Tơring čar Lâm Đồng gum hrŏm hăng Sang hră pơtô bruă kơđi čar dêh čar Hồ Chí Minh pơphun Jơnum boh thâo “Hơbô̆ bruă pơđĭ kyar tơring čar Lâm Đồng: Tơlơi dưi hăng anŏ pơtrut”. Tơdơi kơ dưm dăp anih anom mă bruă, tơring čar Lâm Đồng hơmâo lu tơlơi gal kiăng pơđĭ kyar. Tơring čar hơmâo kual lŏn mơnai pơprong mơng čư̆ siăng trun kual hang ia rơsĭ, hơmâo djop mơta ria mơnong, tơlơi dưi gah ngă hmua yua boh thâo phrâo, tuai čuă ngui, apui yua, gơnam amăng atur lŏn hrŏm hăng gru grua yôm phara djop mơta. Anai lĕ tơlơi dưi kiăng pơjing glông jơlan bơwih ƀong huă, anih pơđĭ kyar phrâo hăng kơtưn pơlir amăng kual. Samơ̆ tơring čar ăt dong ƀơi anăp lu tơlơi lông kơ anih anom aka ƀu pơkra ha amăng plĕ, pơlir amăng kual dŏ tơdu, hơbô̆ bruă bơwih ƀong aka ƀu lăp djơ̆ hăng tơlơi dưi, mơnuih mă bruă aka ƀu kjăp hăng bruă pơplih pơčeh phrâo aka ƀu lăp djơ̆ tơlơi rơkâo pơđĭ kyar.

Đĭ pơhiăp amăng mông jơnum, ơi Y Thanh Hà Niê Kđăm, Ding kơna Ping gah dêh čar, Khua git gai Ping gah tơring čar Lâm Đông brơi thâo, hơdôm hơbô̆ bruă pơđĭ kyar tui hơđăp aka ƀu dưi ngă pơtrut phrâo, rơkâo Lâm Đồng kiăng ĕp anŏ pơtrut pơđĭ kyar phrâo hăng tơlơi pơmĭn phrâo lăp djơ̆ hăng tơlơi rơkâo pơplih mrô hăng pơđĭ kyar mơtah. “Tơring čar kiăng hơmâo anŏ pơtrut phrâo, sa tơlơi pơmĭn pơplih phrâo kiăng sem lăng hơdrưh ang mơng Lâm Đồng amăng lŏn ia hăng amăng kual. Yua anun, Jơnum kơsem min boh thâo anai ƀu djơ̆ kơnong lĕ jơnum kiăng ƀing ta lăng glăi hơdôm tơlơi dưi ngă đôč ôh ăt yôm ƀiă dong lĕ anih pơlăi nao rai tơpă hluai tui hơdôm tơlơi kơsem min hăng tơlơi sit nik kiăng ĕp hơdră pơtrut tañ, dưi ngă tui jơlan gah pơđĭ kyar mơng tơring čar Lâm Đồng amăng rơnuk phrâo”.

Kơ-iăng nai tha prin, nai prin tha Đoàn Minh Huấn, Ding kơna Ding jum kơđi čar, Khua Sang hră pơtô bruă kơđi čar dêh čar Hồ Chí Minh lăi pơtong, Lâm Đồng glăk hơmâo lu tơlơi dưi yôm lŏn mơnai glai čư̆, ngă hmua yua boh thâo phrâo, apui lơtrik pơkra phrâo, gơnam amăng atur lŏn hăng tuai čuă ngui. Anai lĕ atur kiăng tơring čar pơđĭ kyar hơdôm hơbô̆ bruă bơwih ƀong mơtah, bơwih ƀong rô nao rai, bơwih ƀong kual ia rơsĭ hăng hơdôm gơnong bruă pơkra gơnam klă hloh. “Jơnum bơkơtuai đing nao pơčrông sai hơdôm tơhnal pơkă yôm phara kiăng ngă pơtrut tañ amăng pơđĭ kyar hăng tŏ tui tơlơi gơgrong mơng hơdôm kual bơwih ƀong huă, sit biă ñu lĕ kual bơwih ƀong mơnuih ƀôn sang ngă pô amăng pơplih hơbô̆ bruă pơđĭ kyar mơng Lâm Đồng. Anăp nao kơtang bruă pơhlôm pơđĭ kyar dua mrô, amăng anun kiăng ngă rơđah hơdôm hơdră kah gưl, jao bruă, pơplih bruă tuh pơ alin bơwih ƀong sĭ mơdrô, hrưn đĭ klă amăng bruă git gai hăng tŭ yua amăng wai lăng pơđĭ kyar”./.