Khul tơhan 34 git gai hơdôm anom bruă pơhlôm brơi klă bruă man pơdong; gơgrong bruă djru tui tlôn, ngă tui djơ̆ hơdôm tơlơi pơkă kơ pơhlôm mơnong ƀong huă hơdjă, mă bruă rơnuk rơnua hăng bơwih brơi tơlơi suaih pral kơ ƀing ling tơhan amăng hơdôm hrơi mă bruă. rơngiao kơ tơhan mơng khul tơhan 34, amăng tal anai, Anom bruă git gai ling tơhan tơring čar Gia Lai (Tơhan kual 5) ăt mut hrŏm djru brơi bruă man pơdong sang hră kơnuk kơna čem rông ba pơlir dua gưl ƀơi kual giăm guai gah Yŭ amăng ƀon lan.

Tơlơi gum tơngan hrŏm mơng anom bruă ling tơhan amra pơgôp pơtrut tañ bruă man pơdong, laih dong tŏ tui ngă lar hyu rup rap tơhan rơnuk wa Hô lêng kơ gum hrŏm ƀon lan amăng bruă pơtô pơjuăt ƀơi kual giăm guai tơring čar Gia Lai.