng ataih mơ̆ng plơi prong Buôn Ma Thuột, ăt ƀu ngă tơnap mơn hăng Êđê Café, yua kơ kơphê mơ̆ng sang bruă glăk dưi sĭ ƀơi djop anih ƀơi anom sĭ mơdrô tui jơlan măi mok. Wot hơdôm mơnuih tha amăng ƀuôn Kla ră anai ăt thâo mơn kơ hơdră ngă phrâo ƀơi Êđê Café, dưi ƀuh anô̆ klă, anô̆ thâo mơ̆ng klăk ai. Ơi Ama Băm, 64 thun, bơni:

“Ñu rơgơi biă. Kơphê asar krô pĕ tơsă ñu thâo, pĕ mơtah ñu thâo, pĕ mơda ñu thâo. Tơdah kơphê pô pĕ tơsă abih hă ñu blơi hăng nua pơmă. Kơphê mơtah lĕ nua rơgêh, samơ̆ ƀu rơgêh kah hăng anih anom juăt blơi sĭ kơphê mơn. Tơdah anom blơi sĭ anun blơi 135.000 prăk thơ ƀơi anai ñu blơi 136.000-137.000 prăk mơtăm”.

Yak rơgao tơlơi tơnap, pơhrui glăi, kơmlai dưi pơplih phrâo rim thun, Y Pôt ƀuh yâo mơ-ak biă yua kơ hơdôm tơlơi gir run mơ̆ng pô hmâo ba glăi nua kơjăp phik kơ plơi pla.

Hơdôm hrơi rơnuč thun 2024, Y Pôt Niê hmâo nao pơhmư̆ Jơnum mơnuih lăi pơthâo glăi bruă mă rơgơi lăng nao rai mơ̆ng ataih mơ̆ng Khul hlăk ai dêh čar kơ “Thâo, ngă tui mơ̆ng hlăk ai kơ rơnuk phrâo hăng bruă mă, bruă gơgrong mơ̆ng rơnuk hlăk ai”, ñu jai đăo kơnang hloh lĕ hơdôm nua mơ̆ pô kiăo tui amra ngă brơi kơphê, ngă brơi ƀuôn hăng ƀing hlăk ai dưi ngă truh kih phrâo:

“Drơi pô Pôt kiăng pơtô glăi pran pơhưč pioh ƀing čơđai anet hăng mơnuih mă bruă phrâo tơdơi anai lĕ hơdră pơkra kơphê mơ̆ng pô kiăng thâo nua yôm mơ̆ng bruă đang hmua, nua yôm mơ̆ng plơi pla, pioh kơ ƀing hlăk ai neh wa djuai ania ƀiă hmâo tơlơi pơplih amăng tơlơi pơmin, ngă klă hloh, pơđĭ kyar bruă đang hmua ƀơi plơi pla ƀôn lan jai hrơi jai kơjăp kơtang hloh”./.