Amăng hrơi adai pơ-iă hang blan 7 ƀơi kual lŏn Đồng Xuân, gah ngŏ tơring čar Dak Lăk, giăm 30 čô khua, tơhan Anom bruă khua git gai tơhan tơring čar, ling tơhan hrŏm hăng ƀing ơi ia jrao pơčrang čơđeh tơlang ăt dŏ ngă bruă ƀơi hơdôm akŏ pơsat aka ƀu thâo krăn pô či Pơsat tơhan djai pơsăn drơi Xuân Quang 2. Hrŏm hrơi anun mơn, sa grup pơkŏn duñ pơƀut čơđeh tơlang ƀơi Pơsat tơhan La Hai. Rim akŏ pơsat hơmâo pok rơnang, sem lăng tong ten, thâo pơpŭ, yua dah abih bang leng kơ thâo hluh, kơnong kơ sa čơđeh ADN dŏ djă pioh ăt dưi ba glăi sa čô mơnuih glăi pơ sang anŏ tơdơi kơ hơdôm pluh thun.

Hăng Trung tá Lê Nam Ninh, djru bruă Khul pơtrun tơlơi djru bruă, Anom bruă kơđi čar, Anom bruă khua git gai tơhan tơring čar Dak Lăk, tal mă bruă anai yom biă mă. Rơngiao kơ hơdôm bruă hơmâo jao, ñu dŏ djă ba tơlơi čang rơmang lu thun mơ̆ng sang anŏ, ĕp glăi pơsat ơi gah amĭ djai amăng rơnuk blah wang, ăt jing tơlơi dŏ čang tuč rơnuč mơ̆ng amĭ ñu. Trung tá Lê Nam Ninh lăi: “Adơi ayong amăng grup lăi pơthâo rơđah rơđông, jao bruă kơ rim čô mơnuih pơtrut tui pran jua ngă bruă kơtang hloh. ngă abih bruă jao tui hăng pran juan hơdor tơngia hnun kah mơ̆ng hiam. Pô kâo, amăng tal pơsit anăn tơhan anai, ăt čang rơmang ĕp ƀu ơi gah amĭ kâo mơn”.

Ră anai, ƀơi 34 boh pơsat tơhan či tơring čar Dak Lăk, ăt dŏ hơmâo rơbêh 4.100 boh pơsat aka ƀu thâo anăn krăn pô ôh. Tui anun jing hơdôm rơbâo boh sang anŏ ăt dŏ čang, dŏ tơguan ha hrơi thâo anih djai, anih dor mơ̆ng pô djai. Sit tơlơi čang rơmang anun yơh pơtrut pran jua kiăng ƀing khua, ling tơhan hăng ƀing apăn bruă gir ngă bruă, mah adai pơ-iă hang ƀudah amăng hrơi kŏm.

Khă hnun, bruă hyu ĕp anăn kơ ƀing adơi ayong ƀu amuñ amĕ ôh. Tơdơi kơ hơdôm pluh thun, lu akŏ pơsat dŏ glăi lŏn čuah đôč, tơlang tơleh phô̆ abih laih, ƀu ƀuh hơget ôh, anun jing ƀu hơmâo čơđeh či ba pơčrang ADN.

Ƀơi Pơsat tơhan djai pơsăn drơi La Hai, grup hơmâo klơi rŭ 27 boh pơsat samơ̆ kơnong kơ 6 boh pơsat đôč dưi mă čơđeh, bơ 21 boh pơsat ƀu ƀuh hơget či mă pơčrang ôh. Tui anun jing ăt lu đôč tơhan djai pơsăn drơi ƀu dưi pơsit anăn krăn pô.

Ơi ia jrao Hồ Kim Thi, Anom bruă pơčrang čơđeh asar tơring čar Dak Lăk brơi thâo, kiăng rim čơđeh tơlang dưi pơčrang ADN, djŏp bruă khŏm ngă tong ten: “Amăng bruă pơčrang čơđeh tơlang khŏm tong ten, ƀu dưi ngă pơƀă kman kơ pô glăk pơčrang, ƀu dưi ngă pơƀă kơ čơđeh ba pơčrang. Yua dah, mă čơđeh tơnap biă anun jing khŏm răng kơđiăng. Čang rơmang ĕp glăi anăn kơ tơhan djai pơsăn drơi”.

Anom bruă khua git gai tơhan tơring čar Dak Lăk ngă giong laih bruă ba pơčrang čơđeh tơlang ƀơi Pơsat tơhan djai pơsăn drơi La Hai. Ră anai anom bruă brơi nao dua grup mă bruă ƀơi Pơsat tơhan djai pơsăn drơi Xuân Sơn Nam hăng Pơsat tơhan Xuân Phước, să Đồng Xuân.

Truh ră anai, tơhan hơmâo klơi rŭ 280 amăng mrô 4.019 akŏ pơsat tơhan djai pơsăn drơi; pơhrui glăi 105 čơđeh tơlang či ba pơčrang ADN, bơ 175 akŏ pơsat ƀu thâo mă čơđeh tơlang ba pơčrang ôh.

hrŏm hăng anun, Grup K51 ngă hrŏm hăng hơdôm boh tơring sem lăng, pơsit glăi tơlơi pơhing ƀơi 8 amăng mrô 102 boh să, hơmâo hmư̆ 4 tơlơi pơhing kơ tơhan djai pơsăn drơi hăng pơsat tơhan; klơi rŭ hơmâo 4 per tơlang tơhan, ră anai aka ƀu thâo anăn krăn pô ôh.

Tui hăng akŏ bruă, mơ̆ng anai truh kơnôl 11/10/2026, bruă klơi rŭ, mă čơđeh tơlang ƀơi hơdôm boh pơsat tơhan dŏ glăi ƀơi tơring čar amra hơmâo ngă, gir mă čơđeh pơčrang ADN hlâo kơnôl 31/10/2026. Ơi Đào Mỹ, Kơ-iăng khua jơnum min mơnuih ƀôn sang tơring čar Dak Lăk brơi thâo: “Ƀing gơmơi glăk pơtrut pok pơhai bruă mă 500 hrơi mlăm pơsit anăn krăn pô tơhan djai pơsăn drơi. Gơmơi glăk lăng glăi bruă kiăng thâo prăp rơmet jao bruă, pơhlom truh kơnôl 31 blan 10 thun 2026 ngă giong bruă klơi rŭ pơsat či mă čơđeh ba pơčrang. Laih dong glăk pơtrut kơtang bruă hyu ĕp tơlang tơleh tơhan djai pơsăn drơi amăng lŏn ia ta, ăt glăk gir pơtrut hyu ĕp pơ čar Kur”.

Bruă mă 500 hrơi mlăm ƀu kơnong kiăng kiăo hmao thun blan či djă pioh čơđeh ADN dŏ glăi đôč ôh, ăt jing bruă hơdor tơngia “Mơñum ia hơdor kơ pô klơi”, tơlơi gơgrong mơ̆ng rơnuk anai hăng ơi yă đưm djai drơi pô yua kơ tơlơi rơngai mơ̆ng Lŏn ia. Rim akŏ pơsat hơmâo pok, rim čơčeh tơlang hơmâo ba pơčrang jing tơlơi čang rơmang amra hơmâo dong tơhan djai pơsăn drơi thâo anăn, hơmâo plơi pla, hơmâo sang anŏ, kiăng tơdơi kơ hơdôm pluh thun dŏ tơguan, ƀing gơñu dưi glăi pơ sang anŏ, hơmâo tơlơi khăp ƀu-eng, lăp hơdor bơni mơ̆ng lŏn ia./.